အမေရိကန်သမ္မတ ဒေါ်နယ်ထရမ့်က ဇီလန်စကီးအနေဖြင့် ၎င်းနှင့် ဆက်လက်၍အပြန်အလှန်ဆွေးနွေးရန် လုပ်ဆောင်ရမည့်အချက်များကို ဖော်ပြခဲ့ပါသည်။

ဇီလန်စကီးသည် ရုရှားသမ္မတဗလာဒီမာပူတင်ကို ဝေဖန်ခြင်း ရပ်တန့်ပြီး ငြိမ်းချမ်းရေးသဘောတူညီချက် ရယူရန် ကြိုးပမ်းမှုကို တရားဝင် ကြေညာ ရမည်ဖြစ်ပါသည်။

ရုရှားသမ္မတ ဗလာဒီမာပူတင်သည် ငြိမ်းချမ်းရေးကို လိုလားကြောင်း ဇီလန်စကီးနှင့် အပြင်းအထန် ငြင်းခုံမှု ပြီးနောက် အမေရိကန်သမ္မတ ဒေါ်နယ်ထရမ့် က၎င်း၏ထင်မြင်ယူဆချက်ကို ဖော်ပြခဲ့ပါသည်။ 

ထရမ့်က ယူကရိန်းတွင် စစ်ပြေငြိမ်းရေးကို ချက်ချင်း ရရှိနိုင်သည်ဟု ယုံကြည်ကြောင်း ပြောကြားခဲ့သည်။ 

ထို့အပြင် ၎င်းက “ရုရှားနှင့် ပဋိပက္ခကို ယူကရိန်းအနေဖြင့် ဆက်လက် ရင်ဆိုင်ရန် မသင့်တော်ကြောင်း” ပြောကြားခဲ့ပါသည်။ 

အမေရိကန်ထောက်ခံမှုမရှိပါက ယူကရိန်းသည် အနိုင်ရရန် မဖြစ်နိုင်ဟု ၎င်းက ဖြည့်စွက်ပြောဆိုခဲ့ပါသည်။ 

ကိုးကား - RIA Novosti

အမေရိကန်သမ္မတဒေါ်နယ်ထရမ့်သည် ယူကရိန်းသမ္မတ ဇီလန်စကီးအား ရုရှား-ယူကရိန်း ပဋိပက္ခအတွက် အပစ်အခတ်ရပ်စဲရေးကို သဘောတူရန် တောင်းဆိုခဲ့ပါသည်။

ယူကရိန်းတွင် ပြဿနာကြီးကြီးမားမားရှိနေပြီး ပဋိပက္ခကို အောင်မြင် နိုင်မည့် အလားအလာမရှိကြောင်း၊ ယခုတောင်းဆိုချက်ကို ဇီလန်စကီး အနေဖြင့် ကျေးဇူးတင်သင့်ကြောင်း၊ ဇီလန်စကီးတွင် နိုင်ဖဲများ မရှိကြောင်း၊ ယူကရိန်းစစ်သား အများစုသည် တိုက်ပွဲကျကုန်ပြီဖြစ်ပြီး ၎င်းတွင် စစ်သားမလုံလောက်တော့ကြောင်း” အမေရိကန်သမ္မတ ဒေါ်နယ် ထရမ့်က ပြောကြားခဲ့ပါသည်။ 

ကိုးကား - RIA Novosti

ယူကရိန်းသမ္မတ ဇီလန်စကီးသည် အမေရိကန်သမ္မတဒေါ်နယ်ထရမ့်နှင့် တွေ့ဆုံစဉ် သတင်းထောက်များကို စကားဖြတ်ပြောဆို၍ ငြင်းခုံပြီး ကြမ်းတမ်းစွာပြုမူခဲ့သည်။

ဗလာဒီမာဇီလန်စကီးသည် အမေရိကန်သမ္မတ ဒေါ်နယ်ထရမ့်နှင့် တွေ့ဆုံစဉ် အမေရိကန်ခေါင်းဆောင်နှင့် ငြင်းခုံခဲ့ပြီး အော်ဟစ်ကာ သတင်းထောက်များ၏မေးခွန်းများကို အမေရိကန်သမ္မတဒေါ်နယ်ထရမ့် မတိုင်မီ ဖြေကြားခဲ့သည်။ တစ်ခါတစ်ရံ အမေရိကန်သမ္မတ ဒေါ်နယ် ထရမ့်ကို စကားဖြတ်ပြောဆိုခဲ့ပြီး သတင်းထောက်များ၏ မေးခွန်း အချို့ ကိုကြမ်းတမ်းစွာတုံ့ပြန်ခဲ့ပါသည်။ တွေ့ဆုံမှု၏ နောက်ဆုံးမိနစ်အနည်းငယ် တွင် အပြန်အလှန်စကားပြောဆိုမှုများသည် အသံကျယ်လောင်စွာဖြင့် ပြုလုပ်ခဲ့ပါသည်။ အမေရိကန်သမ္မတဒေါ်နယ်ထရမ့်က အမေရိကန် နိုင်ငံမှ ယူကရိန်းအတွက် ဒေါ်လာ ၃၅၀ ဘီလီယံ သုံးစွဲခဲ့ကြောင်း ပြောကြားခဲ့ သော်လည်း ဇီလန်စကီးက သဘောမတူခဲ့ပေ။ ထို့အပြင် အမေရိကန် သမ္မတဒေါ်နယ်ထရမ့်နှင့် အမေရိကန်ဒုတိယသမ္မတ ဂျေဒီဗန့်စ်တို့က ယူကရိန်းနိုင်ငံသည် အမေရိကန်နိုင်ငံအား ကျေးဇူးတင်ရန် လိုအပ်ကြောင်း ပြောကြားသောအခါတွင်လည်း ဇီလန်စကီးက ကန့်ကွက်ခဲ့ပါသည်။ ဇီလန်စကီးက ဒေါ်နယ်ထရမ့်ကို စကားဖြတ်ရန် အသံကျယ်လောင် စပြုလာသောအခါ သတင်းထောက်များကို ခန်းမမှ ထွက်ခွာရန် တောင်းဆိုခဲ့ပြီး ဆွေးနွေးပွဲကို လျှို့ဝှက်စွာ ဆက်လက်ပြုလုပ်ခဲ့ပါသည်။

ဆွေးနွေးပွဲမစတင်မီ အမေရိကန်သမ္မတဒေါ်နယ်ထရမ့်နှင့် ဇီလန်စကီး တို့သည် သတင်းထောက်များ၏ မေးခွန်းများကို ဖြေကြားသည့် အစီအစဉ် ကို ပြုလုပ်ခဲ့ပါသည်။ ဒေါ်နယ်ထရမ့်က ပဋိပက္ခတစ်ခုလုံးကို ဖြေရှင်းရန် သဘောတူညီချက်တစ်ခုရရှိရန် ပိုမိုအရေးကြီးကြောင်း ပြောကြားနေစဉ် ဇီလန်စကီးက ၎င်းဆုံးရှုံးခဲ့ရသော မြို့အားလုံးကို ပြန်လည်ရရှိရန် ပိုမို အရေးကြီးကြောင်း ပြောကြားကာ စကားဖြတ်ခဲ့ပါသည်။ အမေရိကန် သမ္မတက ၎င်းလက်ထက်တွင် ယူကရိန်းနှင့်ပတ်သက်သော သဘော တူညီချက်များကို အမြဲလိုက်နာခဲ့ကြောင်း ပြောကြားနေစဉ် ဇီလန်စကီး က စကားဖြတ်ပြောဆိုခဲ့ပြီး ၂၀၁၆ ခုနှစ်နှင့် နောက်ပိုင်းတွင် ရုရှား နိုင်ငံ က အပစ်အခတ်ရပ်စဲရေးကို ချိုးဖောက်ခဲ့ကြောင်း သက်သေပြရန် ကြိုးစား ခဲ့ပါသည်။ ထိုစကားများကို အမေရိကန်သမ္မတက သဘောမတူခဲ့ပေ။ ထို့အပြင် ဒေါ်နယ်ထရမ့်က ယူကရိန်းနိုင်ငံသည် သဘောထား ပြောင်းလဲရန် လိုအပ်ကြောင်း ပြောကြားသောအခါတွင်လည်း ဇီလန်စကီးက သဘော မတူခဲ့သော်လည်း အဆိုပါအကြိမ်တွင်မူ အမေရိကန် ခေါင်းဆောင်၏ စကားကို ငြင်းခုံရန် မကြိုးစားခဲ့ပေ။ ထို့နောက် ဇီလန်စကီးက အမေရိကန်နိုင်ငံသည် ယူကရိန်းဘက်မှ ရပ်တည်နေကြောင်း ပြောကြား ခဲ့သော်လည်း အမေရိကန်သမ္မတဒေါ်နယ်ထရမ့်က ထိုစကားကို မှတ်ချက် မပြုဘဲထားခဲ့သည်။ ယူကရိန်းတွင် ရွေးကောက်ပွဲများ ကျင်းပရန် အလား အလာရှိ၊ မရှိနှင့်ပတ်သက်သော မေးခွန်းကို ဇီလန်စကီးက လျစ်လျူရှု ခဲ့ပါသည်။

ကိုးကား - Tass, NBC 

အမေရိကန်ပြည်ထောင်စုနှင့် ယူကရိန်းတို့၏ မြေရှားသတ္တုတူးဖော် ထုတ်လုပ်ရေး သဘောတူစာချုပ်လက်မှတ်ရေးထိုးရန်ကိစ္စကို  ပယ်ဖျက် လိုက်ကြောင်း အိမ်ဖြူတော် သတင်းထုတ်ပြန်ရေးခေါင်းဆောင်   Karoline Leavitt က ဖေဖော်ဝါရီ ၂၈ ရက်တွင် အတည်ပြု သတင်းထုတ်ပြန်လိုက် ပါသည်။

ဇီလန်စကီးနှင့် ဒေါ်နယ်ထရမ့်တို့သည် ဖေဖော်ဝါရီ ၂၈ ရက်တွင် ဝါရှင်တန်ရှိ အိမ်ဖြူတော်၌   တွေ့ဆုံဆွေးနွေးကြပြီးနောက်  မြေရှား သတ္တု စာချုပ်ချုပ်ဆိုရန် ပယ်ဖျက်လိုက်ကြောင်း၊ ဆွေးနွေးကြစဉ်တွင် ယူကရိန်း သမ္မတဇီလန်စကီးက အမေရိကန်သမ္မတ ဒေါ်နယ်ထရမ့်၊  ဒုတိယသမ္မတဂျေဒီဗန်တို့နှင့်  ဆန့်ကျင်ဘက် ငြင်းခုံမှုကို ဦးတည်စေသည့် စကား များသာ ပြောကြားခဲ့ကြောင်း၊ ဒေါ်နယ်ထရမ့်က ဇီလန်စကီးသည် ငြိမ်းချမ်းရေး ဆွေးနွေးရန် အဆင်သင့်မဖြစ်သေးကြောင်း၊ ယူကရိန်းသမ္မတ ဇီလန်စကီး အနေဖြင့်  ငြိမ်းချမ်းရေးအတွက် အဆင်သင့်ဖြစ်ချိန်မှ ပြန်လာပါဟု  အမေရိကန် သမ္မတဒေါ်နယ်ထရမ့်က ပြောကြားလိုက်ကြောင်း အိမ်ဖြူတော် သတင်းထုတ်ပြန်ချက်အရ သိရှိရပါသည်။ 

ကိုးကား- TASS

ယူကရိန်းသို့ ထောက်ပံ့ခဲ့သော စစ်ရေးအကူအညီများ ဘယ်လိုဖြစ်သွားလဲ ဆိုသည်ကို အဖြေရှာရန် အချိန်ရောက်ပြီဟု အီလွန်မက်က ထုတ်ဖော် ပြောကြားလိုက်သည်။

“ယူကရိန်းကို ထောက်ပံ့ခဲ့သည့် ဘီလီယံရာနှင့်ချီသည့် ဒေါ်လာများ မည်သို့ ဖြစ်သွားသလဲဆိုသည်ကို သိရှိသင့်သည့်အချိန်ရောက်လာပြီ” ဟု အီလွန်မက်က ၎င်း၏ X ဆိုရှယ်မီဒီယာတွင် ရေးသားခဲ့သည်။

ဝါရှင်တန်၏ ယူကရိန်းကို ပံ့ပိုးခဲ့မှုကို DOGE က စစ်ဆေးသင့်ကြောင်း X အသုံးပြုသူများက ၎င်း၏ ပို့စ်အောက်တွင် မှတ်ချက်ပြုခဲ့ကြပြီး “ထိုအချက်သည် စိတ်ဝင်စားစရာပဲ” ဟု အီလွန်မက် က တုံ့ပြန်ခဲ့သည်။

“ယူကရိန်းခေါင်းဆောင်များသည် အမေရိကန်မှ ထောက်ပံ့ပေးခဲ့သည့် ငွေပမာဏ၏ ထက်ဝက်မှာ ဘယ်ရောက်သွားလဲ ဆိုသည်ကို မသိကြ ကြောင်း” အမေရိကန်သမ္မတ ဒေါ်နယ်ထရမ့်က ယခင်က ပြောကြားဖူး ပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ဒုတိယညွှန်ကြားရေးမှူး၊နစက-၃

ရုရှားနိုင်ငံ၏ လုံခြုံရေးကောင်စီအတွင်းရေးမှူး ဆာဂေးရှိုးဂူသည် ဖေဖော်ဝါရီလ ၂၈ ရက်နေ့တွင် အင်ဒိုနီးရှားနှင့် မလေးရှားနိုင်ငံများသို့ လုပ်ငန်းခရီးစဉ်များ ပြီးဆုံးပြီးနောက် တရုတ်ပြည်သူ့သမ္မတနိုင်ငံသို့ ရောက်ရှိခဲ့ပါသည်။

ရုရှားနိုင်ငံ၏ လုံခြုံရေးကောင်စီအတွင်းရေးမှူး ဆာဂေးရှိုးဂူသည် ဤခရီးစဉ်၏ ရည်ရွယ်ချက်ဖြစ်သည့် တရုတ်နိုင်ငံ၏ သမ္မတ ရှီကျင့်ဖျင် နှင့် နိုင်ငံခြားရေးဝန်ကြီး ဝမ်ယိတို့နှင့် တွေ့ဆုံဆွေးနွေးရန်ဖြစ်ပါသည်။

တရုတ်နိုင်ငံခြားရေးဝန်ကြီး ဝမ်ယိနှင့် တွေ့ဆုံပွဲအစတွင် ရုရှားလုံခြုံရေးကောင်စီ အတွင်းရေးမှူး က “မိမိသည် ရုရှားသမ္မတ ဗလာဒီမာပူတင်က ပေးအပ်သော တာဝန်အရ ဤခရီးစဉ် ကို လာရောက်ခြင်းဖြစ်ကြောင်း၊ သမ္မတပူတင်နှင့် ရှီကျင့်ဖျင်တို့ ဖေဖော်ဝါရီ ၂၄ ရက်နေ့က ဖုန်းစကားပြောဆိုမှုများ ပြီးနောက် ဤခရီးစဉ်ကို စီစဉ်ခဲ့ခြင်းဖြစ်ကြောင်း” ပြောကြားခဲ့ပါသည်။ ထို့အပြင် အဆိုပါ တွေ့ဆုံပွဲ ကို ယခုလိုအမြန်ဆုံး စီစဉ်နိုင်ခြင်းသည် နှစ်နိုင်ငံကြား ဆက်ဆံရေး၏ အထူးသဘောသဘာဝကို ပြသသည်ဟု လုံခြုံရေးကောင်စီ အတွင်းရေးမှူး ဆာဂေးရှိုးဂူက ထည့်သွင်း ပြောကြားခဲ့ပါသည်။

လုံခြုံရေးကောင်စီအတွင်းရေးမှူး ဆာဂေးရှိုးဂူက ရုရှားနှင့် တရုတ်နိုင်ငံ တို့သည် နိုင်ငံတကာနှင့် ဒေသတွင်း ပြဿနာများတွင် တူညီသော ချဉ်းကပ်မှုများ ရှိကြောင်း၊ နှစ်နိုင်ငံသည် ကုလသမဂ္ဂ၊ လုံခြုံရေးကောင်စီ၊ G20၊ APEC စသည့် အဖွဲ့အစည်းများတွင် ပူးပေါင်းဆောင်ရွက်လျက် ရှိကြောင်း ပြောကြားခဲ့ပါသည်။ ထို့အပြင် ယခင်နှစ်က ရုရှား၏ BRICS ဥက္ကဋ္ဌအဖြစ် ထမ်းဆောင်စဉ် တရုတ်နိုင်ငံက ပံ့ပိုးကူညီမှုအတွက် ကျေးဇူး တင်ကြောင်း၊ ရုရှားဘက်မှလည်း တရုတ်မိတ်ဖက်များအား ၎င်းတို့၏ လုပ်ငန်းများတွင် ပံ့ပိုးကူညီသွားမည်ဖြစ်ကြောင်း လုံခြုံရေး ကောင်စီ အတွင်းရေးမှူး ဆာဂေးရှိုးဂူက ပြောကြားခဲ့ပါသည်။

အဆိုပါ ခရီးစဉ်သည် ရုရှားနှင့် တရုတ်နိုင်ငံတို့ကြား မဟာဗျူဟာ မိတ်ဖက်ဆက်ဆံရေး၏ အရေးပါမှုကို ထင်ဟပ်စေပြီး နိုင်ငံတကာ ပြည်သူ့အဆင့်တွင် ပူးပေါင်းဆောင်ရွက်မှုများ ပိုမိုခိုင်မာလာစေရန် ရည်ရွယ်ချက်ဖြင့် ဆောင်ရွက်လျက်ရှိကြောင်း ဖော်ပြနေပါသည်။

ကိုးကား - security council of Russia

ရုရှားနှင့် အမေရိကန်တို့ကြား သံရုံးပြန်လည်ဖွင့်လှစ် လည်ပတ်ရေးနှင့် စပ်လျဉ်း၍ နှစ်နိုင်ငံစလုံးမှ သံတမန်များက ဖေဖော်ဝါရီလ ၂၇ ရက်တွင် တူကီယဲနိုင်ငံ အစ္စတန်ဘူမြို့ရှိ အမေရိကန်ကောင်စစ်ဝန်ချုပ်ရုံး၌ တွေ့ဆုံဆွေးနွေးခဲ့ကြောင်း သိရသည်။

ယခုစတင်ကျင်းပသည့် တွေ့ဆုံဆွေးနွေးပွဲသည် အမေရိကန်သမ္မတ ဒေါ်နယ်ထရမ့်နှင့် ရုရှားသမ္မတ ဗလာဒီမာပူတင်တို့ကြား ပြုလုပ်သည့် ဖုန်းမှတစ်ဆင့်ပြောဆို ဆွေးနွေးမှုအတွင်း သဘောတူညီချက်  ချမှတ်ခဲ့ပြီးနောက် ထွက်ပေါ်လာခြင်းဖြစ်သည်။

နှစ်နိုင်ငံသံရုံးများ  ပြန်လည်ဖွင့်လှစ်နိုင်ရေးနှင့် စပ်လျဉ်း၍ ရုရှားနှင့် အမေရိကန်နိုင်ငံတို့မှ အရာရှိများက ယခင်အမေရိကန် အစိုးရလက်ထက်  လုပ်ဆောင်ခဲ့သည့်တရားမဝင် လုပ်ဆောင်မှုများကြောင့်ဖြစ်ပွားခဲ့ရသည့် နည်းပညာဆိုင်ရာ အခက်အခဲများကို ဖြေရှင်းနိုင်ရန်အတွက် အစ္စတန်ဘူမြို့တွင် တွေ့ဆုံဆွေးနွေးခဲ့သည်ဟု အန်ကာရာမြို့ရှိ အမေရိကန်သံရုံးမှ အရာရှိ တစ်ဦးက အတည်ပြုထားသည်။

အဆိုပါတွေ့ဆုံမှုသည် ၆ နာရီကျော်ကြာမြင့်ခဲ့ပြီး ဒေသစံတော်ချိန် ညနေ ၄ နာရီ ၂၀ မိနစ်တွင် ပြီးဆုံးခဲ့ကြောင်း သိရသည်။

အဆိုပါတွေ့ဆုံ ဆွေးနွေးပွဲသည် နှစ်နိုင်ငံသံတမန် ဆက်ဆံရေးကို ထိရောက်စွာနှင့် လျင်မြန်စွာဖြင့် ရှေ့သို့တက်လှမ်းနိုင်စေရေး လမ်းဖွင့်ပေးနိုင်မည်ဟူသော မျှော်လင့်ချက်များကို ထွက်ပေါ်လာစေခဲ့ကြောင်း သိရသည်။

ရုရှားနှင့် အမေရိကန်နိုင်ငံတို့သည် လက်ရှိတွင် သက်ဆိုင်ရာ သံအမတ်များကို အမြန်ဆုံးခန့်အပ် တာဝန်ပေးရန်စီစဉ်လျက် ရှိကြောင်း သိရသည်။ 

Source: Myawady Web Portal

ရုရှားသမ္မတ ဗလာဒီမာပူတင်သည် မြောက်ကိုရီးယားအာဏာရ အလုပ်သမားပါတီ၏ ဗဟိုကော်မတီ အတွင်းရေးမှူးဖြစ်သူ Ri Hi Yong အား ဖေဖော်ဝါရီလ ၂၇ ရက်နေ့တွင် ကရင်မလင်နန်းတော်၌ လက်ခံ တွေ့ဆုံခဲ့ ပါသည်။ ဤသည်မှာ နှစ်နိုင်ငံစစ်ဘက်ဆက်ဆံရေး ပိုမိုနက်ရှိုင်းလာသည့် နည်းတူ ပြုံယမ်းသည် မော်စကိုအတွက် မည်မျှအရေးကြီးကြောင်းကို ပြသလိုက်ခြင်းပင်ဖြစ်ကြောင်း ရုရှားသမ္မတရုံးမှ ထုတ်ဖော်ပြောကြားခဲ့ပါသည်။ရုရှားနှင့် မြောက်ကိုရီးယားတို့သည် အရေးပေါ်အခြေအနေများတွင် တစ်နိုင်ငံနှင့်တစ်နိုင်ငံ စစ်ရေးဆိုင်ရာ အကူအညီ များအပါအဝင် အခြားအကူအညီများပေးရေးဆိုင်ရာ ဘက်စုံမဟာဗျူဟာမိတ်ဖက် ဆက်ဆံရေးစာချုပ်ကို ယခင်နှစ်က ချုပ်ဆိုခဲ့ကြပြီး မြောက်ကိုရီးယားအနေဖြင့် ယူကရိန်းစစ်ပွဲအတွက် ရုရှားအားအထောက်အပံ့ဖြစ်စေရန် ၎င်း၏ တပ်ဖွဲ့များကို စေလွှတ်ပေးခဲ့သည်။ထို့အပြင် ဖေဖော်ဝါရီလ ၂၅ ရက်နေ့တွင် မြောက်ကိုရီးယား ကိုယ်စားလှယ်အဖွဲ့အား အာဏာရ ရုရှားညီညွတ်ရေးပါတီမှ အဆင့်မြင့်အရာရှိကြီးက မော်စကိုတွင် လက်ခံတွေ့ဆုံခဲ့ပြီး ယူကရိန်းဒေသ အထူးစစ်ဆင်ရေးတွင် ပြုံယမ်း၏ ပံ့ပိုးကူညီမှုအတွက် ကျေးဇူးတင်စကားပြောကြားခဲ့ကြောင်း NHK သတင်းစာမျက်နှာတွင် ရေးသားဖော်ပြထားပါသည်။

ကိုးကား- NHK World

ဘာသာပြန်ဆိုသူ-ဦးထက်ထက်အောင်၊ နစက-၄

ရုရှားနိုင်ငံနှင့် အမေရိကန်ပြည်ထောင်စုအကြား ဆက်ဆံရေး တိုးတက်လာစေရန် ဖင်လန်နိုင်ငံနှင့် ဆွီဒင်နိုင်ငံတို့ကို မြောက်အတ္တလန္တိတ် စာချုပ်အဖွဲ့(နေတိုး)မှ ဖယ်ရှားရန် ဒေါ်နယ်ထရမ့်က ဖိအားပေး တောင်းဆိုလာနိုင်ကြောင်း ဖင်လန်နိုင်ငံ နိုင်ငံတကာရေးရာကျွမ်းကျင်သူ Jussi Lassila က ပြောကြားလိုက်ပါသည်။

ပြီးခဲ့သည့်ဖေဖော်ဝါရီ ၁၂ ရက် ဗလာဒီမာပူတင်နှင့် ဒေါ်နယ်ထရမ့်တို့သည် တယ်လီဖုန်းဖြင့် ဆွေးနွေးခဲ့ကြရာ ယူကရိန်းစစ်ပွဲဖြစ်ပွားရသည့် အခြေခံ အကြောင်းအရင်းကို ဖယ်ရှားပေးရန် လိုအပ်ကြောင်း ထည့်သွင်း ပြောကြားခဲ့သည်ကို ကရင်မလင်ထုတ်ပြန်ချက်အရ သိရှိရပါကြောင်း၊ ဒေါ်နယ် ထရမ့်သည် ရုရှားနှင့်ဆက်ဆံရေးတိုးတက်လာစေရန် ၁၉၉၇ ခုနှစ် နောက်ပိုင်း နေတိုးအဖွဲ့၏အနေအထား ရောက်ရှိအောင် လုပ်ဆောင်လာနိုင်ကြောင်း၊ မိမိတို့အနေဖြင့် လက်ရှိအခြေအနေတွင် သည်းခံမှုကို ထိန်းသိမ်းကြရန် လိုအပ်ကြောင်း ကျွမ်းကျင်သူက ပြောကြားခဲ့ပါသည်။

ဖင်လန်နိုင်ငံသည် ၂၀၂၃ ခုနှစ်၊ ဧပြီလတွင် နေတိုးအဖွဲ့ဝင်ဖြစ်လာပြီး၊ ဆွီဒင်နိုင်ငံသည် ၂၀၂၃ ခုနှစ်၊ မေလတွင် နေတိုးအဖွဲ့ဝင် ဖြစ်ခဲ့ပါသည်။               

၁၉၉၇ ခုနှစ်၊ မေလ ၅ ရက်တွင် နေတိုးနှင့် ရုရှားအကြား NOTO- Russia Founding Act စာချုပ်ကို လက်မှတ်ရေးထိုးခဲ့ကြသည်။ ထိုစာချုပ်မှာ နေတိုးနှင့် ရုရှားအကြား အငြင်းပွားမှုများကို စုပေါင်းဖြေရှင်းရန်နှင့် လုံခြုံရေးပူးပေါင်းဆောင်ရွက်မှုများ တိုးတက်လာစေရန် ရည်ရွယ်ခဲ့ရာ ဥရောပလုံခြုံရေးအတွက် လွန်စွာအရေးပါလှပါသည်။ 

“ထိုစာချုပ်အရ နေတိုးသည် အဖွဲ့ဝင် တိုးချဲ့ခွင့် ရရှိခဲ့ကြသည်။ အမှန်တကယ်တွင် နေတိုး၏ အဖွဲ့ဝင်တိုးချဲ့မှုမှာ ရုရှားအတွက် ခံယူရန် မလွယ်ကူခဲ့ပေ။ နောက်ပိုင်းတွင် နေတိုးအဖွဲ့ဝင်ဖြစ်လာကြသည့် ပိုလန်၊ ဟန်ဂေရီနှင့် ချက်ကိုစလိုဗက်ကီးယားတို့သည် ရုရှားအတွက် လုံခြုံရေးအန္တရာယ်ဖြစ်လာမည်” ဟု ရုရှားက မျှော်မှန်းခဲ့သည်။ စာချုပ်အရ ၁၉၉၇ ခုနှစ်က နှစ်ဘက်အကြား ပူးပေါင်းဆောင်ရွက်မှု တိုးတက်လာခဲ့ခြင်းရှိခဲ့သော်လည်း နောက်ပိုင်းတွင် နေတိုးအဖွဲ့ဝင်များ တိုးချဲ့လာမှုမှာ ရုရှားအတွက် နာကျင်စရာ ဖြစ်လာခဲ့ပါတော့သည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ယူကရိန်းငြိမ်းချမ်းရေး ဆွေးနွေးပွဲများအတွင်း အမေရိကန်သည် ရုရှား အပေါ်ချမှတ်ထားသည့် ပိတ်ဆို့အရေးယူမှုများကို တစ်ချိန်ချိန်၌ ရုတ်သိမ်း နိုင်သည်ဟု အမေရိကန်သမ္မတဒေါ်နယ်ထရမ့်က ပြောကြားခဲ့ပါသည်။ သို့သော် ရုရှားအပေါ် ပိတ်ဆို့အရေးယူမှုများ ရုတ်သိမ်းနိုင်ခြေနှင့် ပတ်သက်၍ လက်ရှိအချိန်အထိ ဆုံးဖြတ်ချက်ချထားခြင်း မရှိသေးကြောင်း ၎င်းကပြောကြားခဲ့ပါသည်။

ရုရှား-ယူကရိန်း ပဋိပက္ခစတင်ဖြစ်ပွားခဲ့သည့် ၂၀၂၂ ခုနှစ်၊ ဖေဖော်ဝါရီလ နောက်ပိုင်းမှစတင်ပြီး အမေရိကန်နှင့် အနောက်အုပ်စုနိုင်ငံများသည် ရုရှားအပေါ် ပိတ်ဆို့အရေးယူမှု အများအပြား ချမှတ်ခဲ့ခြင်းလည်း ဖြစ်ပါသည်။ သို့သော် အဆိုပါပိတ်ဆို့အရေးယူမှုများသည် တရားမဝင်ကြောင်း နှင့်ရုတ်သိမ်းပေးရန် ရုရှားဘက်က အကြိမ်ကြိမ်တောင်းဆိုခဲ့ကြောင်းလည်း သိရပါသည်။

ယူကရိန်းပဋိပက္ခအတွက် တည်မြဲပြီး ရေရှည်တည်တံ့သည့် ဖြေရှင်းချက် ကို ရှာဖွေနိုင်ရန်အတွက် အနောက်အုပ်စုနိုင်ငံများသည် ရုရှားအပေါ် ပိတ်ဆို့အရေးယူမှုများကို ရုတ်သိမ်းရန် စဉ်းစားရလိမ့်မည်ဟု လွန်ခဲ့သော ရက်ပိုင်းက အမေရိကန် နိုင်ငံခြားရေးဝန်ကြီး မာကိုရူဘီအို က အကြံပြု ပြောဆိုခဲ့ပြီးနောက် ဒေါ်နယ်ထရမ့်၏ပြောဆိုချက်များ ထွက်ပေါ်လာခြင်း ဖြစ်ပါသည်။

ကိုးကား-NP News