အတ္တလန္တိတ်သမုဒ္ဒရာရှိ အရေးပါသော ရေစီးကြောင်း ကွန်ရက် ပျက်စီးပါက ကမ္ဘာ၏အချို့ဒေသများသည် ဆောင်းရာသီတွင် အနုတ် ၅၅ ဒီဂရီ ဖာရင်ဟိုက်အထိ ကျဆင်းကာ ပြင်းထန်သော ရာသီဥတုနှင့် လူမှုရေးဆိုင်ရာအကျိုးသက်ရောက်မှုများ ဖြစ်ပေါ်လာနိုင်ကြောင်း လေ့လာမှုအသစ်တစ်ခုက သတိပေးထားသည်။ 

Atlantic Meridional Overturning Circulation (AMOC) သည် တောင်ကမ္ဘာခြမ်းနှင့် အပူပိုင်းဒေသများမှ ရေပူများကို မြောက်ကမ္ဘာခြမ်းသို့ သယ်ဆောင်ပေးပြီး အအေးခံကာ နောက်ဆုံးတွင် တောင်ဘက်သို့ ပြန်စီးသော သဘာဝအလျောက် ရေစီးကြောင်းစနစ်ကြီးဖြစ်သည်။ ယခု အခါ ကမ္ဘာကြီးပူနွေးလာမှုကြောင့် AMOC ၏ အပူနှင့် ဆားငန်မှုညီမျှမှု ပျက်ယွင်းလာကာ အဆိုပါစနစ် အားနည်းလာနေပြီဟု လေ့လာမှုများစွာက ဆိုထားသည်။ အချို့ခန့်မှန်းချက်များအရ ဤရာစုနှစ်အတွင်း AMOC လုံးဝပြိုကျနိုင်ပြီး ၎င်းသည် ဥရောပ၏ သင့်တင့်လျှောက်ပတ်သော ရာသီဥတုကို ထိန်းသိမ်းပေးနေသည့် အဓိကစနစ်ဖြစ်သောကြောင့် ရာသီဥတုပြောင်းလဲမှုများကို ကမ္ဘာတစ်ဝှမ်း ဆိုးရွားစွာ ခံစားရနိုင်သည်။

သို့သော် လူသားများ၏ ရုပ်ကြွင်းလောင်စာသုံးစွဲမှုကြောင့် ပူနွေးလာသော ကမ္ဘာတွင် AMOC ပြိုကျပါက ရာသီဥတုအပေါ် မည်သို့ သက်ရောက်မည်ကို ယခင်က ရှင်းရှင်းလင်းလင်း မသိရှိခဲ့ပေ။ “AMOC ပြိုကျပြီး ရာသီဥတုပြောင်းလဲမှုနှင့်တွဲဖြစ်ပါက အအေးဒဏ်က ပိုအားကောင်းမည်လား၊ သို့မဟုတ် အပူဒဏ်က ပိုအားကောင်းမည်လား” ဟု နယ်သာလန် နိုင်ငံ Utrecht တက္ကသိုလ်မှ သုတေသီ René van Westen က မေးခွန်း ထုတ်ခဲ့သည်။

၎င်း၏အဖွဲ့သည် Geophysical Research Letters ဂျာနယ်၌ ဗုဒ္ဓဟူးနေ့ (ဇွန် ၁၁) တွင် ဖော်ပြခဲ့သော အဆိုပါလေ့လာမှုတွင် ခေတ်မီပြီး ရှုပ်ထွေးသည့် ရာသီဥတုမော်ဒယ်ကို ပထမဆုံးအကြိမ်အဖြစ် အသုံးပြုကာ အဆိုပါမေးခွန်းကို ဖြေရှင်းခဲ့သည်။ ရလဒ်များအရ AMOC ပြိုကျပါက ဥရောပတိုက်တွင် အအေးလှိုင်းကြီးများ ကျရောက်လာနိုင်ပြီး ကမ္ဘာ့အခြားဒေသများတွင် အပူချိန် ပိုမိုမြင့်တက်လာမည်ဟု ညွှန်းဆိုထားသည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှား၏ အကြီးဆုံးဘဏ်တစ်ခုမှ အရာရှိကြီးတစ်ဦးက အိန္ဒိယ ရူပီး ငွေကြေး ၏ အခန်းကဏ္ဍ ရုရှားနိုင်ငံတွင် တိုးတက်လာနေကြောင်း ပြောကြားခဲ့ပြီး အင်္ဂါနေ့ (ဇွန် ၁၀) က RT ၏ သီးသန့်အင်တာဗျူးတွင် Sberbank ၏ ဒုတိယဥက္ကဋ္ဌ Aleksandr Vedyakhin က အိန္ဒိယငွေကြေးသည် ၎င်းတို့ ဘဏ်၏ လူပုဂ္ဂိုလ်တစ်ဦးချင်းနှင့် စီးပွားရေးလုပ်ငန်း ဖောက်သည်များကြားတွင် ရေပန်းစားနေကြောင်း ဖွင့်ဟခဲ့သည်။

“ရုရှားတွင် Sberbank မှ ရူပီးဖြင့် ငွေလွှဲလုပ်ဆောင်ခွင့်ရှိပါသည်။ မိမိတို့၏ အိန္ဒိယဝန်ထမ်းများစွာလည်း ထိုကဲ့သို့ပြုလုပ်လေ့ရှိပါသည်” “ထို့အပြင် သင်သည် ရူပီးအကောင့်ဖွင့်ခြင်း သို့မဟုတ် အခြားနိုင်ငံခြား ငွေကြေးများကဲ့သို့ပင် အခြားလုပ်ငန်းဆောင်တာများကိုလည်း လုပ်ဆောင်နိုင်ပါသည်” ဟု ၎င်းက ဆိုသည်။

Vedyakhin က ဘဏ်အနေဖြင့် ရူပီးအတွက် အခန်းကဏ္ဍကို တမင်တကာ ဖော်ဆောင်ပေးနေခြင်းဖြစ်ကြောင်း၊ အဘယ့်ကြောင့်ဆိုသော် ၎င်းငွေကြေးကို ရုရှားတွင် စုဆောင်းငွေအတွက် ခိုင်မာသော ငွေကြေး တစ်ရပ်အဖြစ် ရှုမြင်နေသောကြောင့်ဖြစ်သည်ဟု ဖြည့်စွက် ပြောကြား ခဲ့သည်။

ရုရှားနှင့် အိန္ဒိယကြား ငွေပေးချေမှုအများစုသည် Sberbank မှတစ်ဆင့်ဖြစ်ပြီး ၎င်းတို့အနက် အများအပြားသည် နိုင်ငံတကာငွေကြေးများဖြင့် လုပ်ဆောင်နေကြောင်း ၎င်းကဆိုသည်။ ရုရှားမှ အိန္ဒိယသို့ တင်ပို့မှု၏ ၇၀% အထိ Sberbank မှ ကိုင်တွယ်ပေးနေသည်။

Vedyakhin က အိန္ဒိယတွင် ၂၀၁၀ ခုနှစ်ကစတင်ခဲ့သော Sberbank ၏ လုပ်ငန်းများသည် သိသာစွာ တိုးပွားလာနေကြောင်း မှတ်ချက်ပြုခဲ့သည်။

“အိန္ဒိယသည် ရုရှားအတွက် အလွန်ဖော်ရွေသော စျေးကွက်ဖြစ်သည်” ဟု Vedyakhin က ပြောကြားပြီး မကြာသေးမီက ခရီးစဉ်အတွင်း ဒေလီ နှင့် မွမ်ဘိုင်းမှ မိတ်ဆွေများသည် “မယုံနိုင်လောက်အောင် အပြုသဘော ဆောင်သည်” ကို တွေ့ရှိခဲ့ကြောင်း Vedyakhin က ပြောကြားခဲ့သည်။ ၎င်းတို့က အိန္ဒိယမှာ မိမိတို့ကို လှိုက်လှဲစွာ ကြိုဆိုပါသည်” “အိန္ဒိယနှင့် မိမိတို့၏ စီးပွားရေးက ကောင်းမွန်နေပါသည်” ဟု ၎င်းက ထပ်လောင်း ပြောသည်။ 

Sberbank တွင် ဒေလီနှင့် မွန်ဘိုင်းတို့တွင် ရုံးခွဲများရှိပြီး ဘန်ဂလောရ် တွင် IT စင်တာတစ်ခုလည်းရှိကာ IT ဝန်ထမ်း ၃၀၀ ခန့်အပ်ရန် စီစဉ် ထားသည်။

ယခုအခါတွင် ရူပီးအတွက် တည်ငြိမ်သောဝယ်လိုအားမြင့်မားနေပြီး ရူပီး ငွေကြေးလွှဲပြောင်းမှုများ ချောမွေ့စွာလည်ပတ်နေပြီး ရူပီးငွေပေးချေမှုများတွင် ကော်မရှင်နှုန်းများ သိသိသာသာကျဆင်းသွားခြင်းကြောင့် မိမိ တို့၏ဖောက်သည်များ တိုက်ရိုက်အကျိုးခံစားရမည်ဖြစ်သည်ဟု ၎င်းက ဆိုသည်။ 

Sberbank သည် နောင်တွင် ရုရှားလုပ်ငန်းများအား ရူပီးငွေဖြင့် ချေးငွေများကို ရုရှားတွင်ရှိသောအတိုးနှုန်းများထက် သိသိသာသာ လျော့နည်းသော နှုန်းဖြင့် ငွေချေးပေးသည့် ၎င်း၏ ဆက်လက်ဆောင်ရွက်မည့် အစီအစဉ်ကို ထပ်မံတိုးချဲ့လျက်ရှိကြောင်း Reuters ၏ ယခင်က ထုတ်ပြန်ချက်အရ သိရှိရသည်။

အနောက်နိုင်ငံများ၏ ပိတ်ဆို့အရေးယူမှုများကြောင့်၊ Sberbank သည် အမေရိကန်ဒေါ်လာနှင့် ယူရိုငွေကြေးဖြင့် ငွေလွှဲပြောင်းမှုများ ပြုလုပ်ရန် ကန့်သတ်ခံထားရပြီး၊ SWIFT စနစ်ကိုလည်း အသုံးပြု၍ အပြည်ပြည် ဆိုင်ရာ ငွေလွှဲမှုများ ပြုလုပ်နိုင်ခြင်း မရှိပေ။

အိန္ဒိယသည် ရုရှားအပေါ် ပိတ်ဆို့အရေးယူမှုများတွင် ပါဝင်ရန် ငြင်းဆန် ခဲ့ပြီး ၂၀၂၂ ခုနှစ်မှစ၍ ရုရှားရေနံ၏ အကြီးဆုံးဝယ်လက်များထဲမှ တစ်ခု ဖြစ်လာခဲ့သည်။ ထို့အပြင် အိန္ဒိယသည် ရုရှားနှင့် ခင်မင်ရင်းနှီးသော ဆက်ဆံရေးကို ဆက်လက်ထိန်းသိမ်းထားဆဲဖြစ်သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မစ်ဆူဘီရှီဖူဆိုထရပ်နှင့် ဘတ်(စ်)ဆိုတဲ့ကုမ္ပဏီက  ၂၀၅၀  ပြည့်နှစ်အရောက်မှာ ဂျပန်နိုင်ငံရဲ့ရည်မှန်းချက်တစ်ခုဖြစ်တဲ့ ကာဗွန်ဓာတ်ငွေ့ ထုတ်လွှတ်မှုကို   ၄၆ ရာခိုင်နှုန်းအထိ လျှော့ချနိုင်စေရေးမှာ ပါဝင်ကူညီတဲ့အနေနဲ့ လျှပ်စစ်ကား(EV)များ အတွက် ဘက်ထရီလဲလှယ်ရေး ကွန်ရက်တစ်ခုကို တိုကျိုမြို့မှာ စတင်ဖွင့်လှစ်လိုက်ပါပြီ။

ဒီအစီအစဉ်ကို မစ်ဆူဘီရှီက အမေရိကန်ရဲ့ အမ်ပယ်ကုမ္ပဏီ၊   ဂျပန်ရဲ့ယာမာတို သယ်ယူပို့ဆောင်ရေး ကုမ္ပဏီတို့နဲ့ ပူးပေါင်းပြီး  ဘက်ထရီလဲလှယ်နိုင်တဲ့  EV  များထုတ်လုပ်ရေးနဲ့   အလိုအလျောက် ဘက်ထရီလဲလှယ်ရေး စခန်းများကို တိုကျိုမြို့မှာ တည်ဆောက်သွားဖို့  စီစဉ်ထားတာဖြစ်ပါတယ်။

ဘက်ထရီလဲလှယ်နိုင်မယ့် EV များကို ထုတ်လုပ်ဖို့ဆိုတာ အချိန်ယူရဦးမှာဖြစ်ပေမယ့် ဘက်ထရီလဲလှယ်ရေးစခန်းများကိုတော့   တိုကျိုမြို့မှာရှိတဲ့  လူဦးရေ ထူထပ်ရာနေရာများမှာ  ဒီနှစ်အတွင်း တည်ဆောက်သွားမှာပါ။

ဒီလိုမျိုး ဘက်ထရီလဲလှယ်ရေး စခန်းများအတွက် အမေရိကန်အမ်ပယ်ကုမ္ပဏီရဲ့ နည်းပညာကို အဓိကထား အသုံးပြုမှာ ဖြစ်ပါတယ်။ သာမန်အားဖြင့်ဆိုရင် EV ကားတွေကို အားသွင်းပါက အချိန်အားဖြင့် တော်တော်လေး ကြာပါတယ်။ အခုတိုကျို မြို့မှာတည်ဆောက်သွားမယ့် ဘက်ထရီ လဲလှယ်ရေး စခန်းမှာတော့  ဘက်ထရီ လဲလှယ်ချိန်က ၅ မိနစ်သာကြာမြင့်မှာဖြစ်ပါတယ်။   

နည်းပညာသတင်း

MWD Web Portal

AlphaBot2 ဆိုတာ တရုတ်နိုင်ငံရှိ ရှန့်ဇန်းမြို့အခြေစိုက် AI2 Robotics ရဲ့ ထုတ်ကုန်တစ်ခုဖြစ်ပါတယ်။ သို့သော်လည်း တခြားစက်ရုပ်တွေနဲ့ မတူတာက AlphaBot2 ဟာ AI ကိုအပြည့်အဝအသုံး ပြုထားပြီး အမျိုးမျိုးသော လုပ်ငန်းများ ကိုဆောင်ရွက်နိုင်စွမ်းရှိတဲ့ စက်ရုပ်တစ်ခု ဖြစ်နေခြင်းဖြစ်ပါတယ်။

AlphaBot2 အနေနဲ့လုပ်ဆောင်နိုင်တဲ့ လုပ်ငန်းတွေထဲမှာ အရည်အသွေး စစ်ဆေးခြင်း၊ အစိတ်အပိုင်းများ တပ်ဆင်ခြင်း၊ သယ်ယူပို့ဆောင်ခြင်းနဲ့ ပြုပြင်ထိန်းသိမ်း ခြင်းတို့ပါဝင်ပါတယ်။ ဒါကြောင့်အခုဆိုရင် AlphaBot2 ဟာ မော်တော်ကားထုတ် လုပ်ရေးစက်ရုံတစ်ခုမှာ လုပ်ငန်းများကို ဆောင်ရွက်နေပြီဖြစ်ပါတယ်။ ဒါဟာ AI နည်းပညာကို အပြည့်အဝ အသုံးပြုခြင်းဖြင့် မော်တော်ကားထုတ်လုပ်ရေး လုပ်ငန်းမှာ စက်ရုပ်တွေကို ထိရောက်စွာ အသုံးချလာ နိုင်မှုကို ရည်ညွှန်းနေပါတယ်။

AlphaBot2 ဆိုတာ AI2 Robotics ရဲ့ Alpha Brain System ကို အသုံးပြုထားတဲ့ မျိုးဆက်သစ်အသိဉာဏ်မြင့် စွမ်းရည်ကို ကိုယ်စားပြုနေတာဖြစ်ပါတယ်။ သူက သင်ယူမှုကိုမြန်ဆန်စွာ လုပ်ဆောင်နိုင်တဲ့အပြင် ပတ်ဝန်းကျင်အပေါ် မူတည်ပြီး သူ့ရဲ့သိရှိမှတ်သား နိုင်စွမ်းကိုလည်း တိုးမြှင့်နိုင်စွမ်းရှိတယ်လို့ AI2 Robotics ကထုတ် ပြန်ထားပါတယ်။

နည်းပညာသတင်း

MWD Web Portal

ထိုင်းနိုင်ငံအစိုးရသည် နိုင်ငံအတွင်းရှိ ခရီးသွားများ အများဆုံး လာရောက်လည်ပတ်လေ့ရှိသောနေရာများတွင် AI နည်းပညာအသုံးပြုထားသည့် ဒရုန်းများသုံး၍ ကင်းလှည့်မှုများ လုပ်ဆောင်သွားမည်ဖြစ် ကြောင်းသိရသည်။

ထိုဒရုန်းများဖြင့် ရာဇဝတ်သားများနှင့် ဗီဇာသက်တမ်းလွန်နေထိုင်သူများကို ရှာဖွေထောက်လှမ်းမှုများ လုပ်ဆောင်သွားမည်ဖြစ်သည်။ ထိုင်းနိုင်ငံအတွင်း အများပြည်သူများ၏ လုံခြုံရေးနှင့်ပတ်သက်၍ စိုးရိမ်မှုများ မြင့်တက်လာနေစဉ် ယခုအစီအစဉ်ကို အကောင်အထည်ဖော်ရန် စီစဉ်လာခြင်းဖြစ်သည်။

ယင်းဒရုန်းများကို ဗဟိုကထိန်းချုပ်မှုရှိသည့် AI အချက်အလက်စင်တာနှင့် ချိတ်ဆက်ထားမည်ဖြစ်ပြီး ဒရုန်းများတွင်ပါဝင်သော ကင်မရာများက လူအုပ်ကြားထဲတွင် ရှိနေသူများကို စကန်ဖတ်ကာ ဖမ်းဝရမ်းထုတ်ခံထားရသူများ၊ ဗီဇာသက်တမ်းလွန်နေသူများ၏ အချက်အလက်များနှင့် တိုက်ဆိုင်စစ်ဆေးသွားမည်ဖြစ်သည်။

ထိုင်းနိုင်ငံ၏နာမည်ကျော် အပန်းဖြေ စခန်းမြို့တစ်ခုဖြစ်သည့် ပတ္တယားမြို့၌ ရုရှားနိုင်ငံသားနှစ်ဦး တိုက်ခိုက်လုယက်ခံရမှုမှ ပြစ်မှုကျူးလွန်သူများကို ဇွန်လ ၉ ရက်တွင် ဖမ်းဆီးနိုင်ပြီးနောက် ယခုအစီအစဉ်ကို အကောင်အထည်ဖော်ရန် အစိုးရက စီစဉ်လာခြင်းဖြစ်သည်။

ထိုကဲ့သို့ ခရီးသွားများ တိုက်ခိုက်ခံရမှုကြောင့် ပတ္တယားမြို့သည် ယခင်ကကဲ့သို့ လုံခြုံအေးချမ်းမှုမရှိတော့ကြောင်း၊ အချို့က ၎င်းတို့အနေဖြင့် ပတ္တယား၌ညဘက် လမ်းလျှောက်ထွက်ခြင်းပင် မလုပ်ရဲတော့ကြောင်း  ပြည်သူများက အွန်လိုင်းတွင် ဝေဖန်မှုများ လုပ်ဆောင်လာသည်ကို တွေ့ရသည်။   

 MWD Web Portal

ဆီးရီးယားနိုင်ငံသည် အမျိုးသမီးများအား အများပြည်သူဆိုင်ရာ ကမ်းခြေများတွင် ဘစ်ကီနီ (သို့) ကိုယ်ခန္ဓာအား အပြည့်အဝ ဖုံးအုပ်ထားသော ရေကူးဝတ်စုံများ ဝတ်ဆင်ရန် စည်းမျဉ်းသစ် ထုတ်ပြန်ခဲ့သည်။ ယခုအမိန့်သည် အစ္စလာမ်မစ်အကြမ်းဖက်သမားများ ဦးဆောင်သော သူပုန်များက ဒီဇင်ဘာလတွင် အာဏာရှင် ဘာရှာ အယ်လ်-အာဆက် အစိုးရကို ဖြုတ်ချပြီးနောက် ယဉ်ကျေးမှုအပြောင်းအလဲ၏ နောက်ဆုံးအဆင့်ဖြစ်သည်။ ခရီးသွားလာရေးဝန်ကြီးဌာနက အဆိုပါစည်းမျဉ်းသစ် များကို ပြည်သူ့အကျိုးစီးပွားလိုအပ်ချက်များအရ ပြုလုပ်ခဲ့သည်ဟု ဆိုသည်။

“ပြည်သူ့ကမ်းခြေများနှင့် ရေကူးကန်များသို့ လာရောက်သူများ (ခရီး သွားဖြစ်စေ၊ ဒေသခံဖြစ်စေ) သည် လူမှုအသိုင်းအဝိုင်း၏ ထုံးတမ်းစဉ်လာ နှင့်ကိုက်ညီသော ရေကူးဝတ်စုံများ ဝတ်ဆင်ရန် လိုအပ်ပါသည်” ဟု ခရီးသွားဝန်ကြီး Mazen al-Salhani က Facebook တွင် ထုတ်ပြန် ခဲ့သော အမိန့်တွင် ဖော်ပြထားသည်။

“အများပြည်သူဆိုင်ရာကမ်းခြေနှင့် ရေကူးကန်များတွင် ပို၍လုံခြုံသော ရေကူးဝတ်စုံ (ဘစ်ကီနီ သို့မဟုတ် ခန္ဓာကိုယ်အများစုကို ဖုံးအုပ်ထားသော ဝတ်စုံ) ဝတ်ဆင်ရန် လိုအပ်သည်” ဟု အမိန့်တွင် ဖော်ပြထားပြီး၊ “ကမ်းခြေမှ အခြားနေရာများသို့ သွားလာသည့်အခါ အမျိုးသမီးများအနေဖြင့် ရေကူးဝတ်စုံအပေါ်မှ အပေါ်ထပ်ခြုံလွှာ (သို့) ချောင်ချောင်ချိချိ ဝတ်ရုံများ ဝတ်ဆင်ရန် လိုအပ်သည်” ဟု ဖြည့်စွက်ထားသည်။

အမျိုးသားများအနေဖြင့် အင်္ကျီဝတ်ဆင်ရန် လိုအပ်ပြီး “ရေကူးဧရိယာ၊ ဟိုတယ်လော်ဘီနှင့် အစားအသောက် စားသောက်ရာ နေရာများမှလွဲ၍ အခြားပြည်သူ့နေရာများတွင် အင်္ကျီမပါဘဲ သွားလာခြင်းကို ခွင့်မပြုပါ” ဟု ဖော်ပြထားသည်။

“ကမ်းခြေနှင့် ရေကူးကန်များ၏ အပြင်ဘက်ရှိ အများပြည်သူဆိုင်ရာ နေရာများတွင် ပခုံးနှင့်ဒူးကို ဖုံးအုပ်ထားသော ချောင်ချောင်ချိချိ ဝတ်စုံများ ဝတ်ဆင်ရန်နှင့် ပါးလွှာသော (သို့) အလွန်ကျပ်ထုပ်သော အဝတ်အစား များကို ရှောင်ကြဉ်ရန်” အကြံပြုထားသည်။

အဆိုပါ စည်းကမ်းချက်များကို မလိုက်နာသူများအား မည်ကဲ့သို့ အရေး ယူမည်ကို ရှင်းရှင်းလင်းလင်း ဖော်ပြမထားသော်လည်း ဝန်ကြီးဌာနက “လိုက်နာမှုရှိစေရန် ကယ်ဆယ်ရေးအဖွဲ့ဝင်များနှင့် ကမ်းခြေ ကြီးကြပ် ရေးမှူးများက စောင့်ကြည့်ကြမည်” ဟု ပြောကြားခဲ့သည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်သည် ဇွန်လ ၁၀ ရက်နေ့တွင် မြောက် ကာရိုလိုင်းနားပြည်နယ် Fort Bragg တွင် အမေရိကန်စစ်တပ်၏ ၂၅၀ နှစ်ပြည့် အထိမ်းအမှတ်အခမ်းအနားသို့ တက်ရောက်လာသော စစ်သည် များအား မိန့်ခွန်းပြောကြားခဲ့သည်။ ၎င်း၏မိန့်ခွန်းပြီးဆုံးသွားချိန်တွင် ၎င်းကြိုက်နှစ်သက်သော YMCA သီချင်းသံနှင့်အတူ ကပြခဲ့ရာ ပရိသတ်များက လှိုက်လှဲစွာ ဩဘာပေးခဲ့ကြပြီးနောက် ၎င်းက နောက်သို့လှည့်ကာ ချီးမြှောက်သည့်အမူအရာဖြင့် စင်နောက်တွင် ထိုင်နေသော စစ်သည် များအား ကျေးဇူးတင်စကား ပြန်လည်ပြောကြားခဲ့သည်။

ပရိသတ်များက “USA, USA” ဟူသော သံပြိုင်အော်သံများဖြင့် ဆက်လက် အားပေးခဲ့ကြပြီး ထရမ့် စင်ပေါ်မှဆင်းရန် လှမ်းလာချိန်တွင် အော်သံများ ပိုမိုကျယ်လောင်လာခဲ့သည်။ ၎င်းသည် ခေတ္တရပ်နားကာ စစ်သည်များ ဘက်သို့ လက်ညှိုးထိုးပြပြီး လက်သီးဆုပ်ကို လေထဲသို့ မြှောက်ကာ“ကျေးဇူးအများကြီးတင်ပါတယ်၊ ကျေးဇူးပါ” ဟု ပြောကြားခဲ့ကာ စစ်သည် အချို့က မတ်တပ်ရပ်ကာ ၎င်းနှင့်အတူ ကပြခဲ့ကြသည်။

Fort Bragg သည် အမေရိကန်စစ်တပ်၏ အထူးစစ်ဆင်ရေးဌာနချုပ် (United States Army Special Operations Command) ဖြစ်ပြီး အမေရိကန် အထူးတပ်ဖွဲ့ (Special Forces) နှင့် Ranger တပ်ဖွဲ့များ တပ်စွဲထားသည့် နေရာလည်းဖြစ်သည်။

၎င်း၏ မိန့်ခွန်းတွင် ထရမ့်က အမေရိကန်စစ်တပ်သည် နှစ်စဉ် ရည်မှန်း ထားသည့် စစ်သည်အသစ် ၆၁,၀၀၀ ဦးကို စုဆောင်းနိုင်ခဲ့ပြီး ယခင် နှစ်နှစ်၊ သုံးနှစ်အတွင်း ရည်မှန်းချက် မပြည့်မီဖြစ်ခဲ့ပြီးနောက် ယခုနှစ်တွင် လေးလ အလို၌ ရည်မှန်းချက်ပြည့်မီကာ ကြီးမားသော အောင်မြင်မှု တစ်ရပ် ရရှိ ခဲ့ကြောင်း ပြောကြားခဲ့သည်။ ထိုသို့ သွားရောက်စဉ်အတွင်း ၎င်းသည် စစ်သည်များ၊ ၎င်းတို့၏မိသားစုများနှင့် တွေ့ဆုံခဲ့ပြီး လေ့ကျင့်မှုများကို ကြည့်ရှုကာ စွမ်းဆောင်နိုင်မှုများကို ချီးကျူးခဲ့သည်။

Fort Bragg တွင် ကျင်းပသည့် အခမ်းအနားသည် ဇွန်လ ၁၄ ရက်နေ့တွင် ဝါရှင်တန်ဒီစီ၌ ကျင်းပမည့် စစ်ရေးပြ အခမ်းအနားမတိုင်မီ စီစဉ်ထားသည့် အခမ်းအနားအစီအစဉ်၏ တစ်စိတ်တစ်ပိုင်းဖြစ်ပြီး ထိုနေ့သည် ထရမ့်၏ အသက် ၇၉ နှစ်ပြည့်မွေးနေ့နှင့်လည်း တိုက်ဆိုင်နေသည်။

“မိမိတို့အနေဖြင့် အနည်းငယ် ကြွားဝါလိုကြောင်း၊ မကြာသေးမီက အခြား နိုင်ငံများတွင် ဒုတိယကမ္ဘာစစ်အောင်ပွဲကို ကျင်းပခဲ့ကြကြောင်း၊ ပြင်သစ် မှာလည်း ကြီးကျယ်ခမ်းနားသည့် ပွဲတစ်ခု ရှိခဲ့ကြောင်း၊ လူတိုင်းက ကျင်းပ ခဲ့ကြကြောင်း၊ ကျင်းပခဲ့ခြင်းမရှိသည့် တစ်ခုတည်းသောနိုင်ငံက အမေရိကန် ဖြစ်ကြောင်း၊ မိမိတို့က အောင်နိုင်သူတွေဖြစ်ကြောင်း” ဟု အမေရိကန် သမ္မတက ပြောကြားခဲ့သည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်ရေတပ်က သူတို့ရဲ့ရေမြှုပ်မိုင်း ရှင်းလင်းရေးလုပ်ငန်းကို ပိုမိုအောင်မြင်စွာ လုပ်ဆောင်နိုင်စေဖို့ BAE Systems ကုမ္ပဏီကို ဒေါ်လာ ၁၀ သန်းခွဲတန်ဖိုးရှိတဲ့ ကန်ထရိုက်တစ်ခု ပေးလိုက်ပါတယ်။ အဲဒီ ကန်ထရိုက်က ဝေဟင်မှနေပြီးမိုင်းများကို ရှင်းလင်းမယ့်စနစ်ကိုဖန်တီးဖို့ပါ။ အဲဒီစနစ်ကိုတော့ Archerfish လို့အမည်ပေးထားပါတယ်။

ဒီစနစ်က ဗြိတိန်တော်ဝင်ရေတပ်မှာ အသုံးပြုဖို့ BAE Systems ကဖန်တီးပေးထားတဲ့စနစ်ဖြစ်ပြီး အခုစနစ်မှာတော့ မူလကထက် အမြန်နှုန်းနဲ့တိကျမှုနှုန်း ၄ ဆကျော်ပိုမြင့်တဲ့ ရေမြှုပ်မိုင်းဖျက်ဆီးရေး ဒုံးကျည်များ ပါဝင်မှာ ဖြစ်ပါတယ်။ အဲဒီ ဒုံးကျည်များကို  ရဟတ်ယာဉ်ပေါ်မှာ တင်ဆောင်ကာ ပစ်ခတ်နိုင်မှာဖြစ်ပြီး ၂၀၂၇ ခုနှစ်မှာ အပြီးသတ်နိုင်ဖို့ မျှော်မှန်းထားပါတယ်။     

နည်းပညာသတင်း

MWD Web Portal

အိန္ဒိယနိုင်ငံမြောက်ပိုင်းရှိ ဒေသအများအပြားတွင် မထိန်းချုပ်နိုင်သော အပူလှိုင်းကြောင့် နေ့အပူချိန်များသည် ၄၇ ဒီဂရီ စင်တီဂရိတ်ကျော်သည်အထိ မြင့်တက်လာကြောင်းနှင့် ထိုသို့အပူချိန်မြင့်တက်လာသည့်အတွက် ကျန်းမာရေး ပြဿနာများကိုလည်း ရင်ဆိုင်ရနိုင်ကြောင်း တာဝန်ရှိသူများက ထုတ်ပြန်ထားသည်။

ရာဂျက်စသန်ပြည်နယ်ရှိ ဆရီဂန်ဂါနာဂါမြို့၏နေ့အပူချိန်မှာ ဇွန်လ ၉ ရက်တွင် ၄၇ ဒသမ ၃ ဒီဂရီစင်တီဂရိတ်ရှိကြောင်း နှင့်ထိုမြို့၏ စံချိန်တင်အပူချိန်မှာ ၅၁ ဒီဂရီ ဖြစ်ကြောင်း အိန္ဒိယ မိုးလေဝသဌာနက ဇွန်လ ၁၀ ရက်တွင် ထုတ်ပြန်ထားသည်။

ယခုကဲ့သို့အပူချိန်များ မြင့်တက်လာမှုသည်  နွေရာသီရောက်သည့်အတွက် ဖြစ်ပေါ်လာခြင်းဖြစ်သော်လည်း ကျန်းမာရေးဌာနများအတွက် စိန်ခေါ်မှုမြင့်တက်လာစေသည်။ မြင့်မားသော အပူချိန်နှင့်အချိန် ကြာမြင့်စွာ ထိတွေ့မိပါက အပူလျှပ်ခြင်းကို အများဆုံးဖြစ်ပေါ်စေပြီး အထူးသဖြင့် ပြင်ပတွင်  အလုပ်လုပ်နေရသူများ၊  ကလေးငယ်များနှင့် သက်ကြီးရွယ်အိုများတွင် ထိုဝေဒနာကို ပိုမိုခံစားရနိုင်သည်။

ပြီးခဲ့သည့်နှစ်တွင် လပေါင်းများစွာကြာမြင့်သည့် အပူလှိုင်းဖြတ်သန်းမှုကြောင့် အိန္ဒိယနိုင်ငံတစ်ဝန်း၌ လူ ၁၀၀ ကျော် သေဆုံးကာ လူပေါင်း ၄၀၀၀၀ ကျော်မှာ အပူလျှပ်သည့်ဝေဒနာကို ခံစားခဲ့ရကြောင်း ကျန်းမာရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။

ထို့ပြင် မိုးလေဝသဌာနက ရာဂျက်စသန်၊ ဥတ္တပရာဒေ့ရှ်၊ ဟာယာနာနှင့် နယူးဒေလီတို့၌ လာမည့်ရက်များအတွင်း အပူလှိုင်းဖြတ်သန်းမှု ဖြစ်ပေါ်နိုင်သည့်  သတိပေးချက် တစ်ခုထုတ်ပြန်ထားကြောင်း သိရသည်။

MWD Web Portal

တရုတ်နိုင်ငံပိုင် သတင်းဌာနတစ်ခုဖြစ်တဲ့ CCTV က   တရုတ်တပ်မတော်က ပိုင်ဆိုင်ထားတဲ့ နျူကလီးယား ထိပ်ဖူးတပ် တိုက်ချင်းပစ်ဒုံးကျည် တစ်မျိုးရဲ့ အသေးစိတ် အချက်အလက်များကို ထုတ်ဖော်လိုက်ပါတယ်။ ဒီလိုမျိုးထုတ်ဖော်မှုဟာ တရုတ်နိုင်ငံအတွက် ပထမဆုံးလည်းဖြစ်ပါတယ်။ အခုအသေးစိတ် အချက်အလက်တွေထွက်ပေါ်လာတဲ့ဒုံးကျည်က DF-5 အမျိုးအစား ဒုံးကျည်ပါ။

DF-5 ဒုံးကျည်က တရုတ်နိုင်ငံရဲ့ ပထမမျိုးဆက် မဟာဗျူဟာမြောက် တိုက်ချင်းပစ်ဒုံးကျည်ဖြစ်ပါတယ်။ ၁၉၇၀ ပြည့်နှစ် အလွန်ကာလများမှာထုတ်လုပ်ပြီး ၁၉၈၁ ခုနှစ်မှာ စတင်အသုံးပြုခဲ့တာပါ။  သူက အဆင့်နှစ်ဆင့်ပါ ဒုံးကျည်ဖြစ်ပြီး နျူကလီးယားထိပ်ဖူး တစ်ခုတည်းကိုသာသယ်ဆောင်နိုင်ပါတယ်။ ဒါပေမဲ့ သူသယ်ဆောင်နိုင်တဲ့   နျူကလီးယားထိပ်ဖူးရဲ့ ပေါက်ကွဲအားက  တီအန်တီယမ်း  ၄ မဂ္ဂါတန် ပေါက်ကွဲအားနဲ့ညီမျှပါတယ်။ ဒီပမာဏက ဟီရိုရှီးမားမှာ ပေါက်ကွဲခဲ့တဲ့ အက်တမ်ဗုံးရဲ့ ပေါက်ကွဲအားထက် အဆ ၂၀၀ နီးပါးပိုများပါတယ်။

ဒါ့အပြင် သူ့ရဲ့ထိရောက် အကွာအဝေးက မိုင်ပေါင်း ၇၄၀၀ ကျော်ရှိတာကြောင့် တရုတ်နိုင်ငံကနေဆိုရင် အမေရိကန်က DF-5 ဒုံးကျည်ရဲ့ပစ်ကွင်း အတွင်း ရောက်ရှိနေပါတယ်။

MWD Web Portal

နည်းပညာသတင်း