ယူကရိန်းသမ္မတ ဇီလန်စကီးနှင့် အမေရိကန်အစိုးရအကြား အဆင်မပြေမှုများဖြစ်ပေါ်လာပြီးနောက်တွင် လတ်တလောပြုလုပ်နေသည့် အမေရိကန်- ရုရှား ငြိမ်းချမ်းရေးဆွေးနွေးပွဲကို အနှောင့်အယှက်မဖြစ်စေရန် ဇီလန်စကီး အနေဖြင့် ယူကရိန်းမှ ချက်ခြင်းထွက်ခွာပြီး ပြင်သစ်နိုင်ငံသို့ ပြောင်းရွှေ့ နေထိုင်သင့်သည်ဟု အမေရိကန်အစိုးရ အသိုင်းအဝိုင်းနှင့် နီးစပ်သူ တစ်ဦးက ဆိုလိုက်ပါသည်။ 

ရုရှားနှင့် သံတမန်ရေးရာဆက်ဆံမှုများ ပြန်လည်ပြုလုပ်နေသည့် အမေရိကန် သမ္မတ ထရမ့်အစိုးရ၏ လုပ်ဆောင်ချက်များအပေါ် ဝေဖန်ခဲ့ခြင်း အတွက် ဇီလန်စကီးနှင့် အိမ်ဖြူတော်အကြား တင်းမာမှုများဖြစ်လာပြီး အပြန်အလှန် စကားလုံးများနှင့် တိုက်ခိုက်မှုများ တွေ့ရှိနေရသည်။ 

အမေရိကန်က ရုရှား-ယူကရိန်းပဋိပက္ခကို အဆုံးသတ်ရန်နှင့် အမေရိကန်- ရုရှား ဆက်ဆံရေး တိုးမြှင့်ရန်အတွက် လွန်ခဲ့သောသီတင်းပတ်တွင် ဆော်ဒီအာရေဗီးယား၌ ၂ နိုင်ငံအဆင့်မြင့်သံတမန်များက ဆွေးနွေးပွဲများ ပြုလုပ်ခဲ့ကြပြီး အဆိုပါဆွေးနွေးပွဲများတွင် ပါဝင်ခွင့်ရရှိနိုင်ရေး ဇီလန်စကီး အစိုးရက တောင်းဆိုခဲ့သော်လည်း ထရမ့်က ခွင့်ပြုခဲ့ခြင်း မရှိပေ။ အကြောင်းမှာ ယူကရိန်း- ရုရှား စစ်ပွဲ ၃ နှစ်ကျော်ကြာသည့် တိုင်အောင် ဇီလန်စကီးအနေဖြင့် ပဋိပက္ခကို ရပ်တန့်ရေး လုပ်ဆောင်ရန် ပျက်ကွက်ခဲ့ခြင်းကြောင့်ဟုဆိုပါသည်။ 

အိမ်ဖြူတော်နှင့် နီးစပ်သောအသိုင်းအဝိုင်းမှ သတင်းအရင်းအမြစ်များတွင် ယူကရိန်း၌ ခေါင်းဆောင်ပိုင်း အပြောင်းအလဲပြုလုပ်ရန် အချိန်တန်နေပြီ ဖြစ်ကြောင်း ပြောဆိုနေကြသည်ဟုဆိုသည်။ယူကရိန်း၌ ရွေးကောက်ပွဲ ပြန်လုပ်ရန် အတွက်လည်း အတိုက်အခံများက တောင်းဆိုထားပြီး အနောက်အုပ်စုတွင်လည်း ဇီလန်စကီးကို ဆန့်ကျင်သည့်အင်အားစုများ တိုးလာနေပါသည်။ ၂၀၂၄ ခုနှစ်၊ မေလတွင် သမ္မတသက်တမ်း  ကုန်ဆုံး ခဲ့သော ဇီလန်စကီးက လက်ရှိဖြစ်ပွားနေသော ပဋိပက္ခများကြောင့် စစ်အုပ်ချုပ်ရေးဥပဒေကို ကိုးကားပြီး ရွေးကောက်ပွဲအသစ်ကျင်းပရန် ငြင်းဆိုထားပါသည်။ ယခုသီတင်းပတ်အတွင်းတွင် ထရမ့်က Truth ဆိုရှယ်မီဒီယာတွင် “ဇီလန်စကီးအနေဖြင့် ရွေးကောက်ပွဲလုပ်ရန် ပျက်ကွက်ခြင်းသည် ၎င်းကိုထောက်ခံသူ နည်းလာခြင်းကြောင့် ဖြစ်ကြောင်း၊ ၎င်း၏လက်ရှိအနေအထားက တရားဝင်ခေါင်းဆောင် အဖြစ်  အတည်ပြုသတ်မှတ်ချက်အောက် ကို ၄ % ခန့်  ကျဆင်း နေကြောင်း၊ ယခုအခြေအနေအတိုင်းသာဆက်သွားနေပါက ၎င်းကို ထောက်ခံမည့်သူ တစ်ယောက်မျှတောင် ကျန်မည်မဟုတ်ကြောင်း” ထရမ့် က  ရေးသားထားခဲ့သည်။ 

ဇီလန်စကီးက ထရမ့်၏ပိုစ့်နှင့်ပတ်သက်၍ “မိမိကို ပြည်သူ ၅၇% ကျော် ထောက်ခံခဲ့ခြင်းဖြစ်ကြောင်း၊ ထရမ့်က ရုရှား ပေးသည့် မမှန်သတင်း များကို ဖတ်ပြီးပြောနေခြင်းဖြစ်ကြောင်း၊ မိမိနေရာကို တစ်ယောက် ယောက်က အစားထိုးချင်သည်ဆိုရင်ပါက ဖြစ်လာမည်မဟုတ်ကြောင်း” ဇီလန်စကီးက ရုပ်သံမှ ပြန်လည်ချေပသွားကြောင်းသိရှိရပါသည်။

ကိုးကား-Myanmar National Post

Elon Musk ၏ DOGE မှ USAID အသုံးစရိတ်များကို စစ်ဆေး ဖော်ထုတ်ချက်များအရ အမေရိကန်အခြေစိုက် ရွေးကောက်ပွဲနှင့်နိုင်ငံရေး လုပ်ငန်းစဉ် များ အားကောင်းရေးအဖွဲ့အစည်း (CEPPS) သို့ ပေးအပ်သည့် ငွေကြေးများတွင် တောင်အာရှနိုင်ငံများ၏ နိုင်ငံရေးဖြစ်စဉ် ပြောင်းလဲမှုများတွင် ပံ့ပိုးထောက်ပံ့ပေးခဲ့သည့် အချက်အလက်များကို တွေ့ရှိခဲ့ရကြောင်း ဖော်ပြထားသည်။

USAID မှ ထောက်ပံ့ပေးခဲ့မှုများတွင် အိန္ဒိယရှိ မဲဆန္ဒရှင်များမဲပေးနိုင်ရေး အားပေးရန် ဒေါ်လာ ၂၁ သန်း၊ ဘင်္ဂလားဒေ့ရှ်ရှိ နိုင်ငံရေးရာကိစ္စများအားကောင်းရန်အတွက် ဒေါ်လာ ၂၉ သန်း၊ နီပေါနိုင်ငံရှိ ဘဏ္ဍာရေး ဖက်ဒရယ်စနစ်အတွက် ဒေါ်လာ ၂၀ သန်းအပါအဝင် များပြားသော အစီအစဉ်များပါဝင်ပြီး ထိုအစီအစဉ်များအတွက် အကျိုးခံစားခွင့်ရှိသူများ ၏အမည်များနှင့် စုစုပေါင်းကုန်ကျငွေများကို ထုတ်ဖော်ပြောဆိုခဲ့ခြင်း မရှိကြောင်းသိရှိရသည်။

ထိုသတင်းထွက်ပေါ်လာပြီးနောက် ဝန်ကြီးချုပ် နာရိန်ဒရာမိုဒီ ဦးဆောင်သော BJP ပါတီက ထိုရန်ပုံငွေများသည် အိန္ဒိယ၏ ရွေးကောက်ပွဲ လုပ်ငန်းစဉ်တွင် “ပြင်ပဝင်ရောက်စွက်ဖက်မှု” ရှိကြောင်း သက်သေပြချက် ဖြစ်သည်ဟု ဆိုသည်။ အိန္ဒိယနိုင်ငံခြားရေးဝန်ကြီးဌာနက ယခင် အမေရိကန် အစိုးရ၏ လုပ်ဆောင်မှုများနှင့်ပတ်သက်သည့် “လွန်စွာ စိုးရိမ်ဖွယ် ကောင်းသော” အချက်အလက်များကို စုံစမ်းစစ်ဆေးနေကြောင်း ဖေဖော်ဝါရီ ၂၁ ရက်နေ့က ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်က ထိုကဲ့သို့ ထောက်ပံ့မှုများသည် အခွန်ထမ်း အမေရိကန်ပြည်သူများ၏ ဘဏ္ဍာငွေများကို အလွဲသုံးစား ဆောင်ရွက်ခဲ့ခြင်းဖြစ်သည်ဟု ပြောဆိုခဲ့ပြီး “အိန္ဒိယရှိမဲဆန္ဒရှင်များမဲပေးရန်အတွက် မည်သည့်အတွက်ကြောင့် ဒေါ်လာ ၂၁ သန်း သုံးရမည်နည်း၊ ၎င်းတို့သည် တစ်စုံတစ်ယောက်ကို ရွေးကောက်တင်မြှောက်ရန် ကြိုးစား နေခြင်းဖြစ်မည်" ဟု ၎င်းက ဖေဖော်ဝါရီ ၁၉ ရက်နေ့က မိုင်ယာမီမြို့တွင် ပြောကြားခဲ့သည်။

ကိုးကား-RT

ရုရှားနှင့်ယူကရိန်းကြားဖြစ်ပွားနေသောစစ်ပွဲကို အဆုံးသတ်ရန်အတွက် လုပ်ဆောင်သော မည်သည့်ဆွေးနွေးပွဲများတွင်မဆို စေ့စပ်ညှိနှိုင်းရေး စားပွဲဝိုင်းတွင် ယူကရိန်းနိုင်ငံပါဝင်ရမည်ဟု ကနေဒါဝန်ကြီးချုပ် ထရူးဒူး နှင့်ယူကရိန်း သမ္မတဇီလန်စကီးတို့က ပြောကြားခဲ့ကြောင်းသိရသည်။

ထရူးဒူးနှင့်ဇီလန်စကီးတို့သည် လွန်ခဲ့သောရက်ပိုင်းက လုပ်ဆောင်ခဲ့သည့် ဖုန်းခေါ်ဆိုမှုအတွင်း ယခုကဲ့သို့ ပြောကြားခဲ့ကြခြင်းဖြစ်ကြောင်း သိရသည်။ အမေရိကန်သမ္မတသစ် ဒေါ်နယ်ထရမ့်သည် ရုရှား-ယူကရိန်းစစ်ပွဲကို အမြန်ဆုံး အဆုံးသတ်ရန်အတွက် တွန်းအားပေးလျက်ရှိပြီး အမေရိကန် ၏ မိတ်ဖက်နိုင်ငံများနှင့် ယူကရိန်းတို့ ပါဝင်ခြင်းမျိုး မရှိသော ဆွေးနွေးပွဲ ကို လွန်ခဲ့သည့်သီတင်းပတ်တွင် ဆော်ဒီအာရေးဗီးယားနိုင်ငံ၌ လုပ်ဆောင်ခဲ့ကြောင်းသိရသည်။

အမေရိကန်နှင့် ရုရှားကိုယ်စားလှယ်အဖွဲ့တို့သည် စစ်ပွဲကိုအဆုံးသတ်ရန်အတွက် ယူကရိန်းပါဝင်ခြင်းမရှိသော ငြိမ်းချမ်းရေးဆွေးနွေးပွဲများကို ဆော်ဒီအာရေးဗီးယားနိုင်ငံတွင် လုပ်ဆောင်ခဲ့ကြပြီးနောက် ဇီလန်စကီး နှင့် ထရူးဒူးတို့၏ ပြောဆိုချက်များ ထွက်ပေါ်လာခြင်းဖြစ်သည်။ ထရူးဒူး ၏ ရုံးက “ရုရှားနှင့် ဖြစ်ပွားနေသည့် စစ်ပွဲကို အဆုံးသတ်ရန်အတွက် လုပ်ဆောင်သည့် မည်သည့် ဆွေးနွေးပွဲများတွင်မဆို စေ့စပ်ညှိနှိုင်းရေး စားပွဲဝိုင်းတွင် ယူကရိန်းနိုင်ငံ ပါဝင်ရမည်ဟု ဇီလန်စကီးနှင့် ထရူးဒူး  တို့က အလေးပေးပြောကြားခဲ့ပါသည်” ဟု သတင်းထုတ်ပြန်ထားသည်။

ကနေဒါနိုင်ငံသည် ယူကရိန်း၏ အဓိကမိတ်ဖက်နိုင်ငံတစ်နိုင်ငံဖြစ်ပြီး ရုရှားနှင့်ဖြစ်ပွားနေသောစစ်ပွဲတွင် ယူကရိန်းကို အခိုင်မာဆုံး ထောက်ခံခဲ့သည့်နိုင်ငံများအနက် တစ်နိုင်ငံလည်းဖြစ်သည်။ ဇီလန်စကီးနှင့် ဖုန်းခေါ်ဆိုမှုအတွင်း ထရူးဒူးသည် ယူကရိန်းအတွက် ကနေဒါ၏ ထောက်ခံမှုများကို ထပ်လောင်းပြောကြားခဲ့ပြီး ယူကရိန်းအတွက် လုံခြုံမှုမရှိပါက ဥရောပတွင် ရေရှည်တည်တံ့မည့် ငြိမ်းချမ်းရေးကို ရရှိနိုင်မည်မဟုတ်ကြောင်း အလေးပေး ပြောကြားခဲ့သည်။

ကိုးကား-NP News

တောင်အာဖရိကသမ္မတ Cyril Ramaphosa က ယူကရိန်းသမ္မတ Volodymyr Zelensky ကို တောင်အာဖရိကနိုင်ငံသို့ နိုင်ငံတော်ခရီး အဖြစ် လာရောက်ရန် ဖိတ်ကြားခဲ့ကြောင်း တောင်အာဖရိကသမ္မတ၏ ပြောရေးဆိုခွင့်ရှိသူ Vincent Magwenya က TASS သတင်းဌာနကို ထုတ်ဖော်ပြောကြားလိုက်ပါသည်။

“အဆိုပါခရီးစဉ်သည် ရုရှားနှင့်ယူကရိန်းအကြား ငြိမ်းချမ်းရေးဆွေးနွေးမှုအတွက် ကြားဝင်ဖျန်ဖြေပေးမည့် တောင်အာဖရိက၏ ကြိုးပမ်းမှုများအနက် တစ်ခုအပါအဝင်ဖြစ်ကြောင်း” ၎င်းက ထပ်လောင်း ပြောကြားခဲ့ပြီး ခရီးစဉ်ရက်အတိအကျကို ထုတ်ဖော်ပြောကြားထားခြင်းမရှိပေ။                                                                                                                                                                                                           

ဇီလန်စကီးသည် တောင်အာဖရိကသို့ အလည်အပတ်ခရီးသွားရောက်လိုကြောင်း ယခင်က ပြောကြားခဲ့ပြီး ယခု တောင်အာဖရိက၏ တရားဝင် ဖိတ်ကြားချက်ကို လက်ခံထားသည်။ ယခုခရီးစဉ်သည် ရုရှားနှင့် ယူကရိန်း အကြား ငြိမ်းချမ်းရေးဆွေးနွေးမှုအတွက် အရေးကြီးသော အခန်းကဏ္ဍ တစ်ခု ဖြစ်လာနိုင်ဖွယ်ရှိပါသည်။

ကိုးကား-TASS

BRICS နိုင်ငံများအနေဖြင့် မိမိတို့၏ အမေရိကန်ဒေါ်လာကို ဖျက်ဆီးကာ ငွေကြေးအသစ်တစ်ခု ဖန်တီးချင်နေကြကြောင်း” အမေရိကန်သမ္မတ ဒေါ်နယ်ထရမ့်က ဖေဖော်ဝါရီ ၂၀ ရက် (ကြာသပတေးနေ့) တွင် ဝါရှင်တန်၊ ရီပတ်ဘလီကန်ရှိ ပြည်နယ်အုပ်ချုပ်ရေးမှူးများအဖွဲ့ကို ပြောကြား သည့် မိန့်ခွန်းထဲတွင် ထည့်သွင်းသတိပေးလိုက်ပါသည်။ 

BRICS နိုင်ငံများသည် တရုတ်ယွမ်ငွေများကို အသုံးပြုလိုကြကြောင်း၊ အမေရိကန်ဒေါ်လာ ပျက်စီးရာပျက်စီးကြောင်း လုပ်မည်ဆိုပါက BRICS   နိုင်ငံတိုင်းကို အခွန် ၁၅၀ % ကောက်ခံသွားမည်ဖြစ်ကြောင်းနှင့် မိမိတို့ အနေဖြင့် ၎င်းတို့၏ ကုန်ပစ္စည်းများကို မလိုချင်ကြောင်း” ဒေါ်နယ်ထရမ့် က ပြောကြားလိုက်ပါသည်။ 

ကိုးကား-TASS

ဘရပ်ဆဲလ်မြို့အခြေစိုက် အီးယူဆိုင်ရာ အာဆီယံသံအမတ်ကြီးများ ပါဝင်သည့် အာဆီယံ-ဘရပ်ဆဲလ် ကော်မတီ (ASEAN Brussels Committee - ABC) နှင့် ပင်လယ်ကွေ့ ပူးပေါင်းဆောင်ရွက်ရေးကောင်စီ (Gulf Cooperation Council - GCC) အဖွဲ့ဝင်နိုင်ငံများမှ သံအမတ်ကြီး များအကြား အလုပ်သဘော နေ့လယ်စာစားပွဲကို ဖေဖော်ဝါရီ ၁၉ ရက်တွင် ABC ၏ အလှည့်ကျဥက္ကဋ္ဌဖြစ်သည့် ဖိလစ်ပိုင်သံရုံးနှင့် မြန်မာသံရုံးတို့က ဘရပ်ဆဲလ်မြို့၌ ပူးပေါင်းစီစဉ် ကျင်းပခဲ့ကြသည်။ 

အဆိုပါအလုပ်သဘော နေ့လယ်စာစားပွဲတွင် အာဆီယံနှင့် GCC သံအမတ်ကြီးများသည် ၂၀၂၃ ခုနှစ်၊ အောက်တိုဘာလက ကျင်းပခဲ့သော အာဆီယံ- GCC ထိပ်သီးအစည်းအဝေးမှ ဒေသ နှစ်ခုအကြား ပူးပေါင်း ဆောင်ရွက်ရေးမူဘောင် (၂၀၂၄-၂၀၂၈) ထွက်ပေါ်ခဲ့ပါကြောင်း၊ အဆိုပါ မူဘောင်တွင် ဒေသနှစ်ခုအကြား စီးပွားရေးပူးပေါင်းဆောင်ရွက်မှုနှင့် ပြည်သူများအကြား ထိတွေ့ဆက်ဆံမှု (people-to-people ties) အား မြှင့်တင်ဆောင်ရွက်ရေးကို မီးမောင်းထိုးပြနိုင်ခဲ့ကြောင်း၊ ယခုနှစ်အတွင်း အာဆီယံအလှည့်ကျဥက္ကဋ္ဌဖြစ်သည့် မလေးရှားနိုင်ငံ၌ အာဆီယံ- GCC- တရုတ် ထိပ်သီးအစည်းအဝေးကိုလည်း ကျင်းပသွားမည်ဖြစ်ကြောင်း၊ GCC အဖွဲ့ဝင်နိုင်ငံများသည် အာဆီယံနိုင်ငံများ၌ အိမ်ခြံမြေ၊ ဟိုတယ်နှင့် ခရီးသွားလုပ်ငန်း၊ ဝန်ဆောင်မှုနှင့် ငွေရေးကြေးရေးကဏ္ဍတို့တွင် ရင်းနှီးမြှုပ်နှံမှုများ ဆောင်ရွက်လျက်ရှိပါကြောင်း၊ သို့ဖြစ်ရာ ယခုကဲ့သို့ ဘရပ်ဆဲလ် မြို့ရှိ အာဆီယံနှင့် GCC သံအမတ်ကြီးများ တွေ့ဆုံခြင်းသည် ဒေသ နှစ်ရပ်စလုံးနှင့် မိတ်ဖက်ဖြစ်လျက်ရှိသော အီးယူ စသည့် မိတ်ဖက်များနှင့် ဆက်ဆံရေး၌ ကြုံတွေ့နေရသည့် ဘုံစိန်ခေါ်မှုများနှင့် ပတ်သက်ပြီး အပြန်အလှန် ဆွေးနွေးဖလှယ်မှုပြုနိုင်ကာ ဘုံအကျိုးစီးပွား နယ်ပယ်များတွင် ပူးပေါင်းဆောင်ရွက်မှုပြုနိုင်မည့် အလားအလာများကို ရှာဖွေနိုင်ရေး ယန္တရားတစ်ရပ်ဖြစ်လာရန် မျှော်လင့်ပါကြောင်း၊ ဘရပ်ဆဲလ်မြို့ ရှိ အာဆီယံနှင့် GCC တို့၏ လှုပ်ရှားမှုများတွင် အပြန်အလှန် ပူးပေါင်း ပါဝင်သွားကြရန်လည်း မျှော်လင့်ပါကြောင်း စသည်ဖြင့် ဆွေးနွေးပြောကြားခဲ့ကြကြောင်း သိရသည်။

ကိုးကား-Myanmar National Post

ရုရှားနှင့်အမေရိကန်တို့ကြား သံတမန်ဆက်ဆံရေး ပြန်လည်စတင်ရန်အတွက် နှစ်နိုင်ငံစလုံးမှ သံအမတ်များက ၎င်းတို့၏ လုပ်ငန်းများကို မကြာမီပြန်လည်စတင်မည်ဟု ရုရှားလွှတ်တော်မှ အရင်းအမြစ်တစ်ခုက ပြောသည်။

ရုရှားနှင့်အမေရိကန် သံအမတ်များက ၎င်းတို့၏တာဝန်များကို အပြည့်အဝပြန်လည်ထမ်းဆောင်မည်ဖြစ်သောကြောင့် ၎င်းအချက်သည် နှစ်နိုင်ငံကြား သံတမန်ဆက်ဆံရေး ပုံမှန်ပြန်ဖြစ်စေရေးအတွက် အလွန်အရေးပါကြောင်း အဆိုပါ သတင်းအရင်းအမြစ်က ဆက်ပြောသည်။

ယခင် အမေရိကန်ပြည်ထောင်စုဆိုင်ရာ ရုရှားသံအမတ်ဟောင်း အန်နတိုလီ အန်တိုနော့သည် ၎င်း၏ သံအမတ်တာဝန်များကို ၂၀၂၄  ခုနှစ် အောက်တိုဘာလတွင် အဆုံးသတ်ခဲ့ခြင်း ဖြစ်သည်။

ရုရှားအစိုးရသည် အမေရိကန်ပြည်ထောင်စုဆိုင်ရာ ရုရှားသံအမတ် အသစ်အဖြစ် ရုရှားနိုင်ငံခြားရေးဝန်ကြီးဌာနရှိ မြောက်အမေရိကရေးရာဌာနမှ ညွှန်ကြားရေးမှူး အလက်ဇန္ဒား ဒါချီယက်အား ခန့်အပ်ရန် လျာထားသည်ဟု ရုရှားမီဒီယာတချို့က ဖော်ပြခဲ့သော်လည်း ယင်းကိစ္စရပ်နှင့် စပ်လျဉ်း၍ ရုရှားအစိုးရက   တရားဝင်ထုတ်ပြန်ထားခြင်း မရှိသေးပေ။

သို့သော် အမေရိကန်ပြည်ထောင်စုဆိုင်ရာ ရုရှားသံအမတ်သစ်ကို မကြာမီခန့်အပ်မည်ဟု ရုရှားအစိုးရအဖွဲ့မှ ပြောရေးဆိုခွင့်ရှိသူ ဒီမီထရီ ပက်စကော့က ပြောကြားထားသည်။

လက်ရှိ   ရုရှားနိုင်ငံဆိုင်ရာ အမေရိကန်သံအမတ်မှာ လင်းထရေစီဖြစ်ပြီး သူမအား ယခင်သမ္မတဟောင်း ဂျိုးဘိုင်ဒင်က ခန့်အပ်ခြင်းဖြစ်သောကြောင့် လက်ရှိသမ္မတ ဒေါ်နယ်ထရမ့်က ၎င်းနေရာတွင် အခြားသူတစ်ဦးအား အစားထိုး ခန့်အပ်နိုင်သူဟူသော  ပြောဆိုယူဆမှုများ ထွက်ပေါ်လျက်ရှိကြောင်း သိရသည်။

Source: Myawady Web Portal

အမေရိကန်သမ္မတဒေါ်နယ်ထရမ့် အစိုးရအဖွဲ့သည် ဆော်ဒီအာရေးဗီးယား တွင် ရုရှားသမ္မတပူတင်နှင့် သမ္မတထရမ့်တို့ ပြုလုပ်မည့် ငြိမ်းချမ်းရေး‌ ဆွေးနွေးပွဲမတိုင်မီ ယူကရိန်းနှင့် သတ္တုသယံဇာတဆိုင်ရာ သဘောတူညီချက်တစ်ရပ်ကို ရယူလိုကြောင်း၊ အစီအစဉ်အသေးစိတ်ကို နောက်ပိုင်း တွင်မှသာ ဆွေးနွေးရန် ရည်ရွယ်ထားကြောင်း၊ နှစ်ဖက်လုံးအတွက် ရိုးရှင်းသော သဘောတူညီချက်တစ်ရပ်ကို ရယူလိုကြောင်း ရိုက်တာသတင်းဌာနကို ကိုးကား၍ TASS က ဖော်ပြထားပါသည်။ 

ပြီးခဲ့သည့်မြူးနစ်လုံခြုံရေးညီလာခံတွင် အမေရိကန်ဘက်က ကမ်းလှမ်းထားသည့် သယံဇာတလဲလှယ်ရေးဆိုင်ရာ သဘောတူညီချက်ကို ယူကရိန်း သမ္မတဇီလန်စကီးက ငြင်းပယ်ခဲ့ပါသည်။ ထိုကမ်းလှမ်းချက်တွင် ယူကရိန်း၏ မြေရှားသတ္တုသယံဇာတ ၅၀ % ကို အမေရိကန်က ပိုင်ဆိုင်ရန် အဆိုပြုထားပြီး ယူကရိန်းအတွက် လုံခြုံရေးအာမခံချက်များ မပါဝင်ခဲ့ချေ။ ယူကရိန်းအကျိုးစီးပွားကို ကာကွယ်ရန် လုံခြုံရေး အာမခံ ချက်များ ပါဝင်သည့် သဘောတူညီချက် တစ်ရပ်ကိုသာ လက်ခံနိုင်မည် ဖြစ်ကြောင်း ဇီလန်စကီးက တုံ့ပြန်ပြောကြားခဲ့ပါသည်။ 

ယခုအခြေအနေတွင် ယူကရိန်းနှင့် အမေရိကန်အကြား သတ္တု သယံဇာတ ဆိုင်ရာ သဘောတူညီချက်ရရှိရေး ဆွေးနွေးမှုများမှာ အဓိကအခန်းကဏ္ဍ တစ်ခုဖြစ်နေပြီး ယူကရိန်း၏ အနာဂတ်နှင့် လုံခြုံရေးအပေါ် အကျိုးသက်ရောက်မှု ရှိနိုင်ပါသည်။

ကိုးကား-TASS

သဘောထားချင်းတူညီသည့် နိုင်ငံများနှင့်အတူ ယူကရိန်းကို ဆက်လက် ထောက်ပံ့မည်ဟု နိုင်ငံ၏သန္နိဋ္ဌာန်ကို ဂျပန်နိုင်ငံခြားရေးဝန်ကြီးက ပြောဆိုခဲ့ပြီး ကူညီမှုများ၌ ကာလလတ်မှ ကာလရှည် ပြန်လည်ထူထောင်ရေးနှင့် ပြန်လည်တည်ဆောက်ရေး လုပ်ငန်းများအတွက်အကူအညီများပါဝင်ကြောင်း Iwaya Takeshi က ဖေဖော်ဝါရီ ၂၀ ရက်နေ့တွင် တောင်အာဖရိက၌ စတင်ခဲ့သည့် G20 နိုင်ငံခြားရေးဝန်ကြီး များ၏ ဆွေးနွေးပွဲတွင် ပြောကြားခဲ့ခြင်းဖြစ်ပါသည်။

သံတမန်ရေးရာ ကြိုးပမ်းမှုများသည် ယူကရိန်း၌ဖြစ်ပွားနေသော တိုက်ပွဲများကို အဆုံးသတ်ရန်နှင့် ခက်ခဲသည့်အခြေအနေများကို ကျော်လွှားနိုင်ရန် လမ်းခင်းပေးလိမ့်မည်ဟု မျှော်လင့်ကြောင်း ၎င်းက ပြောကြားခဲ့ ပါသည်။

ရုရှားနှင့် မြောက်ကိုရီးယားတို့အကြား စစ်ရေးပူးပေါင်းဆောင်ရွက်မှု တိုးလာခြင်းအပေါ် အလွန်အမင်းစိုးရိမ်သည်ဟု Iwaya က ပြောခဲ့ပြီးယူကရိန်းတပ်များကို တိုက်ခိုက်ရန် မြောက်ကိုရီးယားစစ်သားများ ပါဝင်နေမှုကို ရှုတ်ချခဲ့ပါသည်။

နိုင်ငံတကာအသိုက်အဝန်းသည် တရားဥပဒေစိုးမိုးရေး၌ ကြီးမားသော စိန်ခေါ်မှုနှင့် ရင်ဆိုင်နေရကြောင်း Iwaya က ပြောကြားခဲ့ပြီး တောင်တရုတ်ပင်လယ် အပါအဝင် ကမ္ဘာပေါ်ရှိ မည်သည့်နေရာ၌မဆို လက်ရှိအခြေအနေကို အင်အားသုံးပြီး ပြောင်းလဲရန် တစ်ဖက်သတ် ကြိုးပမ်းမှုများကို ဂျပန်အနေဖြင့် မည်သည့်အခါတွင်မှ လက်ခံမည် မဟုတ်ကြောင်း ၎င်းက ဖြည့်စွက်ပြောကြားခဲ့သည်။

G20 အနေဖြင့် နိုင်ငံတကာ ပူးပေါင်းဆောင်ရွက်မှုတွင် ဦးဆောင် အခန်းကဏ္ဍမှ ပါဝင်လုပ်ဆောင်ရန် လိုအပ်နေသည်ဟုလည်း ၎င်းက အလေးပေး ပြောကြားခဲ့ပါသည်။

ကိုးကား-NHK World

အမေရိကန်ဖက်ဒရယ်အစိုးရ၏ ငွေကြေးအသုံးစရိတ်များကို လျှော့ချရန် သမ္မတထရမ့်၏ တာဝန်ပေးအပ်ခြင်းခံထားရသော ဘီလီယံနာ အီလွန်မတ် သည် ဗာဂျီးနီးယားပြည်နယ်၊ နေရှင်နယ်ဆိပ်ကမ်းတွင် ကျင်းပသည့် ကွန်ဆာဗေးတစ်နိုင်ငံရေးညီလာခံ စင်မြင့်ပေါ်သို့ တက်ရောက်ခဲ့ရာတွင် အာဂျင်တီးနားနိုင်ငံသမ္မတ ဇေဗီယာမီလီထံမှ လက်ဆောင်ရရှိထားသည့် သစ်ခုတ်လွှစက်တစ်ခုကို လက်ဖြင့်ကိုင်ဆောင်လာခဲ့သည်။

“ဒါဟာ ဗျူရိုကရေစီယန္တရားကို ဖြတ်တောက်ပစ်မယ့် လွှစက်ပါ” ဟုလည်း အီလွန်မတ်က ပြောကြားခဲ့သည်။

အာဂျင်တီးနားနိုင်ငံသမ္မတ ဇေဗီယာမီလီက မတ်အား လက်ဆောင်အဖြစ်ပေးအပ်ခဲ့သော အနီရောင် သစ်ခုတ်လွှစက်တွင် “လွတ်လပ်ရေး အသက်ရှည်ပါစေ (Viva la libertad, carajo)” ဟု ရေးထွင်းထားသည်။ အီလွန်မတ်သည် မီလီ သမ္မတမဖြစ်မီကတည်းက ထောက်ခံအားပေးခဲ့သူဖြစ်သည်။

အီလွန်မတ်သည် အမေရိကန်သမ္မတ ဒေါ်နယ်ထရမ့်၏ လမ်းညွှန်မှုဖြင့် ဘဏ်လုပ်ငန်းဝန်ထမ်းများ၊ သစ်တောလုပ်သားများ၊ ဒုံးပျံသိပ္ပံပညာရှင်များနှင့် အစိုးရဝန်ထမ်းများစွာအပေါ် ပစ်မှတ်ထား၍ မလိုအပ်သည်တို့ကို ထိထိရောက်ရောက်လျှော့ချမှုများကို ဦးဆောင်လျက်ရှိသည်။ ယမန်နေ့ကလည်း အမေရိကန်အခွန်ဌာန(IRS) မှ ဝန်ထမ်း ၆,၀၀၀ ခန့်အား အလုပ်ထုတ်ပစ်မည်ဟု အီလွန်မတ်က အသိပေးခဲ့ကြောင်း ယင်းကိစ္စရပ်နှင့် ရင်းနှီးသူတစ်ဦးက ပြောသည်။

Source: Popular Myanmar