အစ္စရေးက ဂါဇာကို ဝေဟင်၊ မြေပြင် စစ်ဆင်ရေးများဖြင့် တိုက်ခိုက်မှုများ ပြန်လည်စတင်နေပြီဖြစ်ရာ ပြီးခဲ့သည့် ၂၄ နာရီအတွင်း  အစ္စရေးတို့၏ လေကြောင်း တိုက်ခိုက်မှုကြောင့်    ပါလက်စတိုင်း ပြည်သူ ၁၄၆ ဦးသေဆုံးကြောင်းနှင့် ၄၅၉ ဦးဒဏ်ရာရရှိကြောင်း ဂါဇာကျန်းမာရေး တာဝန်ရှိသူများက မေလ ၁၇ ရက်တွင်ပြောသည်။

အစ္စရေးနှင့်ဟားမတ်တို့ကြား အပစ်အခတ်ရပ်စဲရေးသည် မတ်လတွင် ပျက်ပြားသွားပြီးနောက်   မေလ ၁၅ ရက်မှစ၍ အစ္စရေးက ဗုံးကြဲတိုက်ခိုက်မှု ပြန်လည်လုပ်ဆောင်လာရာ လက်ရှိတိုက်ခိုက်မှုက လူသေဆုံးမှု အများဆုံးဖြစ်လာသည်။ ယခုနောက်ဆုံး ဝေဟင်၊ မြေပြင်ထိုးစစ်ကိုမူ အမေရိကန်သမ္မတဒေါ်နယ်ထရမ့်၏ ပင်လယ်ကွေ့နိုင်ငံများ ခရီးစဉ်အပြီးတွင်  လုပ်ဆောင်လာခြင်းဖြစ်သည်။

“ညသန်းခေါင်လောက်ကစပြီး သေဆုံးသူ ၅၈ ဦးရဲ့ ရုပ်အလောင်းတွေကို လက်ခံရရှိပါတယ်။ ကျန်တဲ့သူ တော်တော်များများကတော့ အပျက်အစီးပုံအောက်မှာ ရှိနေဆဲပါ။ အခုလက်ရှိဆေးရုံထဲမှာဖြစ် နေတဲ့အခြေအနေက  တကယ့်ကို ထိန်းမနိုင်သိမ်းမရပါဘဲ”ဟု    ဂါဇာမြောက်ပိုင်းရှိ အင်ဒိုနီးရှားဆေးရုံမှ ညွှန်ကြားရေးမှူး မာဝမ်အယ်ဆူတန်က ပြောသည်။

အစ္စရေးက ၎င်းတို့အနေဖြင့် ဂါဇာဒေသအတွင်း စစ်ဆင်ရေးနယ်မြေကိုချဲ့ထွင်သည့်အနေဖြင့် တိုက်ခိုက်မှုများ ကိုပိုမိုပြုလုပ်လျက်ရှိကြောင်း၊ လက်ရှိတွင် စစ်ဆင်ရေးအရ ထိန်းချုပ်ထားနိုင်ပြီဖြစ်ကြောင်း မေလ ၁၇ ရက်တွင်ပြောထား သည်။

ဂါဇာဒေသအတွင်း အစ္စရေး၏ဗုံးကြဲ တိုက်ခိုက်မှုများကြောင့် ဆေးရုံများတွင် ပျက်စီးမှုများစွာ ဖြစ်ပေါ်နေသည့်အပြင် အစ္စရေး၏ ပိတ်ဆို့ထားမှုကြောင့်လည်း ဆေးဝါးများပြတ်လပ်နေကြောင်း သိရသည်။   

Source: https://myawady.net.mm/

မော်စကို၊ ဆက်ဆံရေး

ပြင်သစ်နိုင်ငံသည် ရုရှားအပေါ်ဆန့်ကျင်သည့် အနောက်အုပ်စု၏ စစ်ကစားမှုကို ဦးဆောင်လာနေသည့် နိုင်ငံတစ်နိုင်ငံဖြစ်လာကြောင်း ရုရှားနိုင်ငံခြားရေးဝန်ကြီးဌာနမှပြောရေးဆိုခွင့်ရှိသူ မာရီယာဇာခါ ရိုဗာကပြောသည်။

လက်ရှိအချိန်တွင် အမေရိကန်သမ္မတ ဒေါ်နယ်ထရမ့်ဦးဆောင်သော အစိုးရအဖွဲ့ က ပဋိပက္ခများကို ဖြေရှင်းနိုင်ရေးအတွက် ရင်ကြားစေ့ရေးကိုဦးစားပေးလုပ်ဆောင် လာနေသော်လည်း ပြီးခဲ့သည့်လ အနည်းငယ်အတွင်း ပြင်သစ်နိုင်ငံသည် ယူကရိန်း အပေါ်စစ်လက်နက်ပစ္စည်းများပိုမိုထောက်ပံ့ခြင်း၊ ရုရှားအပေါ်ပိတ်ဆို့မှုများပိုမိုချမှတ်ခြင်းတို့ဖြင့် အနောက်အုပ်စု၏စစ်ကစားမှုကို   ဦးဆောင်လာနေခြင်း ဖြစ်ကြောင်း မာရီယာဇာခါရိုဗာကပြောသည်။

ယခုနှစ်အစောပိုင်းတွင်ယူကရိန်းနိုင်ငံသို့ Mirage 2000 တိုက်လေယာဉ်များ ပေးပို့ထားသည့်     ပြင်သစ်အစိုးရက ယူကရိန်းက   တောင်းဆိုထားသော အကြောင်းပြချက်မရှိ ရက် ၃၀ အပစ်အခတ် ရပ်စဲရေးကို ရုရှားကလက်မခံလျှင် ဥရောပသမဂ္ဂက ရုရှားအပေါ် ပိတ်ဆို့မှုများထပ်မံချမှတ် မည်ဟု ပြောထားသည်။   

Ref: RT

Source: https://myawady.net.mm/

အမေရိကန် လျှို့ဝှက်စုံစမ်းထောက်လှမ်းရေးအဖွဲ့သည် အမေရိကန် ပြည်တွင်း လုံခြုံရေးအဖွဲ့ FBI ဒါရိုက်တာဟောင်း ဂျိန်းကိုမေး ကို သမ္မတ ဒေါ်နယ်ထရမ့်အား လုပ်ကြံသတ်ဖြတ်ရန် ခြိမ်းခြောက်မှုဖြင့် စုံစမ်း စစ်ဆေးနေကြောင်း သိရသည်။ ကိုမေးသည် သမ္မတဒေါ်နယ်ထရမ့် အပြင် ပြည်ထဲရေးနှင့် လုံခြုံရေးဝန်ကြီး ခရစ်တီနိုအမ်ကိုလည်း ခြိမ်းခြောက်မှု များလုပ်ဆောင်ခဲ့ခြင်းကြောင့် စုံစမ်းစစ်ဆေးခံရဖွယ်ရှိနေသည်။

FBI ဒါရိုက်တာဟောင်းဂျိန်းကိုမေးသည် ဒေါ်နယ်ထရမ့် နှင့် နိုအမ်ကို ရာထူးမှနုတ်ထွက်ရန်၊ သတ်ရန် စသော စာသားများဖြင့်ခြိမ်းခြောက်ခဲ့ခြင်းဖြစ်ကြောင်း အမေရိကန် မီဒီယာများက ဖော်ပြကြသည်။ အမေရိကန် ပြည်ထဲရေးနှင့်လုံခြုံရေးဝန်ကြီးဖြစ်သူ နိုအမ်က “FBI ဒါရိုက်တာဟောင်းဂျိန်းသည် ဒေါ်နယ်ထရမ့်ကို လုပ်ကြံရန် တောင်းဆို ခဲ့ကြောင်း သိရှိရသည်။ 

ပြည်တွင်း လုံခြုံရေးအဖွဲ့များသည် အဆိုပါအမှုကိစ္စကို စုံစမ်းစစ်ဆေး နေပြီး သင့်တော်သလို တုံ့ပြန်သွားမည်။ လက်ရှိအချိန်မှာ FBI ဒါရိုက်တာ ဟောင်းဂျိန်းကိုမေး ကိုစုံစမ်းစစ်ဆေးရန် အေးဂျင့်များ စေလွှတ်သွားမည်”ဟု ပြောသည်။ အိမ်ဖြူတော် ဝန်ထမ်းရေးရာအဖွဲ့ဒုတိယအကြီးအကဲ ဘူဒိုဝစ်က ကိုမေး၏ပိုစ့်သည် အမေရိကန် လက်ရှိသမ္မတကို လုပ်ကြံ သတ်ဖြတ်ရန် လှုံ့ဆော်ကြံစည်ခြင်းမျိုးဖြစ်ကြောင်း ပြောသည်။ 

ဒေါ်နယ်ထရမ့်၏ သားဖြစ်သူ ဒေါ်နယ်ထရမ့် ဂျူနီယာကလည်း ကိုမေး သည် ၎င်း၏ဖခင် အမေရိကန်သမ္မတကို သတ်ဖြတ်ရန် တောင်းဆိုခြင်း မျိုးဖြစ်ကြောင်း မှတ်ချက်ပြုပြောဆိုထားသည်။ ဒေါ်နယ်ထရမ့်သည် အမေရိကန်သမ္မတအဖြစ် ပြန်လည်တာဝန်ယူချိန်အတွင်း FBI ဒါရိုက်တာ အဖြစ်တာဝန်ယူနေသူ ကိုမေးကို ပထမဦးဆုံးထုတ်ပယ်ခဲ့ကြောင်း သိရ သည်။

ဒေါ်နယ်ထရမ့်သည် ပြီးခဲ့သောနှစ်အတွင်း ကျင်းပခဲ့သော သမ္မတ ရွေးကောက်ပွဲမတိုင်ခင်ကတည်းက လုပ်ကြံသတ်ဖြတ်ရန် ကြိုးပမ်းခြင်းများကို ရင်ဆိုင်ခဲ့ရပြီး နှစ်ကြိမ်စလုံး အသက်ရှင်လွတ်မြောက်ခဲ့ကြောင်း သိရသည်။ ပြီးခဲ့သော ၂ဝ၂၄ ခုနှစ်၊ ဇူလိုင်လအတွင်း ကျင်းပခဲ့သော ရွေးကောက်ပွဲ အကြိုမဲဆွယ်စည်းရုံးပွဲတွင် သေနတ်ဖြင့် လုပ်ကြံ ပစ်သတ်ခံရသော်လည်း နားရွက်ကိုသာ ထိမှန်ခဲ့ပြီး အသက်ရှင်သန်ခွင့်ရခဲ့သည်။ ထို့ပြင် ၂၀၂၄ ခုနှစ်၊ စက်တင်ဘာလအတွင်း ဒေါ်နယ်ထရမ့်ကို ဖလော်ရီဒါ ပြည်နယ်ရှိ ဂေါက်ကွင်းတွင် လုပ်ကြံရန် ကြံစည်မှုဖြစ်ပွားခဲ့ပြီး လုံခြုံရေးအဖွဲ့များက ဖမ်းဆီးနိုင်ခဲ့သည်။

ကိုးကား- NP News

အိန္ဒိယနှင့် ပါကစ္စတန်တို့သည့် ၎င်းတို့၏ နျူကလီးယားလက်နက်များကို ထိန်းချုပ်ရန် ပျက်ကွက်ခဲ့ ကြောင်း မေ ၁၇ ရက်က အပြန်အလှန် စွပ်စွဲခဲ့ကြသည်။

ထို့ပြင်ကမ္ဘာ့နိုင်ငံများအနေဖြင့် ၎င်းတို့၏ နျူကလီးယား လက်နက်အင်အားကို စောင့်ကြည့်ရန် လည်း အိန္ဒိယနှင့် ပါကစ္စတန်တို့က တိုက်တွန်းခဲ့သည်။

ပါကစ္စတန်၏ နျူကလီးယားလက်နက်တိုက်ကို ကုလသမဂ္ဂ၏ အဏုမြူစွမ်းအင် အေဂျင်စီ၏ စောင့်ကြည့်မှုအောက်တွင် ထားရှိသင့်ကြောင်း ရာ့ဂျ်နက်သ်ဆင်းက ပြောကြားခဲ့ပြီး ပါကစ္စတန်ကမူ နိုင်ငံတကာ အသိုင်းအဝိုင်းအနေဖြင့် အိန္ဒိယရှိ မှောင်ခိုစျေးကွက်ကို စုံစမ်းစစ်ဆေးသင့်ကြောင်း ပြောကြားခဲ့သည်။

မေ ၁၀ ရက်က အပစ်အခတ်ရပ်စဲရေး သဘောတူညီမှုမရမီ အိန္ဒိယနှင့် ပါကစ္စတန်တို့သည် အင်ပြည့်အားပြည့် စစ်ပွဲတစ်ခုဖြစ်ပွားလုနီး အခြေအနေသို့ ရောက်ရှိစေခဲ့သည့် အပြန်အလှန် တိုက်ခိုက်မှုများကြောင့် ကမ္ဘာတစ်ဝန်း စိုးရိမ်မှုများ မြင့်တက်ခဲ့သည်။

“ကမ္ဘာကြီးအတွက် မေးခွန်းတစ်ခု မေးချင်ပါတယ်။ ဆိုးသွမ်းပြီး တာဝန်မဲ့သည့် နိုင်ငံ တစ်နိုင်ငံ၏ လက်ထဲမှာ နျူကလီးယား လက်နက်တွေဟာ ဘေးကင်းလုံခြုံပါ့မလားဆိုသည့် မေးခွန်းပါ” ဟု ဆင်း က အိန္ဒိယဘက်ခြမ်းရှိ စစ်စခန်းတစ်ခုတွင် စစ်သည်များကို ပြောကြားခဲ့သည်။

“ပါကစ္စတန်၏ အဏုမြူလက်နက်တွေကို နိုင်ငံတကာ အဏုမြူစွမ်းအင်အေဂျင်စီ (IAEA)၏ စောင့်ကြည့်မှုအောက်မှာ ထားရှိသင့်ပါသည်” ဟု ဆင်းက ပြောကြားခဲ့သည်။

နာရီပိုင်းအကြာတွင် ပါကစ္စတန်နိုင်ငံခြားရေးဝန်ကြီးဌာနက IAEA အနေဖြင့် အိန္ဒိယရှိ နျူကလီးယားနှင့် ရေဒီယိုသတ္တိကြွပစ္စည်းများပါဝင်သည့် တရားမဝင်မှောင်ခိုကူးသည့်ဖြစ်ရပ်များနှင့် ခိုးယူမှုများကို စုံစမ်းစစ်ဆေးသင့်ကြောင်း ပြောကြားခဲ့သည်။

“အဆိုပါ ဖြစ်ရပ်များသည် အိန္ဒိယနိုင်ငံထဲမှာ ထိလွယ်ရှလွယ်ရှိပြီး နှစ်မျိုးသုံးနိုင်သည့် ကုန်ပစ္စည်းများ အတွက် မှောင်ခိုစျေးကွက်တစ်ခု ရှိနေခြင်းဆိုသည်ကို ပြသနေပါသည်” ဟု ပါကစ္စတန်နိုင်ငံခြားရေး ဝန်ကြီး ဌာနက ထုတ်ပြန်ခဲ့သည်။

မေ ၁၇ ရက်ကမူ ပါကစ္စတန်နိုင်ငံခြားရေးဝန်ကြီး အစ်ဟက်ဒါးက နှစ်နိုင်ငံကြား အပစ်အခတ် ရပ်စဲရေးကို မေ ၁၈ ရက်အထိ သက်တမ်းတိုးရန် သဘောတူခဲ့ပြီး စစ်တပ်အချင်းချင်း ဆက်သွယ်မှု များရှိခဲ့ကြောင်း ပြောကြားခဲ့သည်။

ဧပြီလအတွင်းက အိန္ဒိယဘက်ခြမ်းရှိ ကက်ရှ်မီးယားဒေသတွင် လူ ၂၆ ဦး သေဆုံးခဲ့သည့် စစ်သွေးကြွ များ၏ တိုက်ခိုက်မှုဖြစ်ပွားပြီးနောက် ပါကစ္စတန်တွင် အကြမ်းဖက်စခန်းများရှိသည်ဟု အိန္ဒိယက ပြောကြားခဲ့ကာ မေ ၇ ရက်တွင် ပါကစ္စတန်နိုင်ငံအတွင်းရှိ ပစ်မှတ်များကို တိုက်ခိုက်ခဲ့သည်။

ပါကစ္စတန်သည် တိုက်ခိုက်မှုကျူးလွန်ခဲ့သည့် စစ်သွေးကြွများကို ထောက်ပံ့ပေးထားကြောင်း အိန္ဒိယက စွပ်စွဲခဲ့ပြီး ပါကစ္စတန်ကမူ အိန္ဒိယ၏ စွပ်စွဲမှုများကို ငြင်းဆိုခဲ့သည်။

ထို့နောက် နှစ်နိုင်ငံကြား ဒရုန်းများ၊ ဒုံးကျည်များ၊ လက်နက်ကြီးများဖြင့် လေးရက်ကြာ တိုက်ပွဲ ပြင်းထန်စွာ ဖြစ်ပွားခဲ့ပြီး အရပ်သားများအပါအဝင် လူပေါင်း ၇၀ နီးပါး သေဆုံးခဲ့သည်။ မေ ၁၀ ရက်တွင်မူ အမေရိကန်၏ ကြားဝင်စေ့စပ်မှုဖြင့် အပစ်အခတ်ရပ်စဲရေး သဘောတူညီမှု ရရှိခဲ့သည်။

ကိုးကား- Eleven Media Group

ရုရှား လုံခြုံရေးကောင်စီ၏ သတင်းထုတ်ပြန်ရေးဌာနမှ ထုတ်ပြန်ချက် အရ လာမည့်လကုန်ပိုင်းတွင် မော်စကိုမြို့၌ ကျင်းပမည့် ၁၃ကြိမ်မြောက် အပြည်ပြည်ဆိုင်ရာ လုံခြုံရေးညီလာခံသို့ နိုင်ငံပေါင်း ၁၅၀ ကျော်မှ ကိုယ်စားလှယ်များ တက်ရောက်မည်ဟု သိရသည်။

မေလ ၂၇ ရက်မှ ၂၉ ရက်အထိ ရုရှား အမျိုးသားစင်တာ၌ ကျင်းပမည့် အဆိုပါ နှစ်ပတ်လည်ညီလာခံ၏ ဆွေးနွေးမည့်အကြောင်းအရာများတွင် အရေးပါသော နည်းပညာနှင့် သတင်းအချက်အလက် အခြေခံ အဆောက် အအုံများကို ကာကွယ်ရန် အပြည်ပြည်ဆိုင်ရာ ပူးပေါင်းဆောင်ရွက်မှုများ ပါဝင်မည်ဖြစ်သည်။

သတင်းထုတ်ပြန်ရေးဌာနက “အထူးသဖြင့် ပိုမိုတရားမျှတ၍ ယနေ့ခေတ် အခြေအနေများနှင့်လည်း ကိုက်ညီသော တန်းတူညီမျှပြီး မခွဲခြားနိုင်သည့် လုံခြုံရေးဆိုင်ရာ ဖွဲ့စည်းပုံအသစ်တစ်ရပ် ဖော်ဆောင်ရေးကို ဆွေးနွေး သွားမည်” ဟု ရှင်းလင်းဖော်ပြခဲ့သည်။

အကြမ်းဖက်တိုက်ခိုက်မှုများ၊ နည်းပညာဆိုင်ရာ ဖျက်ဆီးမှုများနှင့် အွန်လိုင်း လှည့်ဖြားမှုများကို တိုက်ဖျက်ရေးတို့သည် အဆိုပါညီလာခံ၏ အဓိကဆွေးနွေးစရာ အကြောင်းအရာများ ဖြစ်လိမ့်မည်ဟု ဆိုသည်။

ရုရှား လုံခြုံရေးကောင်စီက သတင်းအချက်အလက်နယ်ပယ်ဆိုင်ရာ စိန်ခေါ်မှုများနှင့် ခြိမ်းခြောက်မှုများကို အခြားကျွမ်းကျင်သူများ ပါဝင်သောအထူးဆွေးနွေးပွဲတစ်ရပ်တွင် အမျိုးသားလုံခြုံရေးအကြံပေးများနှင့်ထောက်လှမ်းရေးအေဂျင်စီများ၏ ခေါင်းဆောင်များက ဆွေးနွေးသွားမည် ဟု အတိအလင်း ဖော်ပြခဲ့သည်။

ထုတ်ပြန်ချက်တွင် “ညီလာခံက သတင်းအချက်အလက် လုံခြုံရေး နယ်ပယ် ဆိုင်ရာ အရေးကြီးဆွေးနွေးရန်ကိစ္စရပ်များကို အပြည်ပြည်ဆိုင်ရာ ပူးပေါင်း ဆောင်ရွက်မှုပတ်ဝန်းကျင်တွင် ဆွေးနွေးနိုင်မည်” ဟု ဖော်ပြထားသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ပြင်သစ်၊ စပိန်နှင့် ဂရိနိုင်ငံတို့သည် Meta ၏ Facebook နှင့် Elon Musk ၏ X အပါအဝင် လူမှုမီဒီယာပလက်ဖောင်းများတွင် အသက်အရွယ် အတည်ပြုချက်ကို မဖြစ်မနေလုပ်ဆောင်ရန် တိုက်တွန်းနေကြောင်း Bloomberg သတင်းဌာနက သောကြာနေ့ (မေ ၁၆) တွင် ဖော်ပြခဲ့သည်။

အဆိုပြုထားသော စည်းမျဉ်းသစ်များအရ အင်တာနက် ချိတ်ဆက်ထားသော ကိရိယာအားလုံးတွင် အသက်အရွယ်အတည်ပြုချက်နည်းပညာကို တပ်ဆင်ထားရမည်ဖြစ်သည်။ Bloomberg က ကိုးကားဖော်ပြခဲ့သော စာတမ်းတစ်စောင်အရ EU အဖွဲ့ဝင်နိုင်ငံသုံးနိုင်ငံမှ ဒီဂျစ်တယ် ဝန်ဆောင်မှု ဝန်ကြီးများသည် ဇွန်လ ၆ ရက်နေ့တွင် အဖွဲ့ဝင်နိုင်ငံများနှင့် ကျင်းပမည့် အစည်းအဝေးမတိုင်မီ အဆိုပါကြိုးပမ်းမှုကို ညှိနှိုင်းဆောင်ရွက်နေ ကြသည်။

သတင်းအရ အဆိုပါနိုင်ငံသုံးနိုင်ငံက “သင့်လျော်ပြီးကျယ်ပြန့်သော အသက်အရွယ် အတည်ပြုချက်ယန္တရားများ ကင်းမဲ့နေခြင်း” သည် အသက် အရွယ်ကန့်သတ်ချက်များကို ထိရောက်စွာစောင့်ကြည့်ရန် ခက်ခဲစေသည် ဟု ဆိုသည်။ ၎င်းတို့သည် EU ၏ သန်း ၄၅၀ ရှိသော စားသုံးသူများ ၏စီးပွားရေးအစွမ်းကို အသုံးပြု၍ နည်းပညာကုမ္ပဏီများအား ခိုင်မာသော အတည်ပြုချက်စနစ်များ အကောင်အထည်ဖော်ရေး ဖိအားပေးရန် ရည်ရွယ်သည်။

ပြင်သစ်သမ္မတ Emmanuel Macron သည် မကြာသေးမီက လူမှု မီဒီယာ ပလက်ဖောင်းများတွင် မှတ်ပုံတင်သည့် ဆယ်ကျော်သက်များ အတွက် အသက်အရွယ်အတည်ပြုချက်ကို မဖြစ်မနေလုပ်ဆောင်ရန် ထောက်ခံကြောင်း အတည်ပြုပြောကြားခဲ့ပြီး အွန်လိုင်းကွန်ရက်များသည် လူငယ်များအကြား ဆိုးကျိုးများနှင့် စိတ်ကျန်းမာရေးပြဿနာများကို ဖြစ်ပေါ်စေကြောင်း ပြောကြားခဲ့သည်။

“မိမိတို့၏ကလေးများကို ကာကွယ်ရမည်” ဟု လူမှုမီဒီယာ ကွန်ရက်များတွင် အသက်အရွယ်အတည်ပြုချက်ကို ပြဋ္ဌာန်းသင့်ကြောင်း TF1 သို့ ပြောကြားရာတွင် ထည့်သွင်းပြောကြားခဲ့သည်။

Bloomberg ၏ ဖော်ပြချက်အရ ဥရောပကော်မရှင်နှင့် အဖွဲ့ဝင်နိုင်ငံ များစွာသည် မိဘများ၏ထိန်းချုပ်မှုနှင့် အသက်အရွယ် အတည်ပြုချက်ကို မြှင့်တင်ရန် စမ်းသပ်စီမံကိန်းများကို စတင်ဖော်ဆောင်နေပြီ ဖြစ်သည်။ သို့သော် ၎င်းတို့၏ကြိုးပမ်းမှုများကို EU နိုင်ငံများအတွင်း စည်းမျဉ်းစည်းကမ်း ကွဲပြားမှုများနှင့် အဖွဲ့ဝင်မဟုတ်သောနိုင်ငံများမှ လူမှုမီဒီယာ ကွန်ရက်များကို အလွယ်တကူသုံးစွဲနိုင်မှုတို့က အဟန့်အတား ဖြစ်စေသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

သမ္မတဒေါ်နယ်ထရမ့်က အမေရိကန်နှင့် အီရန်တို့ နျူကလီးယား သဘောတူညီချက် ရရှိရန် အလွန်နီးကပ်နေပြီဖြစ်ကြောင်း၊ တီဟီရန် ဘက်မှလည်း အချက်အလက်များကို သဘောတူထားကြောင်း ကြာသပတေးနေ့ (မေ ၁၅) တွင် ပြောကြားခဲ့သည်။

“ရေရှည်ငြိမ်းချမ်းရေးအတွက် အီရန်နှင့် အလွန်အရေးကြီးသော ညှိနှိုင်း ဆွေးနွေးမှုများ ပြုလုပ်နေပါသည်” ဟု ပင်လယ်ကွေ့ဒေသ ခရီးစဉ်အတွင်း ထရမ့်၏ ပြောကြားချက်များကို AFP သတင်းဌာန၏ဖော်ပြချက်အရ သိရှိရသည်။

ထရမ့်က “သဘောတူညီချက်တစ်ခုရရှိနိုင်ရေး ဖြေရှင်းဆောင်ရွက်ရန် အဆင့်နှစ်ဆင့်ရှိပြီး ပထမအဆင့်အနေဖြင့် ဆွေးနွေးညှိနှိုင်းခြင်းနှင့် အင်အားသုံးရသည့်ဒုတိယအဆင့်တို့ဖြစ်ကြောင်း၊ သို့သော် ၎င်းအနေဖြင့် ဒုတိယနည်းလမ်းနှင့် မဖြေရှင်းချင်ပါ” ဟု ပြောကြားခဲ့ပါသည်။

အီရန်နှင့် အမေရိကန် နျူကလီးယား သဘောတူညီချက် ဆွေးနွေးပွဲ များနှင့်ပတ်သက်၍ အီရန်ဘက်မှ သတင်းရင်းမြစ်တစ်ဦးက နှစ်နိုင်ငံ အကြား လိုလားချက်များအပေါ် ကွဲလွဲမှုများ ရှိနေသေးကြောင်း ဖွင့်ဟ ခဲ့သည်။ အဆိုပါသတင်းကြောင့် ကြာသပတေးနေ့ (မေ ၁၅) တွင် ရေနံ စျေးများ စျေးတစ်စည်လျှင် ၂ ဒေါ်လာခန့် ကျဆင်းသွားခဲ့သည်။

အီရန်နှင့် အမေရိကန် ကိုယ်စားလှယ်များအကြား တီဟီရန်၏ နျူကလီးယား အစီအစဉ်နှင့်ပတ်သက်၍ အငြင်းပွားမှုများကို ဖြေရှင်းရန် အိုမန်နိုင်ငံတွင် ပြုလုပ်ခဲ့သော ဆွေးနွေးပွဲများသည် တနင်္ဂနွေနေ့ (မေ ၁၁) တွင် ယာယီ အဆုံးသတ်ခဲ့ပြီး နောက်ထပ်ဆွေးနွေးပွဲများ ဆက်လက်ပြုလုပ်ရန် မျှော်မှန်းထားကြောင်း အရာရှိများက ပြောကြားခဲ့သည်။

ထို့အတူ အမေရိကန်အရာရှိတစ်ဦးနှင့် အဆိုပါကိစ္စနှင့်ပတ်သက်၍ တိုက်ရိုက် သိရှိထားသော အခြားသတင်းရင်းမြစ်နှစ်ခုက Axios သတင်း ဌာနအား ထရမ့်အစိုးရမှ တနင်္ဂနွေနေ့က ပြုလုပ်ခဲ့သော စတုတ္ထအကြိမ် မြောက် ဆွေးနွေးပွဲတွင် အီရန်ထံသို့ နျူကလီးယား သဘောတူညီချက် အဆိုပြုလွှာတစ်စောင် ပေးအပ်ခဲ့ကြောင်း ပြောကြားခဲ့သည်။

သို့သော် အီရန်အကြီးတန်းအရာရှိတစ်ဦးက တီဟီရန်သည် ဆယ်စုနှစ်များကြာ ဖြစ်ပွားနေသော နျူကလီးယားအရှုပ်တော်ပုံကို ဖြေရှင်းရန် အမေရိကန်ထံမှ မည်သည့်အဆိုပြုလွှာအသစ်ကိုမျှ မရရှိသေးကြောင်း၊ ၎င်းတို့၏မြေပေါ်တွင် ယူရေနီယမ်ထပ်တိုးသန့်စင်မှု အခွင့်အရေးကိုမည်သည့်အခါမျှ လျှော့ပေါ့မည်မဟုတ်ကြောင်း ဖြည့်စွက်ပြောကြား ခဲ့သည်။

တီဟီရန်နှင့် ဝါရှင်တန်တို့သည် အငြင်းပွားမှုများကို ဖြေရှင်းရန်အတွက် သံတမန်ရေးနည်းလမ်းကို နှစ်နိုင်ငံစလုံးက နှစ်သက်ကြောင်း ပြောကြား ခဲ့သော်လည်း သဘောတူညီချက်အသစ်တစ်ခုရရှိရန်နှင့် အနာဂတ်တွင် စစ်ရေးအရေးယူမှုများကို တားဆီးရန်အတွက် ညှိနှိုင်းဆွေးနွေးသူများအနေဖြင့် ရှောင်ရှားရမည့် အနီရောင်မျဉ်းများစွာတွင် ကွဲလွဲနေဆဲ ဖြစ်သည်။

အီရန်၏ ထိပ်တန်းခေါင်းဆောင် အယ်လီ ခါမေနီ၏ အကြံပေးတစ်ဦးက အီရန်သည် စီးပွားရေးပိတ်ဆို့မှုများ ရုပ်သိမ်းပေးရန်ညှိနှိုင်းမှုဖြင့် အမေရိကန် နှင့် သဘောတူညီချက်တစ်ခုကို ရယူရန် အဆင်သင့်ဖြစ်နေကြောင်း NBC သတင်းဌာနနှင့် ဗုဒ္ဓဟူးနေ့ (မေ ၁၄) က ပြုလုပ်ခဲ့သော တွေ့ဆုံမေးမြန်းမှု တစ်ခုတွင် ပြောကြားခဲ့သည်။

ကိုးကား- Reuters

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဘာလင်၊ ပြည်တွင်းရေး 

ဂျာမနီအစိုးရအနေဖြင့် တပ်မတော် သို့ဝင်ရောက်အမှုထမ်းသူဦးရေ နည်းပါး လာပါက စစ်မှုထမ်းဥပဒေ ကိုပြန်လည် အသက်သွင်းနိုင်ဖွယ်ရှိကြောင်း ဂျာမနီ ကာကွယ်ရေးဝန်ကြီး ဘောရစ်ပစ္စတိုးရီးယပ်က ပြောသည်။ ဂျာမနီနိုင်ငံသည် စစ်မှုထမ်းဥပဒေကို ၂၀၁၁ ခုနှစ်တွင် ဖျက်သိမ်းလိုက်ခြင်းဖြစ် သော်လည်း လက်ရှိ ဖြစ်ပွားလျက်ရှိသော ကမ္ဘာ့နိုင်ငံရေးအခြေအနေများကြောင့် ထိုဥပဒေကိုပြန်လည်ပြဋ္ဌာန်းရန် စဉ်းစား လာခြင်းဖြစ်သည်။ လက်ရှိတွင် မိမိသဘောဆန္ဒအရ စစ်မှုထမ်းလိုသူများအပေါ်တွင်သာ မှီခိုရန် အစိုးရအနေဖြင့် သဘောတူထားသော်လည်း လိုအပ်သည့်စစ်မှုထမ်းအင်အားမရရှိပါက စစ်မှုထမ်းဥပဒေ ကိုပြဋ္ဌာန်းရမည်ဖြစ်ကြောင်း၊ နိုင်ငံအနေဖြင့် ၂၀၃၁ ခုနှစ် အရောက်တွင် တန်းပြည့်စစ်မှုထမ်းအင် အား ၁၈၀၀၀၀ မှ ၂၀၀၀၀၀ အထိရရှိရန် စီစဉ်ထားကြောင်း၊ ယခုပထမသုံးလပတ် တွင် စစ်မှုထမ်းရန်လျှောက်ထားသူ ၂၀ ရာခိုင်နှုန်း မြင့်တက်လာကြောင်း ပစ္စတိုး ရီးယပ်ကပြောထားသည်။ 

Ref: RT

Source: https://myawady.net.mm/

ဟားမက်လက်အောက်ရှိ အရပ်ဘက်ကာကွယ်ရေး အေဂျင်စီက ထုတ်ပြန်သည်မှာ အစ္စရေးတို့၏ တိုက်ခိုက်မှုကြောင့် ဂါဇာမြောက်ပိုင်းတွင် အနည်းဆုံး လူ ၅၀ သေဆုံးခဲ့သည်ဟု ဆိုသည်။

ဂါဇာမြောက်ပိုင်းရှိ ပါလက်စတိုင်းများ၏အဆိုအရ သောကြာနေ့ (မေ ၁၆) နံနက်စောစောပိုင်းတွင် အစ္စရေးတပ်များက ကြည်း/ရေ/လေ ပူးပေါင်း တိုက်ခိုက်မှုကြီး စတင်ခဲ့သည်ဟု သိရပြီး အစ္စရေးစစ်ဘက်မှ ယခုအချိန်ထိ တုံ့ပြန်ပြောဆိုမှု မရှိသေးပေ။

ပထမဦးစွာ မီးခိုးဗုံးများအလုံးအရင်းဖြင့် စတင်ပစ်ခတ်ခဲ့ပြီးနောက် အစ္စရေးစခန်းများမှ အမြောက်များဖြင့် ပြင်းထန်စွာ ပစ်ခတ်တိုက်ခိုက်ခဲ့သည်ဟု ဒေသခံများက ဆိုပါသည်။

ဂါဇာသတင်းထောက် Rushdi Abu Alouf က “အစ္စရေးတပ်များ မတ်လ အစောပိုင်းက စစ်ဆင်ရေးပြန်စတင်ခဲ့သည့်နောက် မြောက်ဂါဇာကို ယခုကဲ့သို့ စနစ်တကျ အကြီးစား မြေပြင်စစ်ဆင်ရေးဆင်နွှဲမှုမျိုး မရှိခဲ့ဖူးပါ” ဟု ပြောကြားခဲ့သည်။

အမေရိကန်နိုင်ငံခြားရေးဝန်ကြီး Marco Rubio က “ဂါဇာရှိ လူသားချင်း စာနာမှုအခြေအနေကို မိမိတို့ စိုးရိမ်မိပါသည်” ဟု ထုတ်ဖော်ပြောဆိုခဲ့သည်။ လွန်ခဲ့သော ၁၀ ပတ်ကြာကပင် အစ္စရေးက အစားအစာ၊ ဆေးဝါးနှင့် အခြားလူမှုရေးအထောက်အပံ့များအား လုံးဝပိတ်ဆို့ထားခြင်းကို ဂါဇာဒေသခံများ ရင်ဆိုင်နေရသည်။

ဟားမက်အစိုးရလက်အောက်ရှိ အရပ်ဘက်ကာကွယ်ရေးအဖွဲ့က အစ္စရေး၏ လေကြောင်းတိုက်ခိုက်မှုများကြောင့် ဂါဇာတွင် လူပေါင်း ၁၂၀ ကျော် သေဆုံးခဲ့ကြောင်း ကြာသပတေးနေ့ (မေ ၁၅) တွင် ထုတ်ပြန် ခဲ့သည်။

ကာတာနိုင်ငံ၌ အစ္စရေးနှင့် ဟားမက်တို့အကြား စစ်ရပ်စဲရေးနှင့် အကျဉ်းသားလဲလှယ်ရေး သွယ်ဝိုက်ဆွေးနွေးမှုများ ဆက်လက်ရှိနေသော်လည်း လက်ရှိအချိန်ထိ ပြေလည်မှုရရှိရန် လမ်းကြောင်းမပေါ် သေးပေ။

ကိုးကား- BBC

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားသမ္မတ ဗလာဒီမာ ပူတင်သည် ၂၀၂၁-၂၀၂၅ ခုနှစ်အတွက် ရုရှား၏ ကာကွယ်ရေးအစီအစဉ်ကို နှစ်နှစ်တိုးရန် အမိန့်ညွှန်ကြားချက်တစ်ရပ်ကို မေလ ၁၅ ရက်တွင် လက်မှတ်ရေးထိုးထုတ်ပြန်လိုက်ပါသည်။ 

“၂၀၂၁-၂၀၂၅” ဟူသော စကားလုံးကို “၂၀၂၁-၂၀၂၇” ဟု အစားထိုးရမည်ဟု အမိန့်တွင် ဖော်ပြထားပါသည်။ အဆိုပါ ၂၀၂၁-၂၀၂၅ ခုနှစ် အတွက် ကာကွယ်ရေးအစီအစဉ်ကို ၂၀၂၀ ပြည့်နှစ်၊ နိုဝင်ဘာလ ၁၂ ရက်နေ့တွင် စတင်ခဲ့ပါသည်။ 

ရုရှား၏ ပထမဆုံးသော ကာကွယ်ရေးအစီအစဉ်ကို ၂၀၁၃ ခုနှစ် ဇန်နဝါရီလတွင် အတည်ပြုခဲ့ပါသည်။ ယင်းအစီအစဉ်တွင် နိုင်ငံ၏ လုံခြုံရေးဆိုင်ရာ ဖြစ်နိုင်ခြေရှိသော အန္တရာယ်များနှင့် ခြိမ်းခြောက်မှု များကို ဖော်ပြထားပြီး တပ်မတော်ဖွံ့ဖြိုးရေး၊ လက်နက်ကိရိယာပရိုဂရမ်များ အကောင်အထည်ဖော်ခြင်းနှင့် စစ်ရေးအရ ပြင်ဆင်မှုများနှင့် နယ်မြေကာကွယ်ရေးတို့ကဲ့သို့သော အခြေခံကျသည့် နယ်ပယ်များတွင် ညှိနှိုင်းဆောင်ရွက်ရမည့်ကိစ္စရပ်များကို ဖော်ပြထားပါသည်။

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃