နှစ်နိုင်ငံပူးပေါင်းဆောင်ရွက်ရေးဆိုင်ရာကိစ္စရပ်များ၊ ဆီးရီးယား၏ နောက်ဆုံးဖွံ့ဖြိုးတိုးတက်မှုအခြေအနေများနှင့်စပ်လျဉ်း၍ ဆွေးနွေးရန်အတွက် ကာတာဝန်ကြီးချုပ်နှင့် နိုင်ငံခြားရေးဝန်ကြီး Mohammed bin Abdulrahman Al Thani နှင့် ဆီးရီးယား ကြားဖြတ်အစိုးရ၏ နိုင်ငံခြားရေးဝန်ကြီး Assd al-Shibani တို့ ဖေဖော်ဝါရီ ၂၃ ရက်က ဒိုဟာမြို့၌ တွေ့ဆုံခဲ့ကြကြောင်း ကာတာ နိုင်ငံခြားရေးဝန်ကြီးဌာန၏ ထုတ်ပြန်ချက်အရ သိရှိရပါသည်။

ထိုသို့တွေ့ဆုံရာတွင် နှစ်နိုင်ငံပူးပေါင်းဆောင်ရွက်မှု တိုးမြှင့်လုပ်ဆောင်ရန်ကိစ္စရပ်များ၊ ဆီးရီးယားဒေသဖွံ့ဖြိုး တိုးတက်ရေးအတွက် ဖြေရှင်းဆောင်ရွက်ရန်ကိစ္စရပ်များနှင့် နှစ်နိုင်ငံအကျိုးတူ ပူးပေါင်းဆောင်ရွက်ရေးဆိုင်ရာကိစ္စရပ် များကို အလေးထားဆွေးနွေးခဲ့ကြပါသည်။

ဆွေးနွေးပွဲတွင် ကာတာဝန်ကြီးချုပ် Al Thani က ဆီးရီးယား၏ ပြန်လည်ပေါင်းစည်းရေး၊ အချုပ်အခြာ အာဏာပိုင်ဆိုင်မှုနှင့် လွတ်လပ်မှုတို့အပေါ် ခိုင်မြဲစွာ ပံ့ပိုးဆောင်ရွက်သွားမည့်အပေါ် ထပ်လောင်းအတည်ပြုခဲ့ပြီး ဆီးရီးယားပြည်သူများ၏ ပြင်းပြသည့်ဆန္ဒဖြစ်သည့် ဂုဏ်သိက္ခာရှိရှိ ရှင်သန်နေထိုင်နိုင်ရေး၊ အစိုးရသစ် တစ်ရပ် ဖော်ဆောင်ရေးနှင့် တရားဥပဒေစိုးမိုးရေး၊ ဆီးရီးယားဒေသ ပြည်လည်တည်ဆောက်ရေး၊ ဖွံ့ဖြိုးတိုးတက်ရေးနှင့် တည်ငြိမ်အေးချမ်းရေးစသည့် လုပ်ငန်းစဉ်များတွင် ကာတာနိုင်ငံမှ ပံ့ပိုးဆောင်ရွက်ပေးသွားမည့် ကတိကဝတ်များကို အတည်ပြုနိုင်ခဲ့ကြောင်း Xinhua သတင်းဌာနက ရေးသားဖော်ပြထားပါသည်။

ကိုးကား- Xinhua.net            

Source- https://english.news.cn/20250224/31c827eebb694d3cb019753e921b7a54/c.html

ဘာသာပြန်ဆိုသူ-ဦးထက်ထက်အောင် (နစက-၄)

ဖေဖော်ဝါရီ ၂၄ ရက်တွင် ကျရောက်သော ရုရှား- ယူကရိန်းစစ်ပွဲ ၃ နှစ်ပြည့်မြောက် အစီအစဉ်အဖြစ် ဥရောသမဂ္ဂက ရုရှားအပေါ်   ၁၆ ကြိမ် မြောက် ဒဏ်ခတ်ပိတ်ဆို့မှုချမှတ်လိုက်ပါသည်။

ထိုဒဏ်ခတ်ပိတ်ဆို့မှုတွင်   ရုရှားလေဆိပ် ၆ ခုနှင့် ဆိပ်ကမ်း ၅ ခု စုစုပေါင်း ၁၁ ခုကို ဥရောပကုမ္ပဏီများက အသုံးမပြုရန် တားမြစ် ပိတ်ပင်ခြင်းတို့ ပါဝင်ပါသည်။ 

ထို့ပြင် ရုရှားသို့ စွမ်းအင်စီမံကိန်းများနှင့် စစ်ဘက်ဆိုင်ရာများအတွက် အသုံးဝင်သည့် တွင်းထွက်သတ္တုများ၊ ဓာတုဗေဒပစ္စည်းများ၊ သံမဏိ၊ ဖန်ထည်ပစ္စည်းများနှင့် မီးရှုးမီးပန်းများစသည် ပစ္စည်းအများအပြား တင်သွင်းမှုများကိုလည်း  ထပ်မံ ဒဏ်ခတ်ပိတ်ဆို့လိုက်ပါသည်။ ၎င်းမှာ ရုရှားက စစ်ပွဲအတွက် အသုံးပြုနေသော စစ်ဘက်ဆိုင်ရာ အရင်းအမြစ်များကို ထိခိုက်စေရန်နှင့် ကျူးလွန်နေမှုများကို ချက်ချင်းရပ်တန့်စေရန် ရည်ရွယ်ထားကြောင်း ဥရောပသမဂ္ဂ ကြေညာချက်တွင် ဖော်ပြထားပါသည်။

ကိုးကား- TASS

Photo: enlargement.ec.europa.eu

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်သမ္မတဒေါ်နယ်ထရမ့် အစိုးရအဖွဲ့သည်  အမေရိကန် နိုင်ငံတကာဖွံ့ဖြိုးရေးအစီအစဉ်အေဂျင်စီ(United State Agency for International Development - USAID) ရှိ ဝန်ထမ်းများ အမြောက်အမြားကို အလုပ်မှ လျှော့ချမည့် အစီအစဉ်ကို ဖေဖော်ဝါရီ ၂၄ ရက်မှ စတင်ပြီဖြစ်ကြောင်း၊ အရေးကြီးလုပ်ငန်းများ ဆောင်ရွက်ရန် အေဂျင်စီမှ တိုက်ရိုက်ခန့်အပ်ထားသည့် အဖွဲ့ခေါင်းဆောင်များ၊ သီးခြားတာဝန်ပေးချက် အရ ဆောင်ရွက်နေသူ ဝန်ထမ်းများကိုသာ ကမ္ဘာလုံးဆိုင်ရာ စီမံခန့်ခွဲမှု အဆင့်အနေဖြင့် ချန်လှပ်ထားခဲ့မည်ဖြစ်ကြောင်း အဆိုပါအေဂျင်စီ၏  website တွင် ဖေဖော်ဝါရီ ၂၄ ရက်က ကြေညာထားပါသည်။

တစ်ချိန်တည်းမှာပင် အေဂျင်စီအနေဖြင့် အမေရိကန်နိုင်ငံရှိ ဌာနခွဲများရှိ ဝန်ထမ်း ၁,၆၀၀ ခန့်ကို လျှော့ချမည့် အစီအစဉ်ကို စတင်ဆောင်ရွက်နေပြီဖြစ်ကြောင်း သိရှိရပါသည်။ ဖေဖော်ဝါရီ ၆ ရက် သတင်းဌာန များစွာ၏ ထုတ်ပြန်ချက်အရ ၁၀,၀၀၀ မှ ၁၃,၀၀၀ ကြားရှိ ဝန်ထမ်းများကို ၂၉၄ ဦးသာ ရှိသည်အထိ လျှော့ချမည်ဖြစ်ကြောင်း သိရှိရပါသည်။ 

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားနှင့် စစ်ပွဲစတင်ဖြစ်ပွားပြီးနောက်ပိုင်း အမေရိကန်နိုင်ငံထံမှ ရရှိထားသည့် အကူအညီများအတွက် ယူကရိန်းက ငွေကြေးများ ပြန်ပေးမည် မဟုတ်ဟု ဇီလန်စကီးက ထုတ်ဖော်ပြောဆိုခဲ့ပါသည်။ထို့အပြင် ယူကရိန်း သည် အမေရိကန်ဒေါ်လာ ၃၅၀ ဘီလီယံကျော် အကြွေးတင်နေသည် ဆိုသည့် အမေရိကန်သမ္မတဒေါ်နယ်ထရမ့်၏ ခန့်မှန်း ပြောဆိုချက်များ သည် ချဲ့ကားပြောဆိုချက်များသာ ဖြစ်ကြောင်း ဇီလန်စကီးက ထပ်မံ ပြောဆိုခဲ့ပါသည်။

လွန်ခဲ့သောသီတင်းပတ်များအတွင်း ဒေါ်နယ်ထရမ့်သည် ရုရှား-ယူကရိန်း စစ်ပွဲဖြစ်ပွားချိန်မှစတင်၍ ထောက်ပံ့ပေးခဲ့သော အကူအညီများအားလုံး အတွက် ယူကရိန်းကို ငွေကြေးတောင်းခံမှုများ အရှိန်မြှင့်လုပ်ဆောင်ခဲ့ကြောင်း သိရပါသည်။ ထို့အပြင် ယူကရိန်း၌ ငွေကြေးပြတ်လပ်နေမည်ဆိုပါက လျော်ကြေးငွေပုံစံအဖြစ် ၎င်း၏သဘာဝ သယံဇာတဆိုင်ရာ လုပ်ပိုင်ခွင့်များကို ယူကရိန်းက လက်မှတ်ရေးထိုးသင့်သည်ဟု ဒေါ်နယ် ထရမ့်က မှတ်ချက်ပြုပြောဆိုခဲ့ပါသည်။

သို့သော် ဒေါ်နယ်ထရမ့်၏တောင်းဆိုချက်များအားလုံးကို ဇီလန်စကီးက ငြင်းဆန်ပယ်ချခဲ့သည်ဟုလည်း သိရပါသည်။ ဇီလန်စကီးက “ယူကရိန်း သည် အကူအညီအဖြစ် အမေရိကန်ဒေါ်လာ ၁၀၀ ဘီလီယံကိုသာ ရရှိခဲ့ကြောင်း၊ အမေရိကန်ဒေါ်လာ ၃၅၀ ဘီလီယံ၊ ၅၀၀ ဘီလီယံ၊ ၇၀၀ ဘီလီယံ ရရှိခဲ့ခြင်းမရှိပါကြောင်း၊ ယူကရိန်းက ၎င်းအမေရိကန်ဒေါ်လာ ၁၀၀ ဘီလီယံကို အကြွေးဟု သတ်မှတ်ထားခြင်း မဟုတ်ဘဲ ထောက်ပံ့ငွေအဖြစ် အမေရိကန်သမ္မတဟောင်း ဂျိုးဘိုင်ဒင်နှင့် သဘောတူညီမှုရရှိခဲ့ခြင်းဖြစ်၍ ပြန်ဆပ်ရန်လည်း မျှော်လင့်မထားကြောင်း” ပြောဆိုခဲ့ပါသည်။

ကိုးကား-NP News

ဂျာမနီနိုင်ငံ၏ ကြားဖြတ်ရွေးကောက်ပွဲတွင် Alternative for Germany (AFD) သည် ထောက်ခံမှု ၂၀.၅% နှုန်းဖြင့် ဒုတိယနေရာကိုရရှိနိုင်မည်ဟု အစိုးရမှ ရုပ်သံလိုင်း ARD မှ ထုတ်ပြန်ချက်တစ်ခုအရ ခန့်မှန်းထားပြီး ခရစ်စတီယန်-ဒီမိုကရက် CDU/CSU ပါတီသည် ၂၈% ကျော်နှုန်းဖြင့် အနိုင်ရမည်ဟု ခန့်မှန်းထားသည်။

ဝန်ကြီးချုပ် Olaf Scholz ၏ လူမှုဒီမိုကရက်ပါတီသည် ၁၆.၄% ရရှိမည်ဟု ခန့်မှန်းထားပြီး၊ အတည်ပြုပါက ၁၉၄၉ ခုနှစ်နောက်ပိုင်း အဆိုးဆုံးရလဒ်ဖြစ်လာမည်ဖြစ်ပြီး  Financial Times ၏ အဆိုအရ ယင်းပါတီသည် ၁၈၈၇ ခုနှစ်နောက်ပိုင်း အဆိုးရွားဆုံး ရှုံးနိမ့်မှုကို ရင်ဆိုင်ရမည်ဟု ဆိုသည်။ SPD ၏ မိတ်ဖက်ပါတီဖြစ်သော Greens သည် ထောက်ခံမှု ၁၂% ရရှိခဲ့ပြီး၊ FDP သည် ၄.၇% အထက်ရရှိခဲ့သည်ဟု ARD ၏ ထုတ်ပြန်ချက်တွင် ဖော်ပြထားသည်။  The Left သည် ၈.၆% ရရှိနိုင်မည်ဟု ခန့်မှန်းထားပြီး ၊ ဇန်နဝါရီလတွင် တည်ထောင်ခဲ့သော Sahra Wagenknecht Alliance သည် ၄.၉% ရရှိနိုင်မည်ဟု ARD ဖော်ပြမှုအရ သိရှိရသည်။

၂၀၂၁ ခုနှစ် ရွေးကောက်ပွဲနှင့် နှိုင်းယှဉ်လျှင် AFD သည် အကြီးမားဆုံး အနိုင်ရမည်ဖြစ်ပြီး ၉.၁% တိုးတက်မှု ရရှိမည်ဟု ခန့်မှန်းထားသည်။ CDU သည် ၄.၉% တိုးတက်ခဲ့ပြီး၊ Scholz ၏ လူမှုဒီမိုကရက်ပါတီသည် ၉.၇% လျော့နည်းမည်ဟု ခန့်မှန်းထားသည်။ Greens သည် ၁.၂% လျော့နည်းမည်ဖြစ်ပြီး FDP သည် ၆.၅% လျော့နည်းမည်ဟု ခန့်မှန်း ထားသည်။

နောက်ဆုံးလများတွင် ပြုလုပ်ခဲ့သော စစ်တမ်းများအရ လက်ရှိအာဏာရ (Traffic-Light Coalition) မှ Greens ပါတီသည် လူထုထောက်ခံမှု ကျဆင်းလာနေကြောင်း သိရှိရသည်။

ARD ဖော်ပြမှုအရ AFD သည် ဂျာမန်လွှတ်တော်တွင် ၆၃၀ ရာခိုင်နှုန်း အနက် ၁၅၀ ကို ရရှိနိုင်ပြီး CDU/CSU သည် ၂၀၈ ကို ရရှိနိုင်မည်ဟု ခန့်မှန်းထားသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဝါရှင်တန်သည် လာမည့်အပတ်တွင် ယူကရိန်းနှင့် သတ္တုတူးဖော်ရေး သဘောတူညီချက်ကို လက်မှတ်ရေးထိုးရန် မျှော်လင့်ထားကြောင်း အမေရိကန်သမ္မတ၏ အထူးကိုယ်စားလှယ် Steve Witkoff က ပြောကြားခဲ့ပါသည်။

Witkoff က CNN သတင်းဌာန သို့ပြောကြားရာတွင် “မိမိသည် အဆိုပါ သဘောတူညီချက်ကို ယခုအပတ်အတွင်း လက်မှတ်ရေးထိုးရန် မျှော်လင့် ထားပါကြောင်း၊ သမ္မတဇီလန်စကီးသည် လွန်ခဲ့သော တစ်ပတ်က ၎င်း၏ ကတိကဝတ်ကို ယိမ်းယိုင်နေခဲ့သော်လည်း သမ္မတ ဒေါ်နယ်ထရမ့်ထံမှ သတင်းစကားရရှိခဲ့ပြီးနောက် ယခုအခါတွင် နောက်ထပ်၎င်း၏ ကတိစကားသည် ယိမ်းယိုင်နေခြင်း မရှိတော့ကြောင်း ပြောကြားခဲ့ပါသည်။

အဆိုပါသဘောတူညီချက်သည် အမေရိကန်မှ ထောက်ပံ့ရေးတွင် ယူကရိန်းအတွက် သုံးစွဲခဲ့သည့် ကုန်ကျငွေများကို ပြန်လည်ရယူရန် ရည်ရွယ်ထားကြောင်း အမေရိကန်သမ္မတ၏ အထူးကိုယ်စားလှယ် Steve Witkoff ပြောကြားခဲ့ပါသည်။

“မိမိတို့သည် အများကြီးလုပ်ဆောင်ခဲ့ပြီးနောက် ထိုသဘောတူညီချက်သည် လက်မှတ်ရေးထိုးသင့်သည်ဟု ၎င်းနားလည်သွားပြီဖြစ်ကြောင်း” ယူကရိန်း သမ္မတဇီလန်စကီး ကပြောကြားခဲ့ပါသည်။

ဖေဖော်ဝါရီလ၂၁ရက် (စနေနေ့)တွင်အမေရိကန်သည် အဆိုပါ သဘောတူညီချက်ကို ချုပ်ဆိုရန် နီးကပ်နေပြီဖြစ်ကြောင်း အမေရိကန်သမ္မတက ပြောကြားခဲ့ပါသည်။ ထို့အပြင် ဝါရှင်တန်သည် ယူကရိန်းအတွက် ထောက်ပံ့ငွေများအတွက် သုံးစွဲခဲ့သည့် ငွေကြေးများကို ပြန်လည်ရယူနိုင်မည်ဟု ယုံကြည်ကြောင်း ၎င်းကပြောကြားခဲ့ပါသည်။

ကိုးကား - TASS

ဘာသာပြန်ဆိုသူ-ရုရှားပညာတော်သင်ကျောင်းသားများ

Tesla နှင့် SpaceX CEO Elon Musk သည် Reuters အား “လိမ်လည်နေသည်” ဟုစွပ်စွဲပြီး သဘာဝအရင်းအမြစ်များနှင့် ပတ်သက်သည့် လက်ရှိညှိနှိုင်းမှုများတွင် အကျိုးကျေးဇူးရရှိစေရေး Starlink အင်တာနက်ဝန်ဆောင်မှုကို ဖြတ်တောက်ရန် ခြိမ်းခြောက်သည့် အစီအစဉ်များအကြောင်း Reuters ၏ သတင်းဖော်ပြခဲ့မှုကို ငြင်းဆို ခဲ့သည်။

Reuters သည် ဖေဖော်ဝါရီ ၂၂ ရက်နေ့တွင် ထိုအစီအစဉ်များနှင့် ရင်းနှီးကျွမ်းဝင်သည့် အမေရိကန်တာဝန်ရှိသူ ၃ ဦး၏ ပြောကြားချက်များကို ကိုးကားသည်ဟုဆိုကာ အဆိုပါကိစ္စနှင့် ပတ်သက်သည့် သတင်းကို ဖော်ပြခဲ့သည်။ယူကရိန်းခေါင်းဆောင် Vladimir Zelensky နှင့် Trump ၏ကိုယ်စားလှယ် Keith Kellogg တို့အကြား လွန်ခဲ့သော သီတင်းပတ်က Kiev တွင် ကျင်းပခဲ့သည့်အစည်းအဝေး၌ ဝါရှင်တန်နှင့် ရှားပါးသတ္တုများဆိုင်ရာ သဘောတူညီချက်ကို လက်မှတ်မထိုးပါက Musk ၏ Starlink ဂြိုလ်တုဝန်ဆောင်မှုကို “ချက်ချင်းပိတ်ပစ်မည်” ဟု ခြိမ်းခြောက်ခဲ့သည်ဟု Reuters က ဖော်ပြခဲ့သည်။

Musk သည် ထိုနေ့နောက်ပိုင်းတွင် ၎င်း၏လူမှုမီဒီယာပလက်ဖောင်း X ၌ ထိုသို့သောအစီအစဉ်များမရှိကြောင်း ငြင်းပယ်ခဲ့ပြီး Reuters အား “လိမ်လည်နေသည်” ဟု စွပ်စွဲခဲ့သည်။

အဆိုပါသတင်းသည် သတင်းအမှားဖြစ်ပြီး Reuters က လိမ်လည်ဖော်ပြ ခြင်းဖြစ်ကြောင်းနှင့် Reuters သည် AP (Associated Propaganda) ကဲ့သို့သော အစဉ်အလာဖြင့် သတင်းမှားများကို ထုတ်ပြန်နေသောဌာန ဖြစ်သည်ဟု Musk က ရေးသားခဲ့သည်။

ကိုးကား-RT

အမေရိကန်အစိုးရဝန်ထမ်းများအားလုံးထံသို့ “ပြီးခဲ့သည့်အပတ်က သင် ဘာတွေလုပ်ခဲ့သလဲ” ခေါင်းစဉ်ဖြင့် အီးမေးလ်တစ်စောင်ဝင်လာပါကြောင်း၊ သင့်အနေဖြင့် ရှေ့အပတ်က အလုပ်ပြီးမြောက်ခဲ့မှုများကို ဖေဖော်ဝါရီ ၂၄ ရက်(တနင်္လာနေ့)ည နောက်ဆုံးထား၍ မတင်ပြနိုင်လျှင် အလုပ်က နုတ်ထွက်ပြီးသား ဖြစ်သည်ဟု မှတ်ယူရမည်ဖြစ်ကြောင်း ဖော်ပြထား ပါသည်။

အဆိုပါအမိန့်ကို အမေရိကန်အစိုးရ စွမ်းဆောင်ရည် မြင့်မားရေးဌာန (DOGE) အကြီးအကဲ အီလွန်မက်က ၎င်း၏ X လူမှုကွန်ရက်တွင် ဦးစွာ ကြေညာထားပါသည်။

အီလွန်မက်ကြေညာပြီး နာရီပိုင်းအကြာတွင် သမ္မတဒေါ်နယ်ထရမ့်က ၎င်း၏ Truth Social လူမှုကွန်ရက်တွင် “DOGE အနေဖြင့် အမေရိကန် အစိုးရဝန်ထမ်း ၂.၃ သန်းကျော်ကို လျှော့ချဖို့ ယခုထက် ပိုပြီး ကြမ်းကြမ်း တမ်းတမ်း ကိုင်တွယ်သင့်ကြောင်း” မှတ်ချက်ပြု ထားပါသည်။ အီလွန်မက် ကလည်း “ဆောင်ရွက်သွားပါ့မည် သမ္မတကြီးခင်ဗျ” ဟု ပြန်လည် မှတ်ချက်ရေးသားထားပါသည်။

ထိုအမိန့်အရ အမေရိကန်အစိုးရဝန်ထမ်း အားလုံးအနေဖြင့် ပြီးခဲ့သည့် အပတ်က မိမိတို့ လုပ်ဆောင်ခဲ့ရသည့် ဆောင်ရွက်ပြီးစီးမှုကို အနည်းဆုံး အချက် ၅ ချက် ဖော်ပြ၍ ပေးပို့ရမည်ဖြစ်ပြီး မိမိအထက်လူကြီး သို့မဟုတ် မန်နေဂျာထံ မိတ္တူပေးပို့ရန် ဖော်ပြထားပါသည်။

ကိုးကား- Reuters

Photo: The Kathmandu Post

ဂျပန်နိုင်ငံခြားရေးဝန်ကြီး Iwaya Takeshi သည် G20 နိုင်ငံခြားရေးဝန်ကြီးများ အစည်းအဝေးတွင် ရာသီဥတုဖောက်ပြန်မှုနှင့် သဘာဝဘေး အန္တရာယ်များကဲ့သို့သော စိန်ခေါ်မှုများကို ကိုင်တွယ်ဖြေရှင်းနိုင်ရေး စည်းလုံး ညီညွတ်စွာဆောင်ရွက်ကြရန် တောင်းဆိုခဲ့ပါသည်။

ဖေဖော်ဝါရီ ၂၁ ရက်နေ့တွင် တောင်အာဖရိကနိုင်ငံ Johannesburg ၌ G20 နိုင်ငံခြားရေးဝန်ကြီးများ အစည်းအဝေးကို ကျင်းပခဲ့ကြခြင်း ဖြစ်ပါ သည်။

ငလျင်၊ တိုင်ဖွန်းမုန်တိုင်းနှင့် အခြားသဘာဝဘေးအန္တရာယ်များဆိုင်ရာ ကြိုတင်ပြင်ဆင်ရေးနှင့် ကိုင်တွယ်ရေးကိစ္စရပ်များတွင် ကူညီရန်အတွက် ဂျပန်နိုင်ငံ၏ ဘေးအန္တရာယ်လျှော့ချရေးနည်းပညာများအား နိုင်ငံတကာ အသိုင်းအဝိုင်းအတွက် ဂျပန်က မျှဝေသွားမည်ဟု Iwaya က ပြောကြား ခဲ့ပါသည်။

ကမ္ဘာလုံးဆိုင်ရာ စီးပွားရေးတိုးတက်ရေးနှင့် သာယာဝပြောရေးအတွက် အခြေခံအုတ်မြစ်အဖြစ် လွတ်လပ်ပြီးတရားမျှတသော စီးပွားရေးဆိုင်ရာ စည်းကမ်းလိုက်နာမှု အရေးပါပုံကိုလည်း ၎င်းက အလေးပေးပြောကြား ခဲ့ပါသည်။

၎င်းက ကမ္ဘာ့ကုန်သွယ်ရေးအဖွဲ့ ပြုပြင်ပြောင်းလဲရေးဆိုင်ရာ လေးနက်သည့် ဆွေးနွေးမှုများ ပြုလုပ်ရန်တောင်းဆိုခဲ့ပြီး အမေရိကန်သမ္မတ Donald Trump ၏ အကောက်ခွန်မြင့်တင်မည့် အစီအစဉ်များကို ရည်ညွှန်းခြင်း ဖြစ်သည်ဟု ယူဆရပါသည်။

ဩဂုတ်လ၌ ကျင်းပရန် စီစဉ်ထားသည့် တိုကျို - အာဖရိက ဖွံ့ဖြိုး တိုးတက်ရေး နိုင်ငံတကာညီလာခံနှင့်ပတ်သက်ပြီး Iwaya က ပြောကြားခဲ့ကာ G20 ၏ လုပ်ငန်းဆောင်တာများနှင့်အညီ ဂျပန်နိုင်ငံသည် အာဖရိကနိုင်ငံများနှင့် ပူးပေါင်းဆောင်ရွက်သွားမည်ဖြစ်ကြောင်းလည်း ပြောကြားခဲ့ပါသည်။

ကိုးကား-NHK World

ယူကရိန်းပဋိပက္ခတွင် ရုရှားနိုင်ငံက မှားယွင်းမှုမရှိကြောင်း အမေရိကန်သမ္မတ ဒေါ်နယ်ထရမ့်က ပြောကြားခဲ့ကြောင်း သိရသည်။

လက်ရှိဆက်လက်ဖြစ်ပွားနေသည့် ယူကရိန်းလက်နက်ကိုင် ပဋိပက္ခတွင် ရုရှားနိုင်ငံက မှားယွင်းခြင်းမရှိဘဲ ယင်းပဋိပက္ခနှင့် စပ်လျဉ်း၍ ယူကရိန်းသမ္မတ ဇီလန်စကီနှင့် ယခင်အမေရိကန်  သမ္မတဟောင်း ဂျိုးဘိုင်ဒင်တို့ကိုသာ အပြစ်တင်ရမည်ဖြစ်ကြောင်း ထရမ့်က ဖေဖော်ဝါရီလ ၂၁ ရက် တွင် Fox News  ရေဒီယိုနှင့် လုပ်ဆောင်သည့်    တွေ့ဆုံမေးမြန်းခန်း တစ်ခု၌ ပြောကြားသည်။

ထို့ပြင် ဂျိုးဘိုင်ဒင်နှင့် ဇီလန်စကီတို့သည် မှားယွင်းသည့် အကြောင်းအရာများကိုသာ ပြောဆိုခဲ့ပြီး ၎င်းတို့အနေဖြင့် စစ်ပွဲကိုရှောင်ရှားနိုင်ရေး အတွက် ရုရှားနိုင်ငံနှင့် အလွယ်တကူ ဆွေးနွေးနိုင်ခဲ့သော်လည်း ဆွေးနွေးခဲ့ခြင်းမရှိကြောင်း  ထရမ့်က ဆက်လက်ပြောကြားသည်။

ထိုသို့ ဆွေးနွေးခဲ့မည်ဆိုပါက ရုရှားသမ္မတ ဗလာဒီမာပူတင်အနေဖြင့် ယူကရိန်းပဋိပက္ခကို စတင်ရန်အကြောင်းရင်း မရှိကြောင်းနှင့် ယူကရိန်းစစ်ပွဲမှာလည်း ဖြစ်လာစရာ အကြောင်းမရှိဟု ထရမ့်က ပြောကြားခဲ့ကြောင်း သိရသည်။

Source: Myawady Web Portal