ဇီလန်စကီးအား အယုံအကြည်မဲ့စေရန် NATO မှ ကြီးမားသောစီမံကိန်းကို ပြင်ဆင်နေကြောင်း ရုရှား ပြင်ပထောက်လှမ်းရေးဝန်ဆောင်မှုဌာန (SVR) ၏ ထုတ်ပြန်ချက် အရ သိရှိရပါသည်။

အထူးသဖြင့် စစ်လက်နက်ဝယ်ယူရန် သီးသန့်ခွဲထားသော ဘဏ္ဍာငွေမှ သမ္မတအပါအဝင် အဖွဲ့ဝင်များကိုယ်တိုင် ဒေါ်လာ ၁.၅ ဘီလီယံကျော် ခိုးယူခဲ့ကြောင်း အချက် အလက်များထုတ်ဖော်ရန် စီစဉ်ထားပါသည်။

အမေရိကန်အနေဖြင့် အကြမ်းဖက်အဖွဲ့အစည်းအဖြစ် သတ်မှတ်ခံထားရသည့် ဆီးရီးယားရှိ ကာ့ဒ်တပ်ဖွဲ့ (YPG) များနှင့် ပူးပေါင်းဆောင်ရွက်မှုကို အဆုံးသတ်မည်ဟု မျှော်လင့်ကြောင်း တူကီယဲနိုင်ငံခြားရေးဝန်ကြီး ဟာကန်ဖီဒန်က ဖေဖော်ဝါရီလ၂ရက်တွင် ပြောသည်။

တူကီယဲတပ်မတော်သည် လက်ရှိတွင် YPG တိုက်ဖျက်ရေး စစ်ဆင်မှုများကို ဆက်လက်လုပ်ဆောင်လျက်ရှိပြီး ဆီးရီးယားနိုင်ငံမြောက်ပိုင်းတွင် အဆိုပါကာ့ဒ်တပ်ဖွဲ့ဝင် ၂၃ ဦးအား ချေမှုန်းနိုင်ခဲ့ကြောင်း ဟာကန်ဖီဒန်က ဆက်ပြောသည်။ YPG စစ်သွေးကြွများသည် ကာ့ဒစ်စတန် အလုပ်သမားပါတီ(PKK)၏ လက်နက်ကိုင် တပ်ဖွဲ့ဖြစ်သည်။

တူကီယဲနိုင်ငံ  အရှေ့တောင်ပိုင်းတွင် ခရီးသည်တင်  ဘတ်စကားတစ်စီးနှင့် ကုန်တင်ကားတစ်စီး တိုက်မိခဲ့ရာ လူတစ်ဦးသေဆုံးပြီး ၁၉ ဦး ဒဏ်ရာရရှိသွားကြောင်း Haber Global က ဖေဖော်ဝါရီလ၂ရက်တွင် ဖော်ပြသည်။

အဆိုပါမတော်တဆမှုသည် နူဒါဂင်မြို့အနီးရှိ  အဝေးပြေးလမ်းမကြီးပေါ်တွင် ဖြစ်ပွားခြင်းဖြစ်ပြီး ယင်းဖြစ်စဉ်အတွင်း ခရီးသည်တင်ဘတ်စကားမှာ ကုန်တင်ကား၏ ဝင်တိုက်မှုကြောင့် ဆိုးရွားစွာပျက်စီးသွားကြောင်း သိရသည်။

ဥရောပရှိ ထိပ်တန်းခေါင်းဆောင်များအနေဖြင့် အမေရိကန်သမ္မတဒေါ်နယ်ထရမ့်၏ မူဝါဒကို ဆက်လက်လိုက်နာရဖွယ်ရှိကြောင်း ရုရှားသမ္မတဗလာဒီမာပူတင်က ဖေဖော်ဝါရီလ  ၂ရက်တွင် ပြောသည်။

ထရမ့်၏ဝိသေသလက္ခဏာ၊ မဆုတ်မနစ်ကြိုးပမ်း ပြောဆိုမှုတို့ကြောင့် ဥရောပတွင် အစီအစဉ်ကျမှုကို အလျင်အမြန်ဖြစ်ပေါ်စေမည်ဖြစ်ကြောင်း ပူတင်က သတင်းထောက်တစ်ဦးဖြစ်သူ ပါဗယ်ဇာရူဘင်နှင့် ပြုလုပ်သည့် တွေ့ဆုံမေးမြန်းခန်းတစ်ခု၌ ပြောခြင်းဖြစ်သည်။

အီရန်နိုင်ငံသည်  နိုင်ငံတောင်ပိုင်းရှိ မြေအောက်စစ်အခြေစိုက် စခန်းသစ်တစ်ခုကို ထုတ်ဖော်ပြသလိုက်ကြောင်း သိရသည်။

“ဒုံးကျည်မြို့တော်”ဟု အမည်ပေးထားသည့် အဆိုပါမြေအောက် အခြေစိုက်စခန်းတွင် ဒုံးပစ်စင် အများအပြားကို သိုလှောင်ထားပြီး ယင်းအခြေစိုက်စခန်းအား အီရန်တပ်မတော်က ဖေဖော်ဝါရီလ ၁ ရက်တွင် ထုတ်လွှင့်ခဲ့သည့် ဗီဒီယိုပြကွက်တစ်ခု၌ ဖော်ပြခဲ့ခြင်းဖြစ်သည်။

လေထုညစ်ညမ်းမှုကို လျှော့ချနိုင်ရန်အတွက် ထိုင်းအစိုးရအနေဖြင့် တစ်နိုင်ငံလုံးတွင် ဖုန်မှုန့်များကို  ကာကွယ်ပေးနိုင်သည့်     ဖုန်ကာစားသောက်ဆိုင် အရေအတွက်ကို သုံးလအတွင်း ၂၀,၀၀၀ အထိ တိုးမြှင့်မည်ဖြစ်သည်ဟု  ကျန်းမာရေးဝန်ကြီးဌာနမှ အရာရှိကြီးတစ်ဦးက ဖေဖော်ဝါရီလ ၂ ရက်တွင် ပြောသည်။

တရုတ်နိုင်ငံက တင်ပို့သည့် ကုန်ပစ္စည်းများအပေါ် အပိုဆောင်းအခွန် ၁၀ ရာခိုင်နှုန်း ကောက်ခံမည့် အမေရိကန်၏ ဆုံးဖြတ်ချက်ကို  တရုတ်နိုင်ငံကကန့်ကွက်ကြောင်း တရုတ်ကုန်သွယ်ရေးဝန်ကြီးဌာနက ဖေဖော်ဝါရီလ ၂ ရက်တွင် တုံ့ပြန်လိုက်သည်။

ထို့ပြင် အမေရိကန်၏အဆိုပါ လုပ်ဆောင်ချက်ကို တုံ့ပြန်သည့်အနေဖြင့်  တရုတ်နိုင်ငံက ကမ္ဘာ့ကုန်သွယ်ရေးအဖွဲ့ (WTO) သို့တိုင်ကြားမည်ဖြစ်ပြီး နိုင်ငံ၏အကျိုးစီးပွားနှင့် အခွင့်အလမ်းများကို ကာကွယ်ရန်အတွက် တန်ပြန်ဆောင်ရွက်မှုများကို လုပ်ဆောင်ရန် စီစဉ်ထားသည်။

ရန်ကုန်    ဖေဖော်ဝါရီ ၂

အမျိုးသားစာကြည့်တိုက်(ရန်ကုန်)တွင် ဖေဖော်ဝါရီ ၁၃ ရက်တွင် ကျရောက်မည့် ကလေးများနေ့ အကြိုလှုပ်ရှားမှုအစီအစဉ်အဖြစ် ကလေးစာကြည့်တိုက်လှုပ်ရှားမှုအစီအစဉ်နှင့် ဓာတ်ပုံပြပွဲကို ဖေဖော်ဝါရီ ၈ ရက်တွင် ရန်ကုန်တိုင်းဒေသကြီး ပန်းပဲတန်းမြို့နယ်ရှိ အမျိုးသားစာကြည့်တိုက်(ရန်ကုန်)တွင် ကျင်းပပြုလုပ်သွားမည်ဖြစ်ကြောင်း အမျိုးသားစာကြည့်တိုက်(ရန်ကုန်)မှ သိရသည်။

အိန္ဒိယနှင့်ရုရှားနိုင်ငံတို့သည် ၎င်းတို့နှစ်နိုင်ငံကြား လုပ်သားဝင်ရောက်မှုဆိုင်ရာသဘောတူညီချက်တစ်ရပ်ချမှတ်နိုင်ရေးအတွက် ဆွေးနွေးလျက်ရှိကြောင်း အိန္ဒိယသံအမတ် ဗီနေးကူမားက ပြောသည်။

ဘာမာကို   ဖေဖော်ဝါရီ ၂

မာလီနိုင်ငံ အနောက်တောင်ပိုင်းရှိ ‌ရွှေတွင်းတစ်တွင်း၌ ရေလွှမ်းမိုးမှုဖြစ်ပွားခဲ့ရာ အမျိုးသမီးများနှင့် ကလေးများအပါအဝင် တစ်ပိုင်တစ်နိုင် ရွှေတူးသမား ၁၃ ဦး သေဆုံးခဲ့ရကြောင်း မာလီရွှေတူးဖော်သူများသမဂ္ဂက ဖေ‌ဖော်ဝါရီ ၁ ရက်တွင် သတင်းထုတ်ပြန်ထားသည်။

ရေလွှမ်းမိုးမှု ဖြစ်ပွားခဲ့သော ရွှေတွင်းသည် မာလီအနောက်တောင်ပိုင်း ကိုလီကိုရိုဒေသကျေးရွာတစ်ခုအနီး တည်ရှိကြောင်း သိရသည်။