ဝစ္စကွန်ဆင် (Wisconsin) ပြည်နယ်မှ ရီပတ်ဘလီကန် အမတ် Ron Johnson က အမေရိကန်ဆီးနိတ်လွှတ်တော် ပြည်တွင်းလုံခြုံရေး စုံစမ်းစစ်ဆေးရေး ဆပ်ကော်မတီကို ဦးဆောင်လျက် ဂျိုးဘိုင်ဒင်၏ ကျန်းမာရေးဆိုင်ရာ ဖုံးကွယ်မှုများနှင့် ပတ်သက်၍ စုံစမ်းစစ်ဆေးမည်ဟု ကြေညာလိုက် ပါသည်။

လွန်ခဲ့သည့် သီတင်းပတ်က ဘိုင်ဒင်၏ရုံးမှ ဘိုင်ဒင်တွင် အလွန် ပြင်းထန်သော ဆီးကျိတ်ကင်ဆာရောဂါ ရှိကြောင်း ထုတ်ဖော် ပြောကြား ခဲ့ပြီး လက်ရှိသမ္မတ ဒေါ်နယ်ထရမ့် အပါအဝင် အချို့က ဝမ်းနည်းကြောင်း ဖော်ပြခဲ့သော်လည်း၊ အချို့သော သုံးသပ်သူများက ဒီမိုကရက်တစ် ပါတီ အသိုင်းအဝိုင်းက အဆိုပါရောဂါရှိမှုကို ကြာမြင့်စွာက သိရှိထားသော်လည်း ပြည်သူများအား တမင်ဖုံးကွယ်ထားခဲ့သည်ဟု ဆိုသည်။

ကြီးကြပ်ရေးမှူး Ron Johnson က လွှတ်တော်ဆပ်ကော်မတီ ရှေ့မှောက်တွင် ဘိုင်ဒင်၏ အုပ်ချုပ်မှုကာလအတွင်း သိမြင်နိုင်စွမ်း ဆိုင်ရာ အခြေအနေများနှင့်ပတ်သက်၍ မေးမြန်းရန် ဘိုင်ဒင်၏ အကြံပေး အဖွဲ့ဝင်ဟောင်းများထံ စာများပေးပို့ပြီးဖြစ်ကြောင်း ကြာသပတေးနေ့ (မေ ၂၂) က X တွင် ရေးသားခဲ့သည်။

“ထိုပုဂ္ဂိုလ်များက အမှန်တရားကို နောက်ဆုံးတော့ ပြောပြမည်လား၊ သို့မဟုတ် ၎င်းတို့၏လှည့်ဖြားမှုများကို ဆက်လုပ်နေဦးမှာလား” ဟု ၎င်းက မေးခွန်းထုတ်ခဲ့သည်။

လွှတ်တော်အမတ် Ron Johnson က Axios သို့ ပြောကြားရာတွင် ဘိုင်ဒင်၏ ကျန်းမာရေးဆိုင်ရာ စုံစမ်းစစ်ဆေးမှုကို စတင်မည်ဖြစ်ကြောင်း၊ အထူးသဖြင့် ဘိုင်ဒင်နှင့် တိုက်ရိုက်ထိတွေ့ဆက်ဆံမှုရှိခဲ့သည့် လူပုဂ္ဂိုလ် များကို အဓိကထားမည်ဟု ဖွင့်ဟခဲ့သည်။

ထရမ့်က ယခင်အစိုးရ၏ ဆိုးရွားသောမူဝါဒများကို “ဘိုင်ဒင် အသိဉာဏ် ချို့ယွင်းနေသည်ကိုသိပြီး Autopen ကို အသုံးပြုခဲ့သူများက အကောင်အထည်ဖော်ခဲ့သည်” ဟု စွပ်စွဲခဲ့သည်။

တာဝန်ထမ်းဆောင်စဉ်ကာလအတွင်း ဘိုင်ဒင်၏ မတည်ငြိမ်သော လမ်းလျှောက်ပုံ၊ မှတ်ဉာဏ်ချို့ယွင်းမှုများနှင့် အတွေးအခေါ်များကို ရှင်းလင်းစွာဖော်ပြနိုင်မှု အားနည်းချက်များကို ဝေဖန်သူများက အလေးပေး ပြောဆိုခဲ့ကြသည်။ ၂၀၂၄ခုနှစ်၊ ဇွန်လတွင် ထရမ့်နှင့် ကျင်းပခဲ့သော စကားစစ်ထိုးပွဲပြီးနောက် ဒီမိုကရက်တစ်ပါတီအတွင်း၌ အဆိုပါ ပြဿနာများ ပိုမိုထင်ရှားလာကာ ဘိုင်ဒင်အား ရွေးကောက်ပွဲမှ နုတ်ထွက်ရန် တောင်းဆိုသံများ မြင့်တက်လာခဲ့ပြီး နောက်တစ်လတွင် ဘိုင်ဒင်က ရွေးကောက်ပွဲ ယှဉ်ပြိုင်မှုမှ နုတ်ထွက်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားတပ်မတော်အား ယူကရိန်းနယ်စပ်တစ်လျှောက် “လုံခြုံရေးကြားခံဇုန်” ဖန်တီးရန် တာဝန်ပေးထားကြောင်း ရုရှားသမ္မတ ဗလာဒီမာပူတင်က ကြာသပတေးနေ့ (မေ ၂၂) တွင် ပြောကြားခဲ့သည်။

ပူတင်က အစိုးရအဖွဲ့အစည်းအဝေးတွင် ယူကရိန်းနှင့် နယ်နိမိတ်ချင်း ထိစပ်နေသော Kursk, Belgorod and Bryansk ကဲ့သို့သော နယ်စပ်ဒေသများ၏ လုံခြုံရေးအခြေအနေကို ဆွေးနွေးခဲ့ပြီး ထိုဒေသခံများအား အထောက်အပံ့ပေးရန် အချက်များကိုလည်း ဆွေးနွေးခဲ့သည်။

“နယ်နိမိတ်တစ်လျှောက် လုံခြုံရေးဇုန်အဖြစ် အကာအကွယ်နယ်မြေ (Buffer zone) တစ်ခု ဖော်ဆောင်ရန် ဆုံးဖြတ်ခဲ့ပြီး ရုရှား တပ်မတော်မှ ယခုအချိန်တွင် ထိုတာဝန်ကို တက်ကြွစွာ ဆောင်ရွက်နေပါသည်။ ရန်သူ၏ တိုက်ခိုက်လာမှုများကို တုန့်ပြန်နှိမ်နင်းကာ လုပ်ငန်းစဉ်များ ဆက်လက် လုပ်ဆောင်နေပါသည်” ဟု ပူတင်က ပြောကြားခဲ့သည်။

ပူတင်က ရုရှားနယ်စပ်ဒေသများရှိ အရပ်သားများအား ယူကရိန်း၏ တာဝေးပစ်လက်နက်များအန္တရာယ်မှ ကာကွယ်ရန် ဤကဲ့သို့သော လုံခြုံရေးဇုန်တစ်ခု ဖန်တီးလုပ်ဆောင်မည်ဖြစ်ကြောင်း လွန်ခဲ့သည့် မတ်လ ကတည်းက ဖော်ပြခဲ့သည်။ ထိုစဉ်က “မိမိတို့ သင့်တော်သည်ဟု ယူဆ ပါက ရုရှားတပ်များမှ ရန်သူအတွက် ဖြတ်ကျော်ရန် အထူးခက်ခဲစေမည့် လုံခြုံရေးဇုန်တစ်ခုကို ဖန်တီးမည်” ဟု ပြောကြားခဲ့သည်။

ရုရှား၏ ကာ့စ်ခ်ဒေသရှိ Lgov မြို့တွင် အရပ်သားများ နေထိုင်ရာ နေရာများကို ယူကရိန်းဘက်မှ ပစ်ခတ်မှုကြောင့် ကလေး ၂ ဦးအပါအဝင် ပြည်သူ အနည်းဆုံး ၁၂ ဦး ဒဏ်ရာရရှိခဲ့ပြီးနောက် သမ္မတပူတင်မှ လုံခြုံရေးဇုန် ဖော်ဆောင်ရန် ကြေညာခဲ့ခြင်းဖြစ်သည်။ Kursk-Rylsk အဝေးပြေးကားလမ်းမ၏ မြို့အဝင်နေရာအနီးကို ပစ်မှတ်ထားတိုက်ခိုက်ခဲ့သည်ဟု ကာ့စ်ခ် ဒေသခေတ္တအုပ်ချုပ်ရေးမှူး Aleksandr Khinshtein က ပြောကြားခဲ့သည်။ ပစ်ခတ်တိုက်ခိုက်မှုတွင် အမေရိကန် ထောက်ပံ့ထားသော HIMARS ဒုံးကျည် အနည်းဆုံး ၃ စင်းအထိ ပါဝင်သည်ဟု မီဒီယာများက ဖော်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

လုံခြုံရေးဆိုင်ရာကိစ္စရပ်များနှင့် စပ်လျဉ်းသည့် အဆင့်မြင့် ကိုယ်စားလှယ် များ၏ ၁၃ ကြိမ်မြောက် နိုင်ငံတကာ အစည်းအဝေးကို မေလ ၂၇ ရက်မှ ၂၉ ရက်အထိ မော်စကို၌ ကျင်းပမည်ဖြစ်သည်။ ယင်းကာလအတွင်း ရုရှားလုံခြုံရေးကောင်စီအတွင်းရေးမှူး Sergei Shoigu သည် မြောက် ကိုရီးယားနှင့် အီရန်နိုင်ငံတို့မှ လုပ်ဖော်ကိုင်ဖက်များနှင့် တွေ့ဆုံမည် ဖြစ်သည်။

၎င်းတို့အပြင် ဖိုရမ်သို့ အိန္ဒိယ၊ လက်တင်အမေရိက၊ အရှေ့တောင် အာရှနှင့် မြောက်အာဖရိကတို့မှ ကိုယ်စားလှယ်အဖွဲ့များလည်းလာရောက်မည်ဖြစ်သည်။

မေလ ၂၈ ရက်မှ ၂၉ ရက်အထိ ၁၃ ကြိမ်မြောက် နိုင်ငံတကာ လုံခြုံရေး ဆိုင်ရာကိစ္စရပ်များအတွက် တာဝန်ရှိသော အဆင့်မြင့်ကိုယ်စားလှယ်များ အစည်းအဝေး ပြင်ပတွင် ရုရှားဖက်ဒရေးရှင်း လုံခြုံရေးကောင်စီ အတွင်း ရေးမှူး Sergei Shoigu သည် အိန္ဒိယ၊ လက်တင်အမေရိက၊ အရှေ့တောင် အာရှ၊ အရှေ့အလယ်ပိုင်းနှင့် မြောက်အာဖရိကရှိ နိုင်ငံအများအပြားမှ ကိုယ်စားလှယ်အဖွဲ့ အကြီးအကဲများနှင့် နှစ်နိုင်ငံ တွေ့ဆုံဆွေးနွေးမည်ဖြစ်ကြောင်း ရုရှားလုံခြုံရေးကောင်စီ၏ သတင်းစာရှင်းလင်းပွဲတွင် ပြောကြား ခဲ့သည်။

ကိုးကား- ဒေသတွင်းမီဒီယာ

ရုရှားနိုင်ငံ၊ မော်စကိုမြို့၌ လုံခြုံရေးဆိုင်ရာကိစ္စရပ်များကို တာဝန်ခံသည့် အဆင့်မြင့် ကိုယ်စားလှယ်များ၏ ၁၃ ကြိမ်မြောက် အစည်းအဝေးတွင် ရုရှားဖက်ဒရေးရှင်း လုံခြုံရေးကောင်စီ အတွင်းရေးမှူး Sergei Shoigu သည် CPC ဗဟိုကော်မတီ ပေါ်လစ်ဗျူရိုအဖွဲ့ဝင် Chen Wenqing နှင့် တွေ့ဆုံမည်ဖြစ်ကြောင်း ရုရှားလုံခြုံရေးကောင်စီ၏ သတင်းစာ ရှင်းလင်းပွဲ ၌ ကြာသပတေးနေ့ (မေ ၂၂) က ဖော်ပြခဲ့ပါသည်။

Sergei Shoigu သည် တရုတ်ထောက်လှမ်းရေးအကြီးအကဲ၊ CPC ဗဟို ကော်မတီ၏ ပေါ်လစ်ဗျူရိုအဖွဲ့ဝင်၊ CPC ဗဟိုကော်မတီ၏ နိုင်ငံရေးနှင့် ဥပဒေရေးရာကော်မရှင်အတွင်းရေးမှူး Chen Wenqing အား မေလ ၂၇ ရက်နေ့တွင် လုံခြုံရေးအရာရှိများ အစည်းအဝေးဖွင့်ပွဲအကြိုတွင် လက်ခံ တွေ့ဆုံမည်ဖြစ်သည်။ ယင်းတို့သည် တရုတ်ဘက်နှင့် အပြန်အလှန် ဆက်ဆံရေး ယန္တရားဘောင်အတွင်း ပြည်သူ့လုံခြုံရေး၊ တရားမျှတမှုနှင့် တရားဥပဒေစိုးမိုးရေးဆိုင်ရာ ဆယ်ကြိမ်မြောက် ညှိနှိုင်းဆွေးနွေးပွဲ ဖြစ်လာမည်ဖြစ်သည်။

ကိုးကား- ဒေသတွင်းမီဒီယာ

Photo: France 24

အရှေ့တရုတ်ပင်လယ်အတွင်း ပြည်ပ ရေတပ်တစ်ခုနှင့် ထိတွေ့မှုများရှိသည်ဟု တရုတ်တပ်မတော်က ထုတ်ပြန်သည်။ ထိုထိတွေ့မှုများတွင် ရဟတ်ယာဉ်နှစ်စင်း မှာ တစ်စင်းနှင့်တစ်စင်း ၁၀ မီတာအကွာ မှပျံသန်းရသည့်ဖြစ်စဉ်ပါဝင်ကြောင်း ထုတ်ပြန်ချက်တွင်ဖော်ပြထားသည်။

ပြည်ပတပ်ဖွဲ့နှင့်ထိတွေ့မှုသည် ၁၀ ရက်တာကာလအတွင်း အကြိမ်ရေ ၁၁ ကြိမ်အထိဖြစ်ပွားခဲ့ခြင်းဖြစ်ကြောင်း CCTV သတင်းဌာနက မေလ ၂၁ ရက်တွင် ဖော်ပြထားသည်။

အဆိုပါထုတ်ပြန်ချက်တွင် ထိတွေ့မှု ဖြစ်ပွားသည့်နေရာနှင့်အချိန်တို့ကို တိတိကျကျဖော်ပြထားခြင်းမရှိသည့်အပြင် ပြည်ပတပ်ဖွဲ့ဆိုသည်မှာလည်း မည်သည့် တပ်ဖွဲ့ဖြစ်သည်ကို ဖော်ပြထားခြင်းမရှိကြောင်း သတင်းဌာနကပြောသည်။

ဖြစ်စဉ်တစ်ခုတွင် တရုတ်ကြည်းတပ် ၏လေတပ်မှရဟတ်ယာဉ်တစ်စင်းသည် အမိန့်အရ စစ်ဆင်ရေးတာဝန်ထမ်းဆောင် စဉ် ပြည်ပနိုင်ငံ၏ရဟတ်ယာဉ်တစ်စင်း ကိုမြင်တွေ့ခဲ့ရသည်ဟု ရဟတ်ယာဉ်မှူး ကပြောကြောင်းသိရသည်။

 Ref: SCMP

အစ္စရေးဝန်ကြီးချုပ် နေတန်ယာဟု က ဂါဇာကမ်းမြောင်ဒေသတွင်ဖြစ်ပွားနေသောစစ်ပွဲ အဆုံးသတ်ရေးအတွက် လိုအပ်သည့်အခြေအနေများကို ထုတ်ဖော်ပြောဆိုလာကြောင်းသိရသည်။

ထိုအခြေအနေများတွင် ဟားမတ်တို့ ဖမ်းဆီးထားသည့် ဓားစာခံများအားလုံး ကိုပြန်လွှတ်ပေးရေး၊ ဂါဇာဒေသကို စစ်ပုံဖော်နေမှုရပ်တန့်ရေးနှင့် ဟားမတ် အဖွဲ့ခေါင်းဆောင်ကို ထိုဒေသမှနှင်ထုတ်ရေးတို့ပါဝင်ကြောင်းနှင့် ယင်းအချက်များအားလုံးသည် အစ္စရေးနိုင်ငံ၏လုံခြုံရေးကိုအာမခံနိုင်မည့်အချက်များပင်ဖြစ် ကြောင်း နေတန်ယာဟုကပြောသည်။

ထို့ပြင် ဂါဇာဒေသခံများအနေဖြင့် ထိုဒေသမှထွက်ခွာလိုပါက ထွက်ခွာခွင့်ရရှိမည်ဖြစ်ကြောင်း၊ အစ္စရေးအနေဖြင့်အဆိုပါ ရည်မှန်းချက်များကို မရရှိသေးသမျှကာလပတ်လုံး ကမ္ဘာ့နိုင်ငံများက အစ္စရေး၏ လုပ်ဆောင်ချက်များကို ရပ်တန့်ရန်ဆိုလာခြင်းက ဟားမတ်အဖွဲ့ကိုအားပေးရာ ရောက်ကြောင်း အစ္စရေးဝန်ကြီးချုပ်က ပြောထားသည်ဟုသိရသည်။

Ref: Sputnik

မြောက်ကိုရီးယားနိုင်ငံက အရှေ့ ပင်လယ်အတွင်းသို့ အနိမ့်ပျံဒုံးကျည်အများအပြားကို မေလ ၂၂ ရက်တွင်ပစ်လွှတ်လိုက်ကြောင်း တောင်ကိုရီးယားစစ်ဘက် ကပြောသည်။

မြောက်ကိုရီးယားစစ်ဘက်က ထိုဒုံးကျည်များပစ်ခတ်မှုကို နံနက်ပိုင်းတွင် လုပ်ဆောင်ခြင်းဖြစ်ကြောင်း တောင်ကိုရီးယား ပူးတွဲစစ်ဦးစီးချုပ်များရုံးက ထုတ်ပြန်ထားသည်။

မြောက်ကိုရီးယားနိုင်ငံသည် မေလ ၈ ရက်တွင် အရှေ့တရုတ်ပင်လယ်အတွင်းသို့ တာတိုပစ်အမြင့်ပျံဒုံးကျည်များစွာကိုပစ်လွှတ်ပြီးနောက် ယခုပစ်ခတ်မှုကို လုပ်ဆောင်ခြင်းဖြစ်သည်။

မြောက်ကိုရီးယားရေတပ်က စစ်ရေယာဉ်အသစ်တစ်စင်းကိုရေချစဉ် ထိုစစ် ရေယာဉ်အက်ကွဲပြီး နောက်တစ်နေ့တွင် ယခုဒုံးကျည်များကိုပစ်လွှတ်ခြင်းဖြစ်ပြီး စစ်ရေယာဉ်အက်ကွဲမှုဖြစ်စဉ်ကို သည်းမခံနိုင်ကြောင်း မြောက်ကိုရီးယားခေါင်း ဆောင်ကပြောထားသည်။ 
Ref: Yonhap

Source: Myawady Daily Newspaper

photo- The Korea Times

အမေရိကန်တွင် ဖမ်းဆီးထားသည့် ရွှေ့ပြောင်းနေထိုင်သူများကို သမ္မတ ထရမ့်အစိုးရ၏ ပြည်တွင်းလုံခြုံရေးဌာနက စစ်ဒဏ်သင့်နေသော တောင်ဆူဒန် နိုင်ငံသို့ ပြည်နှင်ဒဏ်ပေးခဲ့ခြင်းသည် ၎င်းတို့အား လုံလောက်သည့် ကန့်ကွက်ခွင့်မပေး‌ဘဲ ပို့ဆောင်ခဲ့သည့်အတွက် တရားရုံး၏ ယခင် ဆုံးဖြတ်ချက်ကို လုံးလုံးလျားလျား ချိုးဖောက်လိုက်ကြောင်း ဖက်ဒရယ် တရားသူကြီး တစ်ဦးက မေလ ၂၁ ရက်က ဆုံးဖြတ်လိုက်သည်။ 

မြန်မာနိုင်ငံသား ၂ ဦးအပါအဝင် ဖမ်းဆီးခံထားရသူ (၈) ဦးကို အင်္ဂါနေ့ (မေ ၂၁) အစောပိုင်းက လေယာဉ်တစ်စီးပေါ်သို့ ပို့ဆောင်ခဲ့ကြောင်း မက်ဆာချူးဆက် ခရိုင်တရားသူကြီး ဘရိုင်ယန် မာဖီ က ပြောကြားခဲ့ပြီး ဖမ်းဆီးခံများ၏ ရှေ့နေများက အဆိုပါလေယာဥ်မှာ တောင်ဆူဒန်နိုင်ငံသို့ ဦးတည်ထွက်ခွာမည်ဟု ဆိုသည်။

ကိုးကား- CNN

မော်စကို၊ ဆက်ဆံရေး

ရုရှားအစိုးရက မော်စကိုမြို့၌ကျင်းပမည့် နိုင်ငံတကာလုံခြုံရေးဖိုရမ်သို့ အမေရိကန်နိုင်ငံကို ဖိတ်ခေါ်လိုက်ကြောင်း သိရသည်။ အဆိုပါလုံခြုံရေးဖိုရမ်ကို မေလ ၂၇ ရက်မှ ၂၉ ရက်အထိကျင်းပမည်ဖြစ်ပြီး ထိုဖိုရမ်သို့ အမေရိကန်အပါအဝင် ရုရှား၏ မိတ်ဆွေမဟုတ်သော နိုင်ငံများကိုပါ ဖိတ်ခေါ်ထားကြောင်းနှင့် ထိုနိုင်ငံများကလည်း ဖိုရမ်သို့တက်ရန်စိတ်ဝင်စားသည် ဟုတုံ့ပြန်ထားကြောင်း ရုရှားလုံခြုံရေးကောင်စီ ဒုတိယအတွင်းရေးမှူး အလက်ဇန်းဒါးဗီနီဒစ်တော့ကပြောသည်။

၁၃ ကြိမ်မြောက်အဖြစ်ကျင်းပမည့် ထိုနိုင်ငံတကာလုံခြုံရေးဖိုရမ်ကို ရုရှား လုံခြုံရေးကောင်စီအတွင်းရေးမှူး ဆာဂျီ ရွှိုင်ဂူကဦးစီးဆောင်ရွက်ခြင်းဖြစ်ပြီး နိုင်ငံ ပေါင်း ၁၀၀ ကျော်မှ ကိုယ်စားလှယ်အဖွဲ့ ပေါင်း ၁၂၅ ဖွဲ့ကျော်တက်ရောက်မည်ဖြစ်သည်။

Ref: Sputnik

Source: Myawady Daily Newspaper

ကွန်ချာဆိုတာ တင်စားပြီးပြောထားတဲ့ စကားရပ်တစ်ခုဖြစ်ပေမယ့် သူ့ရဲ့လုပ်ဆောင်ချက်ကတော့ နိုင်ငံကိုကာကွယ်ရေးမှာ တော်တော်လေး အသုံးဝင်စေမယ့် လက်နက်စနစ်တစ်မျိုးဖြစ်ပါတယ်။ ဒီလက်နက်ကို အသုံးပြုမယ့်သူက အမေရိကန်ပြည်ထောင်စုဖြစ်ပြီး အသုံးပြုဖို့အတွက် ခွင့်ပြုလိုက်သူက သမ္မတဒေါ်နယ်ထရမ့်ပဲ ဖြစ်ပါတယ်။

အမေရိကန်သမ္မတ ဒေါ်နယ်ထရမ့်က မေလ ၂၁ ရက်မှာ အိမ်ဖြူတော်ရဲ့ ဘဲဥပုံရုံးခန်းထဲရှိနေစဉ် သူစီစဉ်ထားတဲ့ ရွှေကွန်ချာစနစ် တည်ဆောက်ရေးကို အတည်ပြုလိုက်တာဖြစ်ပါတယ်။ အဲဒီစနစ်ကိုတည်ဆောက်ဖို့အတွက် အမေရိကန်ဒေါ်လာ ၁၇၅ ဘီလီယံ အထိ အသုံးပြုသွားမယ်လို့ တရားဝင်ထုတ်ပြန်လိုက် တာဖြစ်ပါတယ်။ ရွှေကွန်ချာဆိုတဲ့ ဘက်စုံသုံးဒုံးကျည်ကာကွယ်ရေးစနစ်က   မြေပြင်၊ ရေပြင်၊ ဝေဟင်မှသာမက အာကာသထဲကပါ ရောက်ရှိလာမယ့် မျိုးဆက်သစ်ဒုံးကျည်တွေရဲ့ အန္တရာယ်ကနေ ကာကွယ်ဖို့ဖြစ်ပါတယ်။ ဒေါ်နယ်ထရမ့်ကိုယ်တိုင်က သူ့ရဲ့ရွှေကွန်ချာစနစ်ဟာ ကမ္ဘာတစ်ဖက်ခြမ်းကနေ ပစ်လွှတ်လိုက်တဲ့ ဒုံးကျည်တွေကိုတောင်မှ ဟန့်တားကာကွယ်နိုင်စွမ်းရှိမယ်လို့ အမွှမ်းတင် ပြောထားတာပါ။

အမေရိကန်ရဲ့ ရွှေကွန်ချာစနစ်က  တကယ်တမ်းတော့ အစ္စရေးရဲ့အစွမ်းထက်လှတဲ့ သံကွန်ချာအမည်ရ ဒုံးကျည်ကာကွယ်ရေးစနစ်ကို မှီငြမ်းပြီးအမည်ပေး ထားပေမယ့် ရွှေကွန်ချာကတော့ သံကွန်ချာထက် စွမ်းဆောင်ရည် ပိုမိုမြင့်မားကာ အဆင့်မြင့်ဒုံးကျည်တွေရဲ့အန္တရာယ်ကနေ နိုင်ငံကိုကာကွယ်ပေးနိုင်မယ် လို့ဆိုပါတယ်။ အဲဒီအန္တရာယ်တွေထဲမှာ အသံနှုန်းလွန်ဒုံးကျည်များမှသည် FOBS လို့လူသိများတဲ့ ကမ္ဘာပတ်လမ်းမှ ဗုံးကြဲစနစ်များမှ ပစ်လွှတ်လိုက်သော ဒုံးကျည်ထိပ်ဖူးများအထိ ပါဝင်ပါတယ်။

သံကွန်ချာစနစ်က လူဦးရေထူထပ်တဲ့နေရာတွေကိုသာ တာတိုပစ်ဒုံးကျည်တွေရဲ့အန္တရာယ်ကနေ ကာကွယ်နိုင်ဖို့ ဖန်တီးထားတာဖြစ်ပါတယ်။ အရွယ် အစားအားဖြင့် နယူးဂျာစီပြည်နယ်တစ်ခုမျှလောက်သာရှိတာပါ။  အခုရွှေကွန်ချာစနစ်ကကျတော့ သံကွန်ချာစနစ်က ကာကွယ်နိုင်တဲ့  အရွယ်အစားထက်ကို အဆပေါင်း ၄၅၀ အထိ ကြီးမားတဲ့ နယ်မြေပမာဏကို ကာကွယ်နိုင်စေမှာဖြစ်ပါတယ်။

ဒီစနစ်ထဲမှာ အာကာသအခြေပြု အာရုံခံကိရိယာများမှသည် ဘက်စုံလွှမ်းခြုံ ကာကွယ်နိုင်ရေးအတွက် ကြားဖြတ်ဒုံးကျည်များအထိ နောက်ဆုံးပေါ်ဖြစ်တဲ့ နည်းပညာများ ပေါင်းစပ်ပါဝင်ထားပါတယ်။ ဒီအတွက်ကြောင့် ရွှေကွန်ချာစနစ်က ရန်သူ့ဆီကနေဒုံးကျည် ကိုမပစ်လွှတ်မီ၊ ပစ်လွှတ်စဉ်စတဲ့ အဆင့်အမျိုးမျိုးမှာ ရန်သူ့ဒုံးကျည်တွေကို ဖျက်ဆီးနိုင်စွမ်းရှိစေမယ်လို့ ထရမ့်ကပြောထားပါတယ်။

ဒီစီမံကိန်းအတွက် အမေရိကန်ဒေါ်လာ ၂၅ ဘီလီယံကို  ကနဦး အသုံးပြုသွားမှာဖြစ်ပြီး   အဲဒီငွေကြေးတွေက လက်ရှိအစိုးရရဲ့ မူဝါဒများအရ အသုံးစရိတ် ဖြတ်တောက်မှုနဲ့ အခွန်ကောက်ခံရရှိမှုတွေကနေ ပေးဆောင်သွားမှာဖြစ်ပြီး   ဒီစီမံကိန်းကိုဦးဆောင်မယ့်သူက အမေရိကန်အာကာသတပ်ဖွဲ့မှ အာကာသ စစ်ဆင်ရေးများ ဌာနဒုတိယအကြီးအကဲ ဗိုလ်ချုပ်ကြီး မိုက်ကယ်အေဂူးအက်လိမ်း ဖြစ်ပါတယ်။

ဒီလိုမျိုးရွှေကွန်ချာစနစ်ကို တည်ဆောက်နိုင်ဖို့အတွက် အမေရိကန်သမ္မတ ဒေါ်နယ်ထရမ့်က အိမ်ဖြူတော်ကို ပြန်တက်လာချိန်မှာပဲ အမိန့်ပေးခဲ့တာပါ။ အခုတော့ ဒီစနစ်ကိုစတင် တည်ဆောက်ဖို့ အတည်ပြုလိုက်တာ ဖြစ်ပါတယ်။ ထရမ့်က သူ့ရဲ့သမ္မတ သက်တမ်း မကုန်ဆုံးမီမှာ ဒီစနစ်ကြီးအပြီးသတ်စေရမယ်လို့ ဆိုထားပါတယ်။

Source: Myawady Web Portal