အမေရိကန်သမ္မတ ဒေါ်နယ်ထရမ့်က အယ်လ်ကတ်ရာဇ်ကျွန်းအား အဆင့်မြင့်လုံခြုံရေးဖက်ဒရယ်ထောင်အဖြစ် ပြန်လည်အသက်သွင်းရန် အစီအစဉ်ရှိကြောင်း ထုတ်ဖော်ပြောကြားခဲ့သည်။

၎င်း၏ နယ်နိမိတ်ဖြတ်ကျော်ပြစ်မှုကျူးလွန်သူများအား နိုင်ငံမှ ထုတ်ပယ်ရေး လုပ်ငန်းစဉ်များ တရားရုံးများ၏ ကန့်ကွက်မှုနှင့် ရင်ဆိုင်နေရချိန်တွင် “လူ့အဖွဲ့အစည်း၏ အညစ်အကြေးများ” အတွက် နေရာလိုအပ်နေကြောင်း ထရမ့်က တနင်္ဂနွေနေ့ (မေ ၄) က လူမှုကွန်ရက်ပိုစ့်တွင် ရေးသား ခဲ့သည်။

ဆန်ဖရန်စစ္စကိုကမ်းလွန်ရှိ စစ်ခံတပ်အဖြစ် စတင်တည်ဆောက်ခဲ့သော အယ်လ်ကတ်ရာဇ်သည် နှစ် ၃၀ နီးပါး အကျဉ်းထောင်အဖြစ် အသုံးပြုခဲ့ပြီး လွန်ခဲ့သည့် ဆယ်စုနှစ် ၆ ခုကပိတ်သိမ်းကာ နောက်ပိုင်းတွင် ခရီးသွားများ လာရောက်လည်ပတ်သည့် နေရာတစ်ခုဖြစ်လာခဲ့သည်။

ထရမ့်က “အမေရိကန်၏ အကြမ်းဖက်အစွန်းရောက်ဆုံး ပြစ်မှုကျူးလွန်သူများအား ချုပ်နှောင်ထားရန်” အယ်လ်ကတ်ရာဇ်အား အကြီးစား ပြန်လည် တည်ဆောက်ကာ ပြန်ဖွင့်ရန် တရားရေးဌာနအား ညွှန်ကြားထားကြောင်း ပြောကြားခဲ့သည်။

“တရားသူကြီးများက လုပ်သင့်သည်ကို မလုပ်ဘဲ ကန့်ကွက်နေသည့် ရာဇဝတ်သားများ၊ အန္တရာယ်ရှိသူများကို အညံ့ခံနေရသည့် ကာလကို မိမိတို့ အဆုံးသတ်မည်။ တရားဥပဒေ၊ ငြိမ်ဝပ်ပိပြားမှုနှင့် မျှတမှု၏ သင်္ကေတအဖြစ် ထိုထောင်ကို ပြန်ဖွင့်မည်” ဟု ၎င်းက ကြေညာခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနိုင်ငံ မြို့တော် ရင်ပြင်နီတွင် စစ်ရေးပြချီတက်ပွဲပြုလုပ်ရန် နိုင်ငံရပ်ခြား ခေါင်းဆောင်များ မစုဝေးကြမီ ရက်ပိုင်းအလိုတွင် မော်စကိုမြို့သို့ ဦးတည်သွားနေသည့် ဒရုန်း ၄ စင်းကို ကာကွယ်ရေး တပ်ဖွဲ့ဝင်များက ပစ်ချခဲ့ကြောင်း တနင်္လာနေ့ (မေ ၅) တွင် ပြောကြားခဲ့သည်။

ပိုဒိုလ်စခ် ခရိုင်ရှိ ကာကွယ်ရေးတပ်ဖွဲ့များသည် မော်စကိုမြို့သို့ ဦးတည်ပျံသန်းနေသည့် ဒရုန်းလေးစင်း၏တိုက်ခိုက်မှုကို တုံ့ပြန်နိုင်ခဲ့ကြောင်း မော်စကိုမြို့တော်ဝန် ဆာဂျီဆိုဘီယန်နင်က တယ်လီဂရမ်တွင် ရေးသား ဖော်ပြခဲ့သည်။

ပေါက်ကွဲမှုဖြစ်ပွားသည့်နေရာ၌ ပျက်စီးမှု သို့မဟုတ် အသေအပျောက်များမရှိကြောင်း ကနဦးသတင်းထုတ်ပြန်ချက်တွင် ဆိုဘီယန်က ပြောကြားပြီး အရေးပေါ် ဝန်ဆောင်မှု ကျွမ်းကျင်သူများသည် အခင်းဖြစ်ပွားရာနေရာ၌ လုပ်ဆောင်နေကြောင်း ထပ်လောင်းပြောကြားခဲ့သည်။

ရုရှားပိုင်နက်ကို ပစ်မှတ်ထားသော ယူကရိန်း မောင်းသူမဲ့ ဒရုန်း စုစုပေါင်း ၂၆ စင်း သည် ညတွင်းချင်း ပျက်စီးသွားကြောင်း ရုရှား ကာကွယ်ရေးဝန်ကြီး ဌာနက တနင်္လာနေ့ (မေ ၅) မှာ ပြောကြားခဲ့ပါသည်။

မော်စကိုသို့ ချဉ်းကပ်လာသော ဒရုန်းများကို ပစ်ချခြင်းအပြင် ဗရီအန်စ် ဒေသတွင် ဒရုန်း ၁၇ စင်းနှင့် ကာလုဂါ ဒေသတွင်ဒရုန်း ၅ စင်းကို ဖျက်ဆီးနိုင်ခဲ့ကြောင်း ဝန်ကြီးဌာနက တယ်လီဂရမ်တွင် ရေးသားဖော်ပြထားသည်။

အရှေ့မြောက်ဘက်တွင် မော်စကိုဒေသနှင့် နယ်နိမိတ်ချင်း ထိစပ်နေသည့် ကာလုဂါဒေသ၏ အုပ်ချုပ်ရေးမှူးများနှင့် ယူကရိန်းနယ်စပ်ရှိ ဗရီအန်စ် ဒေသတွင် ထိခိုက်ဒဏ်ရာရမှု သို့မဟုတ် ပျက်စီးမှုမရှိကြောင်း လူမှု မီဒီယာတွင် ပြောကြားခဲ့သည်။ ရုရှားနိုင်ငံသည် ရင်ပြင်နီတွင် စစ်ရေးပြ ချီတက်ပွဲနှင့် ဒုတိယကမ္ဘာစစ် နှစ်ပတ်လည်နေ့ အထိမ်းအမှတ်အဖြစ် မေလ ၉ ရက်နေ့တွင် သမ္မတ ဗလာဒီမာပူတင်က မိန့်ခွန်းပြောကြားမည် ဖြစ်ပါသည်။

တရုတ်သမ္မတ ရှီကျင့်ဖျင် နှင့် ဘရာဇီးသမ္မတ လူအီဇ် အင်ဆီယို လူလာ ဒါ စီဗလား တို့ တက်ရောက်မည်ဖြစ်ပြီး နိုင်ငံရပ်ခြားမှခေါင်းဆောင်များ ပါဝင်တက်ရောက်မည်ဖြစ်သည်။ ယူကရိန်းပဋိပက္ခ၌ မော်စကိုနှင့် ယူကရိန်းတို့၏ တိုက်ခိုက်မှုများကြောင့် ယူကရိန်းနှင့် ရုရှားနိုင်ငံမြို့တော် မော်စကို ရှိ လူနေမှုအခြေအနေများမှာ တဖြည်းဖြည်း ဆိုးရွားလာ‌နေသည်။ ယူကရိန်းသည် ယခင်က မော်စကိုကို ပစ်မှတ်ထားခဲ့သော်လည်း ပြင်းထန်စွာ ‌သေစေနိုင်သော တိုက်ခိုက်မှုများမှာ ရှားပါသည်။

မြို့တော်တဝိုက်တွင် ဒရုန်း ၉၁ စင်း အပါအဝင် နိုင်ငံတစ်ဝန်း “ကြီးမားသော” တိုက်ခိုက်မှုတွင် ဒရုန်း ၃၃၇ စင်းကို ပစ်ချခဲ့ကြောင်း ရုရှား ကာကွယ်ရေးဝန်ကြီးဌာနက မတ်လတွင် ပြောကြားခဲ့သည်။

ကိုးကား- မော်စကိုမြို့တော်ဝန်၏တယ်လီဂရမ်စာမျက်နှာ

အီရန်နိုင်ငံသည် ကီလိုမီတာ ၁၂၀၀ အထိ ရောက်ရှိနိုင်သော ဒုံးကျည် အသစ်တစ်မျိုးကို အောင်မြင်စွာ စမ်းသပ်ပစ်လွှတ်နိုင်ခဲ့ကြောင်း ကာကွယ်ရေးဝန်ကြီး Aziz Nasirzadeh က IRIB ရုပ်မြင်သံကြားလိုင်းမှ ပြောကြား ခဲ့သည်။

၎င်း၏ပြောကြားချက်အရ ယခုဒုံးကျည် သည် ကီလိုမီတာ ၁၂၀၀ ကျော် အကွာအဝေးမှ ပစ်လွှတ်နိုင်ပြီး ပစ်မှတ်များကို တိကျစွာ ထောက်လှမ်းနိုင်ကာ အနှောင့်အယှက်များကိုလည်း တန်ပြန်ကျော်လွှားနိုင်စွမ်း ရှိကြောင်း သိရပါသည်။

Nasirzadeh က အီရန်နိုင်ငံတွင် ဒုံးကျည် အရေအတွက် များစွာ သိုလှောင်ထားပါကြောင်း၊ မည်သူမဆို ကျူးကျော်လာပါက ချက်ချင်း တုံ့ပြန်နိုင်ရေးအသုံးပြုရန် အဆင်သင့်ဖြစ်ကြောင်း အတိအလင်း ပြောကြားထားပါသည်။

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဂျေရုဆလင်၊ အကြမ်းဖက်မှု

ယီမင်နိုင်ငံရှိ   ဟူသီသူပုန်အဖွဲ့သည် မေလ ၄ ရက် နံနက်ပိုင်းတွင် အစ္စရေးနိုင်ငံ တဲအဗစ်မြို့ရှိ အဓိကလေဆိပ်တစ်ခုဖြစ်သည့် ဘင်ဂူရီးယန်းလေဆိပ်အား ဒုံးကျည်တစ်စင်းဖြင့် ပစ်ခတ်တိုက်ခိုက်ခဲ့ကြောင်းသိရသည်။

သူပုန်အဖွဲ့က ပစ်ခတ်လိုက်သည့် ဒုံးကျည်သည် လေဆိပ်အတွင်းရှိ သစ်ပင်အုပ်အတွင်းသို့ ကျရောက်ပေါက်ကွဲခဲ့ပြီး   အနည်းဆုံး လူ ၆ ဦးဒဏ်ရာရရှိသွားကြောင်း မီဒီယာများက ဖော်ပြသည်။

အဆိုပါဒုံးကျည်ပစ်ခတ်မှုကို ကြားဖြတ်ဟန့်တားရန် အကြိမ်ကြိမ်ကြိုးပမ်းခဲ့သော်လည်း အောင်မြင်မှုမရှိကြောင်း အစ္စရေးတပ်မတော်ကအတည်ပြုထားသည်။ နိုင်ငံ၏ပိုင်နက်အတွင်းသို့ ဝင်ရောက်လာသည့် အဆိုပါဒုံးကျည်အား ဟန့်တားရန်ပျက်ကွက်ခြင်းအပေါ်အစ္စရေးလေတပ်မတော်က စုံစမ်းဖော်ထုတ်လျက်ရှိကြောင်း သိရသည်။

ဟူသီသူပုန်အဖွဲ့သည်ယီမင်နိုင်ငံမြို့တော်နှင့် ဟိုဒေးဒါဆိပ်ကမ်းအပါအဝင် နိုင်ငံအနောက်ပိုင်းကို ထိန်းချုပ်ထားပြီး ပင်လယ်နီအတွင်းမှ ဖြတ်သန်းမောင်းနှင်သွားသည့်    ကုန်တင်သင်္ဘောများအား ဒရုန်းများ၊ ဒုံးကျည်များဖြင့်တိုက်ခိုက်လျက်ရှိပြီး အစ္စရေးနိုင်ငံအတွင်းသို့လည်း တိုက်ခိုက်မှုများလုပ်ဆောင်လျက်ရှိသည်။

အဆိုပါတိုက်ခိုက်မှုများကို တုံ့ပြန်သည့်အနေဖြင့် အစ္စရေးတပ်မတော်က ဟူသီသူပုန်အဖွဲ့၏ ပစ်မှတ်များအပေါ် လေကြောင်းမှတိုက်ခိုက်မှုများလုပ်ဆောင်လျက်ရှိကြောင်းသိရသည်။

Ref: RT

Source: https://myawady.net.mm/

မက္ကဆီကိုသမ္မတ ကလော်ဒီယာ ရှိန်ဘမ်းသည် မူးယစ်ဂိုဏ်းများကို တိုက်ဖျက်ရန်အတွက် အမေရိကန်တပ်များ မက္ကဆီကိုနယ်မြေ၌ ချထားရန် အမေရိကန်သမ္မတ ဒေါ်နယ်ထရမ့်၏ ကမ်းလှမ်းချက်ကို ပယ်ချခဲ့ပါသည်။ မက္ကဆီကိုအနေဖြင့် မူးယစ်ဆေးဝါး တိုက်ဖျက်ရေးကိစ္စတွင် အမေရိကန် နှင့် ပူပေါင်းဆောင်ရွက်လိုသော်လည်း ငယ်သားတစ်ယောက်ကဲ့သို့ ဆက်ဆံခြင်းကိုမူ လက်ခံမည် မဟုတ်ကြောင်း သူမက ပြောသွားပါသည်။ 

မက္ကဆီကိုနိုင်ငံအတွင်း အမေရိကန်၏ စစ်ရေးစစ်ဆင်ရေးများကို ခွင့်ပြုရန် ထရမ့်မှ ဖိအားပေးခဲ့သည်ဟု စနေနေ့ (မေ ၃) က Wall Street Journal တွင် ဖော်ပြခဲ့ပြီးနောက် အထက်ပါပြောစကား ထွက်ပေါ်လာခြင်း ဖြစ်ပါသည်။ ဖန်းတနီလ်မှောင်ခိုဂိုဏ်းများကို တိုက်ဖျက်ရန်အတွက် တပ်ဖွဲ့ဝင်များ ချထားရန် ထရမ့်က တွန်းအားပေးခဲ့ပြီး ထရမ့်၏ စိတ်ကူးကို ရှိန်ဘမ်းက ငြင်းဆိုခဲ့ကြောင်း သိရှိရပါသည်။

မေလ ၃ ရက် (စနေနေ့) တက္ကသိုလ်ဖွင့်ပွဲတစ်ခုတွင် ရှိန်ဘမ်းက “မှန်ပါတယ်... ထရမ့်က အမေရိကန်စစ်တပ်ကို မက္ကဆီကိုက အကူညီပေးရန် ဆိုပြီးအဆိုပြုသော်လည်း မိမိတို့၏ အချုပ်အခြာအာဏာက ရောင်းရန် မဟုတ်ပါ” ဟု သူမက ပြောပါသည်။

“ထရမ့်အနေနှင့် မက္ကဆီကိုအား ကူညီလိုပါက အမေရိကန်မှ မက္ကဆီကို သို့ လက်နက်များ စီးဆင်းမှုကို ရပ်တန့်ရန် အာရုံစိုက်သင့်သည်” ဟု သူမ က ဆက်ပြောပါသည်။ ရှိန်ဘမ်းနှင့် ထရမ့်တို့က “သမိုင်းတွင် အလုံခြုံဆုံး အနောက်တောင်နယ်စပ်ကိုရရှိရန်” နီးနီးကပ်ကပ် လုပ်ဆောင်ခဲ့ကြသည်ဟု အိမ်ဖြူတော်မှ စနေနေ့က ကြေညာချက်တွင် ဖော်ပြသော်လည်း တပ်ဖွဲ့ဝင်များ၏ ကမ်းလှမ်းမှုကို ထုတ်ဖော်ပြောဆိုခြင်း မရှိပေ။

“မှောင်ခိုဂိုဏ်းများနှင့် မူးယစ်ဂိုဏ်းများကို တိုက်ဖျက်ရန် မက္ကဆီကိုက ပိုလုပ်ဆောင်ရမည်ဟု သမ္မတက ရှင်းရှင်းလင်းလင်း ပြောထားပြီး ဖြစ်ကြောင်း၊ အမေရိကန်အနေဖြင့် နှစ်နိုင်ငံကြား ရင်းနှီးပြီးဖြစ်သော ပူးပေါင်းဆောင်ရွက်မှုကို တိုးချဲ့နိုင်ရေး ကူညီပေးရန် အသင့်ရှိပါသည်” ဟု ထုတ်ပြန်ချက်တွင် ဖော်ပြထားသည်။

ကိုးကား-Myanmar National Post

အစ္စလာမ္မစ် ပူးပေါင်းဆောင်ရွက်ရေးအဖွဲ့ (OIC) သည် တောင်အာရှဒေသရှိ လုံခြုံရေးအခြေအနေ ဆိုးရွားလာခြင်းအတွက် ပြင်းထန်စွာ စိုးရိမ်လျက်ရှိကြောင်း ထုတ်ဖော်ပြောကြားခဲ့ပြီး အိန္ဒိယ၏ ပါကစ္စတန်အပေါ် အကြောင်းမဲ့စွပ်စွဲချက်များသည် ပျက်ယွင်းနေသော ဒေသတွင်းအခြေအနေကို ပိုမိုတင်းမာစေကြောင် သတိပေးခဲ့ပါသည်။

နယူးယောက်မြို့ရှိ ကုလသမဂ္ဂဌာနချုပ်တွင် OIC အဖွဲ့က ထုတ်ပြန်သော ပူးတွဲကြေညာချက်တွင် အဖွဲ့ဝင်နိုင်ငံများသည် မကြာသေးမီက ဖြစ်ပေါ် တိုးတက်မှုများကို ပြင်းထန်စွာ ဝေဖန်ရှုတ်ချပြီး သက်ဆိုင်သူအားလုံးကို အတတ်နိုင်ဆုံး ထိန်းထိန်းသိမ်းသိမ်း ဆောင်ရွက်ရန် တိုက်တွန်းခဲ့ပါသည်။

OIC အဖွဲ့သည် အိန္ဒိယ၏ ရန်လိုသော စကားလုံးများနှင့် ပါကစ္စတန်အပေါ် အခြေအမြစ်မရှိသော စွပ်စွဲချက်များသည် တောင်အာရှဒေသတွင် မတည်ငြိမ်မှုများကို တိုးပွားလာစေကြောင်း ထောက်ပြခဲ့ပါသည်။

OIC အဖွဲ့သည် ၎င်း၏ မူဝါဒအရ ခိုင်မာသောရပ်တည်ချက်ကို အတည်ပြုပြီး အကြမ်းဖက်သမား မည်သူဖြစ်ပါစေ အကြမ်းဖက်မှုအားလုံးကို ရှုတ်ချ ကြောင်း ပြောကြားခဲ့သည်။ သို့သော် အကြမ်းဖက်ဝါဒကို သီးခြားနိုင်ငံ၊ ဘာသာရေး၊ လူမျိုးရေး သို့မဟုတ် ယဉ်ကျေးမှုတစ်ခုခုနှင့် ဆက်စပ်ရန် ကြိုးပမ်းမှုများကို ပြင်းပြင်းထန်ထန် ကန့်ကွက်ကြောင်းလည်း ပြောကြားခဲ့ပါသည်။

“OIC သည် မည်သည့်နေရာတွင်ဖြစ်စေ၊ မည်သည့်ပုံစံဖြင့်ဖြစ်စေ အကြမ်းဖက်ဝါဒကို ရှုတ်ချပါသည်။ သို့သော် အကြမ်းဖက်ဝါဒကို သီးခြားနိုင်ငံ သို့မဟုတ် လူ့အဖွဲ့အစည်းတစ်ခုခုနှင့် ဆက်စပ်ရန် ကြိုးပမ်းမှုအားလုံးကို ပယ်ချသည်” ဟု ကြေညာချက်တွင် ဖော်ပြထားပါသည်။

OIC အဖွဲ့သည် ဂျမူးနှင့် ကက်ရှ်မီးယားအငြင်းပွားမှုနှင့်ပတ်သက်၍ ကုလသမဂ္ဂ လုံခြုံရေးကောင်စီ၏ ကြာရှည်စွာရှိနေသော ဆုံးဖြတ်ချက်များကို တစ်ဖန်ပြန်လည် ထောက်ပြခဲ့ပြီး ယင်းအငြင်းပွားမှုကို ဒေသတွင်းငြိမ်းချမ်းရေးနှင့် တည်ငြိမ်ရေးကို ခြိမ်းခြောက်နေသည့် အဓိကပြဿနာအဖြစ် ဖော်ပြခဲ့ပါသည်။

“ဂျမူးနှင့် ကက်ရှ်မီးယား ပြဿနာသည် တောင်အာရှ ငြိမ်းချမ်းရေးအတွက် အခြေခံကျသော အဟန့်အတားဖြစ်နေဆဲဖြစ်ပါသည်။ ဂျမူးနှင့် ကက်ရှ်မီးယား ပြည်သူများသည် ၎င်းတို့၏မိမိကိုယ်ကိုဆုံးဖြတ်ပိုင်ခွင့်ကို ငြင်းပယ်ခံနေရဆဲဖြစ်သည်” ဟု ကြေညာချက်တွင် ဖော်ပြထားပါသည်။ ပူးတွဲကြေညာချက်တွင် စိန်ခေါ်မှုများကို ရင်ဆိုင်ရာတွင် ပါကစ္စတန်၏ သည်းခံဆက်ဆံမှုနှင့် ငြိမ်းချမ်းစွာပဋိပက္ခဖြေရှင်းရေးအတွက် ကတိကဝတ်ကို ချီးကျူးဂုဏ်ပြုခဲ့ပါသည်။ “OIC သည် ပါကစ္စတန်၏ ရင့်ကျက်သော ချဉ်းကပ်မှုနှင့် ထိပ်တိုက်တွေ့ဆုံလိုခြင်းမရှိ ဟူသော ၎င်း၏ တစ်သမတ်တည်းသော သတင်းစကားကို အသိအမှတ်ပြုပြီး ချီးကျူးထိုက်သည်ဟု သတ်မှတ်ပါသည်” ဟု အဖွဲ့က ပြောကြားခဲ့ပါသည်။

OIC သည် အပြည်ပြည်ဆိုင်ရာအသိုင်းအဝိုင်း၊ အထူးသဖြင့် ကုလသမဂ္ဂ လုံခြုံရေးကောင်စီနှင့် ဩဇာကြီးမားသောနိုင်ငံများသည် အခြေအနေကို လျှော့ချရန်အတွက် ချက်ချင်းနှင့် ယုံကြည်စိတ်ချရသော အစီအမံများ ချမှတ်ရန်အတွက် တိုက်တွန်းခဲ့ပါသည်။ ပါကစ္စတန်နှင့်အိန္ဒိယအကြား ဆက်လက်၍ ဆက်ဆံရေး ယိုယွင်းလာမှုကို တားဆီးရန်နှင့် သဘောထားညှိနှိုင်းမှုကို မြှင့်တင်ရန်အတွက် သံတမန်နည်းလမ်းဖြင့် အားထုတ်မှုပြုရန် ပြောကြားခဲ့ပါသည်။

ကိုးကား - samaa

Textron System Corporation က အမေရိကန်ကြည်းတပ်အတွက် XM204 ဆိုတဲ့ လေပေါ်ကွဲမိုင်းအသစ်များကိုထုတ်လုပ်ပေးလိုက်ပါပြီ။ မကြာသေးမီက အဲဒီမိုင်းတွေကို လက်တွေ့စမ်းသပ်မှုအောင်မြင်စွာလုပ်ဆောင်ပြီး‌နောက် အခုလိုမျိုး ထုတ်လုပ်ခွင့်ရရှိလာတာဖြစ်ပါတယ်။

XM204 ဆိုတဲ့မိုင်းမျိုးက အဓိကအားဖြင့် တင့်ဖျက်မိုင်း သဘောမျိုးအသုံးဝင်မယ့်မိုင်းဖြစ်ပါတယ်။ တင့်ဖျက်မိုင်းဖြစ်ပေမယ့် မြေထဲမှာမြှုပ်ထားခြင်းအားဖြင့် တင့်များရဲ့ချိန်းကြိုးကိုပျက်စီးစေမယ့် မိုင်းမျိုးမဟုတ်ပါဘူး။ တင့်ရဲ့အရေးပါတဲ့  ဆုံလည်လိုနေရာမျိုးကိုတိကျမှုရှိစွာထိမှန်စေမယ့်မိုင်းမျိုးဖြစ်ပါတယ်။

ဒါ့အပြင်သူ့ရဲ့ထူးခြားချက်နောက်တစ်ခုက  XM204 ဟာ ပစ်မှတ်တွေကိုဖျက်ဆီးရုံသာမက ရန်သူရဲ့လှုပ်ရှားမှုကိုပါ ထိန်းချုပ်နိုင်စွမ်းရှိစေမယ့် မိုင်းအမျိုးအစားတစ်မျိုးဖြစ်ပါတယ်။ အထူးသဖြင့် ရန်သူတွေအနေနဲ့ လမ်းကြောင်းပေါ်ကနေဖြတ်သန်းမလာအောင်၊ တောင်တန်းတွေကနေပတ်ပြီးမသွားအောင်၊ ပြောရမယ်ဆိုရင် သတ်ကွင်းထဲကနေသာသွားရအောင် စွမ်းဆောင်ပေးနိုင်မယ့် လက်နက်တစ်မျိုးဖြစ်တာကြောင့် တိုက်ပွဲအလှည့်အပြောင်းဖြစ်စေမှာဖြစ်ပါတယ်။

Ref: IE K.H

Source: https://myawady.net.mm/

အစ္စရေးအစိုးရသည် ဂါဇာကမ်းမြောင်ဒေသ၌ ပြုလုပ်နေသည့် စစ်ဆင်ရေးကို တိုးချဲ့မည့် အစီအစဉ်ကို အတည်ပြုရန် ရှိကြောင်းသိရှိရသည်။

အစ္စရေး၏ ထိုးစစ်ဆက်လက်လုပ်ဆောင်နေပြီး လွန်ခဲ့သော ၄၈ နာရီ အတွင်း လူ ၇၇ ဦး သေဆုံးခဲ့သည်ဟု ဂါဇာကျန်းမာရေးအရာရှိများကစနေနေ့ (မေ ၃) တွင် ထုတ်ပြန်ခဲ့ပြီး ၂၀၂၃ ခုနှစ်၊ အောက်တိုဘာလ နောက်ပိုင်း ဂါဇာ၌ သေဆုံးသူဦးရေ ၅၂,၄၉၅ ဦး ရှိပြီဖြစ်ပါသည်။

စနေနေ့ နံနက်အရုဏ်မတက်မီ အစ္စရေးက ဂါဇာတောင်ပိုင်း Khan Younis မြို့ကို တိုက်ခိုက်ခဲ့ပါသည်။ ဆေးရုံတစ်ခု၌ NHK က ရိုက်ကူးထားသည့် ဗီဒီယိုထဲတွင် ဦးခေါင်းမှ သွေးထွက်နေသော မိန်းကလေးတစ်ဦး အပါအဝင် ဒဏ်ရာရရှိသူများကို လက်ခံနေသည့် ပုံများကို တွေ့ရပြီး အဆိုပါမိန်းကလေး သေဆုံးခဲ့ခြင်းကို အတည်ပြုခဲ့ကြောင်း ဆေးရုံအရာရှိ က NHK ကို ပြောခဲ့သည်။

တနင်္ဂနွေနေ့ (မေ ၄) တွင် ပြုလုပ်မည့် အစည်းအဝေး၌ အစ္စရေးအစိုးရအဖွဲ့သည် ဂါဇာကမ်းမြောင်ဒေသရှိ ဟားမက်အပေါ် ဖိအားပိုပေးရေး ထိုးစစ်ကို တိုးချဲ့လုပ်ဆောင်ရန်အတွက် လက်မှတ်ရေးထိုးဖွယ်ရှိသည်ဟု ဒေသတွင်းမီဒီယာများက ဖော်ပြခဲ့ပါသည်။

အစ္စရေးတပ်ဖွဲ့များသည် ဂါဇာဒေသသို့ လူသားချင်းစာနာ ထောက်ထားမှုဆိုင်ရာ ထောက်ပံ့ရေးပစ္စည်းများ ပို့ဆောင်ခြင်းကို မတ်လကတည်းက ပိတ်ပင်တားမြစ်ခဲ့ပါသည်။ တိုက်ခိုက်မှုများ မတိုင်မီ အစ္စရေးစစ်တပ်က တိမ်းရှောင်ရွှေ့ပြောင်းရေးအမိန့် ထုတ်ပြန်ပြီးသည့်အနေအထားတွင် ပါလက်စတိုင်းပြည်သူများသည် ဂါဇာဒေသ၏ သုံးပုံတစ်ပုံလောက်၌သာ နေထိုင်နိုင်တော့သည်ဟု ကုလသမဂ္ဂက ပြောပါသည်။

အစ္စရေး၏ ထိုးစစ်တိုးချဲ့မှုကြောင့် မြေပြင်တွင် လူသားချင်းစာနာ ထောက်ထားမှုဆိုင်ရာ အခြေအနေများ ပိုမိုဆိုးရွားလာပြီး သေဆုံးသူအရေအတွက် တိုးလာနိုင်သည့်အပေါ် စိုးရိမ်မှုများ ရှိနေပါသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်းခေါင်းဆောင် ဗလာဒီမာ ဇီလန်စကီး က မေလ ၉ ရက်တွင် ကျင်းပမည့် ရုရှား၏ စစ်ရေးအောင်ပွဲအထိမ်းအမှတ် တက်ရောက်လာမည့် နိုင်ငံတကာခေါင်းဆောင်များ၏ လုံခြုံရေးကို ခြိမ်းခြောက်ခဲ့ပြီးနောက် မော်စကိုက ပြင်းထန်စွာ ပြန်လည်ဝေဖန်ခဲ့သည်။

ရုရှားနိုင်ငံခြားရေးဝန်ကြီးဌာနက “ကိယက်ဗ် ခေါင်းဆောင်၏ ခြိမ်းခြောက်မှုသည် လူမဆန်သော စစ်ရေးလှုံ့ဆော်မှုများကို အားပေးနေ” ဟု ပြောကြား ခဲ့သည်။

“အောင်ပွဲနေ့သည် နာဇီဝါဒကို အနိုင်ယူခဲ့သည့် ရုရှားပြည်သူများ၏ဂုဏ်ယူစရာအချိန်ဖြစ်ပြီး၊ ယူကရိန်း၏ ခြိမ်းခြောက်မှုများသည် သမိုင်းကို စော်ကားခြင်းဖြစ်သည်” ဟု ရုရှားအစိုးရက ထုတ်ဖော်ပြောဆို ခဲ့သည်။

ရုရှားကာကွယ်ရေးဝန်ကြီး Sergei Shoigu က “ယူကရိန်းနှင့် ၎င်း၏ နောက်လိုက်နိုင်ငံများ၏ မည်သည့်ပစ်မှတ်ထားတိုက်ခိုက်မှုကိုမဆို ပြင်းထန်စွာ တုံ့ပြန်မည်” ဟု သတိပေးခဲ့သည်။

မော်စကိုသည် မေလ ၉ ရက်တွင် အထူးလုံခြုံရေးအစီအမံများ တိုးမြှင့် ထားပြီး၊ အောင်ပွဲနေ့ခရီးစဉ်များကို အန္တရာယ်ကင်းစေရန် မြေပြင်နှင့် လေကြောင်းကာကွယ်ရေးစနစ်များကို တိုးမြှင့်ပြင်ဆင်မှုများ ပြုလုပ်ထားသည်။

ရုရှားသမ္မတ ဗလာဒီမာ ပူတင်က “ယူကရိန်းသည် အနောက်နိုင်ငံများ၏ စစ်ရေးလက်နက်များနှင့် လှုံ့ဆော်မှုများဖြင့် ရုရှားကို ဆက်လက် တိုက်ခိုက်နေ” ဟု ပြောကြားခဲ့သည်။

“အနောက်တိုင်းသည် ဇီလန်စကီးအစိုးရကို စစ်ရေးအရ ထောက်ပံ့ကာ ရုရှားနှင့် ဥရောပတိုက်တစ်ခွင်လုံးကို မတည်ငြိမ်စေရန် လုပ်ဆောင်နေ” ဟု ၎င်းက စွပ်စွဲခဲ့သည်။

ဇီလန်စကီးက “ရုရှား၏ အောင်ပွဲနေ့သည် ယခုအခါ စစ်ရာဇဝတ်မှုများ နှင့် လူမဆန်သော ရက်စက်မှုများကို ဂုဏ်ပြုသည့်နေ့ဖြစ်နေ” ဟု စွပ်စွဲခဲ့ပြီး၊ “ယူကရိန်းသည် ရုရှား၏စစ်ရေးပစ်မှတ်များကို ဖျက်ဆီးမည်” ဟု ပြောကြားခဲ့သည်။

ယူကရိန်းတပ်များသည် ယခုရက်ပိုင်းအတွင်း ရုရှား၏ နယ်စပ်ဒေသများ နှင့် ရေနံချက်စက်ရုံများကို ဒရုန်းတိုက်ခိုက်မှုများ ပြုလုပ်ခဲ့သည်။

ရုရှား၏ အောင်ပွဲနေ့ (နာဇီဂျာမနီကို အနိုင်ရခဲ့သည့် ဒုတိယကမ္ဘာစစ် အဆုံးသတ်ခြင်း) သည် ရုရှားနိုင်ငံတော်၏ အထွတ်အမြတ်နေ့ဖြစ်ပြီး၊ ဇီလန်စကီး၏ ခြိမ်းခြောက်မှုများသည် မော်စကို၏ အမျက်ဒေါသကို ပိုမို မြင့်တက်စေခဲ့သည်။

အဆိုပါအခြေအနေသည် စစ်ရေးတင်းမာမှုများ ပိုမိုဆိုးရွားလာနိုင်သည့် အလားအလာရှိပြီး နိုင်ငံတကာက စောင့်ကြည့်နေရသည့် အရေးပါသော အချိန်ကာလတစ်ခုဖြစ်သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

မော်စကို၊ စစ်ရေး

ရုရှားနိုင်ငံ၏ လေကြောင်းရန်ကာကွယ်ရေးတပ်ဖွဲ့က ပင်လယ်နက်ဒေသအတွင်း အနောက်အုပ်စုက ယူကရိန်းသို့ထောက်ပံ့ပေးထားသော ဒုံးကျည်ရှစ်စင်းကိုပစ်ချလိုက်နိုင်ကြောင်း၊ အလားတူ ဒေသအများအပြား၌ ဒရုန်းအစင်းရေ ၁၇၀ ကိုလည်း ပစ်ချလိုက်နိုင်ကြောင်း ရုရှားကာကွယ်ရေးဝန်ကြီးဌာနက မေလ ၃ ရက်တွင်ထုတ်ပြန် ထားသည်။

ရုရှား၏လေကြောင်းရန်ကာကွယ်ရေးတပ်ဖွဲ့က ဗြိတိန်နိုင်ငံကထုတ်လုပ်သည့် Storm Shadow ဒုံးကျည်ရှစ်စင်း၊ ယူကရိန်း ၏ Neptune-MD ပဲ့ထိန်းဒုံးကျည်သုံးစင်း၊ ပင်လယ်နက်ရေယာဉ်စုက မောင်းသူမဲ့ရေယာဉ် ၁၄ စင်းတို့ကိုပစ်ချဖျက်ဆီးလိုက်နိုင်ကြောင်း ရုရှားကာကွယ်ရေးဝန်ကြီး ဌာန၏လူမှုကွန်ရက်စာမျက်နှာတွင်ဖော်ပြထားသည်။

ဒရုန်းဖြင့်တိုက်ခိုက်မှုအများအပြားကို ခရိုင်းမီးယားဒေသ၌လုပ်ဆောင်ခြင်းဖြစ်ပြီး ထိုသို့တိုက်ခိုက်မှုဖြစ်ပွားစဉ်အတွင်း ခရိုင်းမီးယားတံတားကို လေးနာရီကြာ ပိတ်ထားရကြောင်း၊ ယူကရိန်းတပ်ဖွဲ့များ က ရုရှားနယ်မြေအတွင်းသို့အသေခံဒရုန်းများဖြင့်တိုက်ခိုက်မှုများလုပ်ဆောင်လေ့ရှိကြောင်းသိရသည်။                  

Ref: RT

Source: https://myawady.net.mm/